Ads by Google Ads by Google

Samala pea ta’ita’i malo fa’afitauli fa’atatau fualaau fa’asaina


Le afioga i le ali’i kovana ia Lolo Matalasi Moliga ma ni isi o ta’ita’i o le malo. [ata AF]
ausage@samoanews.com

A o taumafai ai pea ta’ita’i o le malo e fa’amautu fuafuaga uma ina ia puipuia mai ai fanau ma tupulaga talavou ma a’afia i fualaau fa’asaina, ua le o toe umi se fa’amautuina loa talanoaga o lo o galulue i ai le Komiti Fa’apitoa na tofia e le Kovana e sailia se auala e foia ai le fa’afitauli i fualaau fa’asaina, i le tulaga tonu e tatau ona taoto i ai lenei mataupu.

 

Na taua e se sui o le Komiti o loo talanoaina fuafuaga e foia ai lenei fa’afitauli i le Samoa News, le aga’i atu lea o a latou talanoaga i se tulaga mautu ma malosi, ma le fa’amoemoe o le vaiaso fou e tu’uina atu ai la latou fa’aiuga mulimuli i luma o le ali’i kovana mo sona finagalo.

 

O se tasi o mataupu o lo o malosi i ai finauga a le Komiti i le taimi nei, o le mataupu i le faia lea o suega mo tagata faigaluega uma a le malo ina ia mautinoa latou te le o fa’aaogaina fualaau fa’asaina.

 

Na taua e se sui o le Komiti i le Samoa News e fa’apea, e le o se mataupu faigofie lenei mataupu, ona e tele tulaga e tatau ona vaavaai i ai, ma ua taoto atu fo’i se fautauga i le Loia Sili a le malo ina ia silasila toto’a i lenei fautuaga, poo fea tulaga e moomia ai se poloaiga fa’a kovana, pe mana’omia se tulafono ina ia mautinoa e laugatasia tagata uma i lalo o lenei fuafuaga.

 

O sui o le Komiti e aofia ai ni isi o Fa’atonusili, sui mai ni isi o matagaluega a le malo, fa’apea ai ma le Ofisa o Mataupu Tau Samoa.

 

A o galulue le Komiti mo le fa’amautuina o le latou fautuaga i se auala e foia ai lenei fa’afitauli i le atunu’u, o lo o fa’apena fo’i ona galulue fa’atasi atu ai ma ni isi o afioaga i le taumafaiga lava ina ia foia le fa’afitauli, atoa ai ma le sao mai afioga i Senatoa ma Faipule i le maota o sui.

 

E pei ona manino i le molimau a le Fa’atonusili o le Matagaluega o le Puipuiga o le Saogalemu Fa’alotoifale i luma o le maota o sui i le masina na te’a nei, le fa’amaonia i su’esu’ega a lona Ofisa o lo o fa’agasolo mo lenei mataupu, o lo o i ai tagata faigaluega a le malo o lo o galulue i vaega o lo o ulufale mai ai oloa mai fafo o lo o a’afia i le aumaiina fa’anana o fualaau fa’asaina i le atunu’u, aemaise lava i le tulaga o le pauta oona o le aisa.

 

Na taua e Samana S. Veavea le maua foi ia latou suesuega ni isi o tagata faigaluega mai kamupani la’u uta o lo o aofia ai i lea fa’afitauli, ma o i latou uma nei o lo o mata’ituina lava e lana aufaiglauega i suesuega o lo o fa’aauauina pea i le taimi nei.

 

O se tasi o fa’afitauli i totonu o afioaga o lo o mafua ai le fa’atupulaia o fualaau fa’asaina, e le o mamalu pulega a ali’i ma faipule mo le faia o leoleooga i le po, atoa ai ma le fa’atamala o Pulenu’u e fa’atino o latou tiute, e pei ona saunoa le afioga i le Maoputasi ia Mauga Tasi Asuega i le fonotaga a le itumalo o le Maoputasi i le vaiaso na te’a nei.

 

Saunoa Mauga, o ia fo’i lea o le Failautusi o le Ofisa o Mataupu Tau Samoa e fa’apea, o le isi lea auala e faigofie ai ona foia le fa’afitauli i fualaau fa’asaina, o le fa’amaoni o Pulenu’u ma ali’i mautofi i le fa’atinoina o latou tiute