Ads by Google Ads by Google

Sauni aufusu a Amerika Samoa mo le ta’amilosaga i Savai’i


Ali’i fusu fa’apolofesa mai le kalapu fusu a le Maliu Mai Boxing Club, susuga Paofe Seeti ma Ofisa Talaimalo. [ata AF]

Le fusuaga i le va o Falaniko Tauta o Amerika Samoa (itu taumatau) ma Jancen Poutoa o Samoa (itu agavale), i le ta’amilosaga o le Mosooi, lea na manumalo ai Poutoa o Samoa. [ata: AF]
ausage@samoanews.com

E ui i le tulaga le manuia sa i ai taumafaiga a le aufusu a Amerika Samoa i le ta’amilosaga o Fusuaga Fa’avaomalo o le Mosooi i le vaiaso na te’a nei, ina ua faiaina uma a latou tama fusu e to’afa i le aufusu mai Samoa, peita’i na taua e le faiaoga o le ‘au i le Samoa News e fa’apea, ua avea sese ma fa’aletonu na tutupu i le ta’amilosaga o le Mosooi fa’atoa mae’a atu, e fesoasoani ai i le tapenaina o le ‘au fili lea ua fa’amoemoe e malaga i le ta’amilosaga e faia i Savai’i i le fa’aiuga o le masina fou.

 

“O lo o tulaga lelei lava tapenaga a le ‘au i le taimi nei, pau le fa’aletonu sa maitauina i le ta’amilosaga o le Mosooi, e le i lava le manava a tama fusu, ua ova fo’i le sesela i totonu o le mae’a, ae o vaiaso e 5 o lo o totoe, o le a matou galulue ai ma le au fusu i le fa’aleleia o vaega o lo o fa’aletonu i le taimi nei”, o le saunoaga lea a le afioga a Sala Sanele Etuale, o ia lea o le faiaoga o le ‘au fusu a Amerika Samoa.

 

E leai ma se tama fusu a Amerika Samoa na tausinio i le ta’amilosaga o le Mosooi i le vaiaso na te’a nei na fa’aletonu lana tapenaga, pe a fa’atusatusa i le tulaga sa i ai le maualuga o le tapenaga a le au mai Samoa, se’i vagana ai lava le sela na fai ma lape o le taumafaiga.

 

“O lo o vaavaai e tatau ona malaga se au fusu e to’afa i le vaega o le amateur, ma ni ali’i fusu fa’apolofesa se to’alua, mo le ta’amilosaga o le a faia i le motu tele i Savai’i i le fa’aiuga o le masina fou o Novema”, o le saunoaga lea a Sala.

 

O alo fusu e to’alua a Amerika Samoa lea ua fusu fa’apolofesa mai le Asosi o Fusuaga a le “American Samoa Samoa Boxing Federation (ASBF) e aofia ai Paofe Seeti ma Ofisa Talaimalo, lea na fa’ataunuuina i le ta’amilosaga a le Mosooi na te’a nei a laua ulua’i fusuaga fa’apolofesa.

 

Na manumalo Seeti o Amerika Samoa i lana ulua’i fusuaga fa’apolofesa ia Malumalusa Mulipola o Samoa, ae na faiaina Ofisa Talaimalo i lana ulua’i fusuaga fa’apolofesa ia Hugo Fata o Samoa, i se ta’aloga mataina ma le finau.

 

Na taua e le faiaoga a le aufusu a Samoa ia Laino Fatupaito e fa’apea, o le masina fou lea ua fa’amoemoe e tatala aloaia ai le mae’a fusu a Savai’i, lea fo’i ua maua ai le avanoa e valaaulia ai e le Asosi Fusu a Samoa ia le au fusu a Amerika Samoa, e malaga atu ina ia auai i le tatala aloaiaina o lenei mae’a fusu.

 

Saunoa atili Fatupaito e fa’apea, o le agaga maualuga o le Asosi Fusu a Samoa, ia fa’aauau pea le tatalaina o mae’a fusu i motu e lua, ina ia mafai ai ona atina’e atili le ta’aloga i totonu o le atunu’u, ma maua ai le avanoa o le to’atele o tupulaga e fa’aali ai la latou taleni.

 

O le valaaulia a Amerika Samoa, o le a toe fa’aauau ai fo’i la latou ta’amilosaga masani lea e faia ma Samoa i le tele o tausaga, e fa’aopoopo i taamilosaga o le Fu’a ma le Mosooi e pei ona fa’atoa mae’a atu nei.

 

Ina ua fesiligia e le Samoa News ia Fatupaito i sana fautuaga mo le aufusu a Amerika Samoa i itu e tatau ona fa’aleleia, a o le i masi’i atu mo le valaaulia i Samoa i le masina fou, na saunoa le ali’i faiaoga mai Samoa e fa’apea, “e tatau ona lava le malosi ma manava o ali’i fusu. Ua atoatoa tapenaga a Amerika Samoa i lana au fusu, pau le itu e tatau ona vaavaai i ai, ia lelei ona tapena le malosi ina ia mafai ai e le tama ona fa’atino le ta’aloga i totonu o le 9 minute, aua afai e tumau lava le sela o le ali’i fusu, e faigata lava ona ia fa’atinoina ni isi tulaga i totonu o le maea”.