Na saisai e ni alii Asia se to’a 7 se ali’i Samoa na maua o gaoi i totonu o le latou faleoloa i se taimi o le vaveao, e fa’atali ai le taunu’u ane o Leoleo. Na fa’amaonia e Leoleo i le latou ripoti lo latou taunu’u atu i le nofoaga na tula’i mai ai le fa’alavelave, ma latou vaaia ai se ali’i o loo saisai mai i se mae’a pa’epa’e, ae o loo fa’alapotopoto ai ni ali’i Asia se to’a 7 i ona tafatafa.

O le ali’i na saisai o Ioane Faimata, lea ua molia e le malo i moliaga mamafa e aofia ai le talepe fale i le tulaga muamua, gaoi, atoa ai ma lona fa’aaoga o ni a’upega e fa’atino ai le fa’alavelave o le talepe fale.

O le mataupu fa’asaga ia Faimata na tofu atu i le Ofisa o Leoleo i Tafuna i le masina na te’a nei, ina ua talosagaina e le pule o le faleoloa Asia o le Pacific Mini Mart se fesoasoani a Leoleo, i le mae’a ai lea ona latou maua o le ua molia i totonu o le faleoloa o lo o ia gaoia oloa.

O oloa na gaoia o pusa o oloa sii atoa o le sikaleti, lea e tusa ma le $9,600 le tau aofa’i e pe ona taua i fa’amaumauga a le Fa’amasinoga. Na taua i fa’amaumauga a le Fa’amaisnoga e fa’apea, ua tele masina o fetaia’i pea le faleoloa a le Pacific Mini Mart ma le fa’afitauli o le gaoia lea e tagata o ana oloa.

Ona o lea tulaga, na manatu ai loa le Pule ma lana aufaigaluega, o le a fai se auala e pu’e ai le tagata gaoi. ona tofia lea e le Pule o ni ali’i Asia se to’a 6 e lalafi solo i totonu o le faleoloa, mo le taumafai lava e saili le tagata gaoi.

I se taim o le vaveao poo le va o le itula e 3:00 e oo atu i le 4:00, ae vaaia loa le ulufale o le ua molia i totonu, e ala i lona talepeina o le faitoto’a ma aga’i atu loa ma fa’atino lana galuega o le la’u lea o pusa o oloa sii atoa o le sikaleti ma momoli i le isi itu o le lotoa, i tua o containers tetele a le pisinisi.

Na fa’afuase’i ona osofa’i e ali’i e toa 6 na filifilia e le Pule latou te sailia le gaoi le ua molia, ona latou saisai lea i le mae’a e fa’atali ai le taunu’u ane o Leoleo. Ina ua fesiligia e Leoleo le ua molia e tusa ai o le gaioiga sa ia faia, na ia fa’amaonia ai lona ulufale fa’amalosi i totonu ma gaoi oloa a le pisinisi.

Na ta’utino fo’i Fiamata i Leoleo e fa’apea, e le na o ia o loo a’afia i lenei fa’alavelave, ae to’atolu isi ali’i sa latou fa’aosoina o ia e fa’atino lenei gaioiga. Na mafai ona matamata Leoleo i le ata sa pu’eina e le masini pu’eata a le faleoloa, ma vaaia ai le ua molia ma ni alii se to’atolu o loo latou faia le gaioiga o lo o ulufale fa’asolitulafono i totonu, ona latou la’u lea o pusa o oloa sikaleti ma faaputu i tua o container o lo o fa’asaga mai i le isi itu o le faleoloa.

E 6 isi pusa o oloa sii atoa o le sikaleti na maua e Leoleo i tua o containers o lo o fa’atupu ai. Na fa’amaonia e le pule o le faleoloa o le Pacific Mini Mart i Leoleo, o pusa oloa ia na gaoia atu mai totonu o le latou faleoloa.

Ua taofia nei Fiamata i le toese i Tafuna e aunoa ma se tupe ua fa’atulaga e tatala ai o ia, e fa’atali ai taualumaga o lana mataupu lea ua fa’agasolo i le taimi nei.