Ads by Google Ads by Google

Salatupe le ali’i na tu’uaia i le faia C.I. pepelo i le 2006


[ata: foa'i]
ausage@samoanews.com

O le mataupu fa’asaga i le ali’i faigaluega a le malo lea na tu’uaia i lona tu’uina atu o ni pepa malaga C.I. pepelo e malaga ai se aiga i Samoa i le 2006, ma le fa’amoemoe e maua ai se taui tupe mo ia, ua mae’a aloaia nei ina ua talia e le fa’amasinoga maualuga le tali ioe a lenei ali’i, ma fa’asala ai loa o ia i le salatupe e $1,000.

 

E 2 moliaga mamafa na tu’uaia ai e le malo le ali’i o Stoechkict F. Allen, 46 tausaga le matua mai Vaitogi. O ia moliaga e aofia ai lona tuuina atu o faamaumauga a le malo i se auala faasolitulafono, ma le avea o lona tulaga faatagata faigaluega a le malo e saili ai ni taui i auala fa’aalatua.

 

Ae i lalo o le maliliega na sainia e le malo ma Allen, lea fo’i na talia e le fa’amasinoga maualuga i le vaiaso na te’a nei, na toe sui ai e le malo le mamafa o le moliaga muamua e avea ma moliaga mama, le solitulafono e mafai ona fa’asala ai se tasi i le toese mo le umi e le silia i le tausaga, pe fa’asala foi i le salatupe e le silia i le $1,000, poo le fa’asala foi i fa’asalaga uma ia e lua.

 

E le i toe faatali le fa’amasinoga i se isi aso e tu’u atu ai lana fa’aiuga, ae na manatu e fofogaina lava i le aso na talia ai le tali ioe a le ua molia. Na talosaga le loia a Allen ia Sharron Rancourt ma le loia a le malo ia Marcellus T. Uiagalelei i le fa’amasinoga, ina ia fa’asalaga le ua molia i le salatupe.

 

Saunoa le afioga i le ali’i fa’amasino ia Elvis P. Patea e fa’apea, talu ai le umi o tausaga talu ona fa’atali se fa’aiuga o lenei mataupu, atoa ai ma le usitaia pea e Allen o tuutuuga a le fa’amasinoga sa tatala ai o ia i tua a o fa’atalitali ai se fa’aiuga o lana mataupu, ua manatu ai le fa’amasinoga e le agava’a se fa’asalaga nofovaavaaia, ae o le a tu’uina atu na o le salatupe e $1,000 e totogi e le ua molia i totonu o le 30 aso.

 

O le mataupu fa’asaga ia Allen na alia’e mai i le masina o Ianuari 2008, ina ua faila e se ulugali’i se la tagi fa’asaga i le ua molia, i lona tu’uina atu o ni pepa malaga C.I pepelo e malaga ai le la fanau i Samoa, ma tofia ai loa le ali’i su’esu’e ia Samuelu Tinai mai le Ofisa e Suesuega Solitulafono ma Fualaau Fa’asaina a le malo (OTICIDE) na te suesueina lenei mataupu.

 

I le aso 4 Tesema 2006 e pei ona taua e le ulugali’i i Leoleo, na aga’i atu ai i le Ofisa Faipepa Fanau e talosaga ni pepa malaga C.I e malaga ai le la fanau i Samoa mo aso fiafia o le fa’aiuga o le tausaga, ma fa’ailoa atu ai loa le la talosaga ia Allen, ae na tali i ai le ua molia, e sili pe a o atu i lona fale i Vaitogi i le afiafi latou te talanoa ai, ona o loo fai lava si ona pisi i le taimi lea.

 

O le afiafi o le aso lava lea na malaga ai loa le ulugali’i i le fale o le ua molia i Vaitogi ma le manatu, atonu o le a taugofie se tau e ofo atu e le ua molia mo le totogi o C.I., peita’i ina ua mae’a le latou talanoa, sa fa’ailoa atu e le ua molia e ta’i $50 le tupe e totogi mo le C.I., tusa lea e $250 mo C.I. e 5 mo le la fanau.

 

O le aso 10 Tesema 2006 na maua atu ai C.I. e 5 mo le fanau a le ulugali’i, ma latou malaga atu ai loa i Samoa i le aso 24 Tesema. O le malae va’alele i Faleolo na tula’i mai ai le fa’aletonu, ina ua siaki e se Tama’ita’i faigaluega a le Ofisa o Femalagaaiga a Samoa pepa malaga a le fanau a le ulugali’i ma iloa ai, e tulaga o isi C.I. e 3 sei vagana ai C.I. e 2 o lo o lelei.

 

Na fa’ailoa e le Tama’ita’i Faigaluega i le ulugali’i, o isi C.I. e 2 sa fa’aaoga muamua fo’i e isi tagata, ae o le isi C.I. e tasi e le o lelei ona ua mae’a lona aoga. Ona o tulaga fa’aletonu i pepa malaga a le fanau e to’atolu, na fa’ailoa ane ai i le ulugali’i, e le mafai ona ulufale le la fanau lea i Samoa, ae o le a toe fa’afo’i mai i Tutuila.

 

Na talosaga le ulugali’i mo se fesoasoani, ma talia ai loa le ulufale o le la fanau e to’atolu, ina ua mae’a ona talanoa le Tama’ita’i Faigaluega ma lona Ta’ita’i, ma maua ai le fa’atanaga i lalo o tuutuuga, e totogi le $150 (US) mo C.I. e tolu o loo fa’aletonu, lea fo’i sa usitaia e le ulugali’i.

 

O le aso 4 Ianuari 2007 ina ua toe taliu mai le ulugali’i i le atunu’u, na malaga sa’o ai loa i le Ofisa Faipepa Fanau e fa’afetaui Allen e tusa ai o le fa’aletonu, ae taunu’u atu o lo o alu o ia mo lana malologa o le aoauli, ma fa’ailoa ai loa e le ulugali’i i le isi sui o le aufaigaluega le mataupu atoa e fa’atatau i C.I. pepelo na tu’u atu e Allen i le latou aiga.

 

Na taua i fa’amaumauga a le fa’amasinoga e fa’apea, ina ua maua e le aufaigaluega a Allen fa’amatalaga e fa’atatau i C.I. pepelo, na latou sailia ai loa le ofisa atoa ai ma nofoaga o loo teu ai fa’amaumauga i talosaga mo C.I ua mae’a ona fai, pe le maua ai pepa talosaga mo C.I o lo o taua, peita’i sa fiu e saili e le maua.

 

Na sailli fo’i i le nofoaga faapitoa lea e teu ai lisiti mo faamaumauga o C.I. o loo i totonu o le Ofisa o le uncle a le ua molia, e leai fo’i ni fa’amaumauga na maua ai, ae i le tuana’i ai o aso e 3, na toe sailia ai loa totonu o le nofoaga o loo teu ai fa’amaumauga ma lisiti a le ofisa, ae maua ai loa pepa talosaga mo C.I. ma le tupe e $250 o loo fa’apipi’i fa’atasi.

 

Na taua e Allen i ali’i su’esu’e ina ua fesiligia o ia, na te le i fa’aaogaina se tupe sa totogi atu mo C.I. a le ulugali’i, na te le i faia fo’i lea gaioiga ma le fa’amoemoe e maua atu ai se taui mo ia, ae sa ia naunau e fesoasoani i le ulugali’i.