O le vaiaso na te’a nei na sainia ai e le afioga i le ali’i kovana ia Lolo Matalasi Moliga le pili na pasia e le Fono Faitulafono, e toe fa’amalosia atili ai le tulafono o le Fa’alapisi i totonu o le teritori, ina ia aloaia loa e avea ma tulafono a le malo.

I se pepa o fa’amatalaga mai le Ofisa o le ali’i kovana i le vaiaso na te’a nei, sa taua ai le sainia aloaia e le ali’i kovana o lenei pili ina ia avea loa ma tulafono, ona o le naunau e vave fa’amalosia loa gaioiga a Ofisa eseese o le malo ua taoto atu i ai le malo mo le fa’amamaina lea o le otaota i le atunu’u.

Na taua i le pepa o fa’amatalaga le fa’anaunauga o le afioga i le ali’i kovana, ina ia avea le aloaia o lenei pili e avea loa ma tulafono a le malo, ma auala e fa’amalosia atili ai le pito laau a tagatanu’u e fa’atinoina, e ala lea i le teuteu fa’amatagofie atoa ai ma le fesoasoani i le fa’amamaina o le lapisi i totonu o le atunu’u, ma atili ai ona matagofie le vaaiga e molimauina e tagata asiasi mai mo Amerika Samoa.

Na faafetaia e le afioga i le ali’i kovana ta’ita’i o le Fono e tusa ai o lenei galuega tele sa latou fitaituga i ai, atoa ai ma le pasiaina o lenei tulafono e fesoasoani ai i le fa’amamaina o le atunu’u atoa, aua pau lea o le auala e mafai ai ona fa’amalosia le tulafono o le fa’alapisi i le atunu’u, o le fa’aopoopo lea o Ofisa o le malo e tu’u atu i ai le malosi mo le fa’amalosia o le tulafono.

“O Ofisa a le malo ua tu’u atu i ai le malosi e fesoasoani ai i le Matagaluega o le Puipuiga o le Saogalemu Lautele mo le fa’amalosia o le tulafono o le fa’alapisi i le teritori e aofia ai le Ofisa o Mataupu Tau Samoa, Ofisa o le Pulega o le Eletise ma le Suavai (ASPA), Ofisa o le Siosiomaga (AS-EPA), Matagaluega o le Soifua Maloloina, Ofisa o le Vaomatua ma le Gataifale (DMWR), Fa’apea ai ma le Matagaluega o Paka ma Malaetaalo, ma o ia ofisa uma o le malo, o le a latou galulue e fa’amalosi le tulafono ina ia mautinoa e fa’aauau pea tulaga matagofie i totonu o le atunu’u”, o se vaega lea o le pepa o fa’amatalaga sa tu’uina mai i le ofisa o le ali’i kovana.

Saunoa atili le ali’i kovana e fa’apea, o le vaega tupe lea ua fa’amoemoe e maua mai i le fa’amalosia o lenei tulafono, i soo se taimi e ta’usala ai e le fa’amasinoga se tasi ua soli le tulafono, o le a fa’aaoga lea tupe e fesoasoani ai i le fa’atinoina o polokalame e fa’alauiloa atili ai i le atunu’u le taua o le fa’amama o le atunu’u i soo se taimi, ma mafai ai ona maua le avanoa e fa’atosina atili mai ai turisi tafafao mai fafo i totonu o le atunu’u.

“O se auala lelei lea mo Amerika Samoa e vaaia ai le aga’i i luma o lona tulaga mama, ma avea ai o se auala e mafai ai ona tausia lelei e tagata vaega eseese o le atunu’u pei lava o lo latou aiga moni”, o le fa’aiuga lea o le pepa o fa’amatalaga sa tu’uina mai i le ofisa o le ali’i kovana i le vaiaso na te’a nei.

E ui e na o le 6 Ofisa o le malo na manatu le faigamalo a Lolo ma Lemanu e tu’u atu i ai le malosi mo le fa’amalosia o le tulafono o le fa’alapisi, peita’i na lagolagoina e le Fono Faitulafono le talosaga a le Ofisa o Mataupu Tau Samoa, ina ia aofia ai i totonu o le li’o lea vaega o Pulenu’u o afioaga ta’itasi, ona o i latou tonu ia o lo o pau i ai le mamafa o le galuega o le teuteuina lea ma le fa’amamaina o nu’u ma afioaga ta’itasi o le atunu’u.

I le polokalame a le malo sa fa’atautaia i Faleasao, Manu’a i le vaiaso na te’a nei na aofia ai fo’i i saunoaga a le afioga i le ali’i kovana ia Lolo faapea ai le Pulesili o le ASPA ia Utu Abe Malae le taua o le teuteu fa’amatagofie o tafaala fa’apea ai le atunu’u atoa, ina ua maua le avanoa la te saunoa ai i le taimi o le polokalame.

I le avea ai o le afioga a Utu ma ta’ita’ifono o le Komiti o le Fa’amamaina o le atunu’u a le faiamgalo, sa ia talanoa ai i le itumalo o Manu’a e fa’atatau i le taua o le ola mama atoa ai ma le teuteu fa’amatagofieina o tafatafa ala aemaise ai o totonu o afioaga eseese.

Saunoa Utu e faapea, o le galuega o le fa’amamaina o afioaga taitasi, o le tiute fa’atino lea a tagata uma o le nu’u, aua afai e galulue uma le nu’u atoa, lona uiga ua mama le galuega e fa’atinoina e le malo.

Na lagolagoina e le afioga i le ali’i kovana ia Lolo le saunoaga a Utu, ma ia fautuaina ai tagata o le itumalo o Manu’a ina ia fa’aauau pea galuega lelei o lo o fa’atinoina e aofia ai ma le fa’amamaina o tafatafa o le alatele fa’apea ai totonu o le afioaga, aua e leai se isi e fa’amoemoe i ai le fa’atinoina o nei galuega, ua na o tagata moni lava o le nu’u.