O le vaiaso na te’a nei na sainia ai e le afioga i le ali’i Kovana ia Lolo Matalasi Moliga, se pili na pasia e le Fono Faitulafono, e sii ai totogi o tautua i luga o le uafu tele a le malo i Fagatogo, ma le fa’amoemoe e maua ai se isi vaega tupe fa’aopoopo mo le malo.

I lana tusi i ta’ita’i o le Fono Faitulafono i le vaiaso na te’a nei, na taua ai e Lolo lona agaga fa’afetai, ina ua mafai ona pasia lenei tulafono taua.

Saunoa Lolo e fa’apea, ua silia i le 30 tausaga e le i toe faia lava se siitaga i totogi o tautua i luga o le uafu a le malo, ma, talu mai le taimi uma, ua maitauina le si’itia i luga o le totogi o auaunaga eseese o lo o fa’atinoina ai le tautua i luga o le uafu.

Sa ia taua atili e fa’apea, e pei ona aofia ai i taumafaiga a le malo ina ia saili auala e fa’aopoopo ai tupe maua mo le malo, o le siitia o le totogi o tautua i luga o le uafu, e le gata e si’itia ai tulaga i le auaunaga a le uafu, ae o le a mafai ai fo’i ona fesoasoani i le malo i tulaga tau le tamaoaiga.

Na taua e Lolo i Ta’ita’i o le fono lona fa’anaunauga o lo o i ai, ina ia fa’aauau pea ona galulue fa’atasi le Fono Faitulafono ma le faigamalo i le lumana’i, mo le iloiloina o isi mataupu mo le manuia o le atunu’u.

O se tasi lenei o pili na taua e Lolo i le fonotaga ma lana Kapeneta i le 2 vaiaso talu ai o le a ia sainia e avea ma tulafono, ona o lona fa’anaunauga ia mafai ai ona maua ni isi vaega tupe fa’aopoopo mo le malo.

Sa ia fa’ailoa i lana Kapeneta, e le o pili uma ua pasia e le Fono na te sainia, ae o le a ia teena isi pili ma le fa’amoemoe ina ia toe faia i ai se teuteuga ina ia fa’aleleia atili ai, ona toe tuuina atu loa lea i luma o le Fono Faitulafono i le masina o Ianuari o le tausaga fou.

Na fa’ailoa e Lolo i lana Kapeneta, le mae’a lea ona latou feiloa’i ma Ta’ita’i o le Fono Faitulafono mo le fa’amaninoina o le mataupu e fa’atatau i pili tupe sa tuuina atu e le faigamalo, lea ua pasia isi ae o lo o taoto ai pea lava i le Fono isi pili.

Saunoa Lolo e fa’apea, ua mae’a ona latou malilie fa’atasi ma Ta’ita’i o le Fono Faitulafono, ina ia toe fai se teuteuga i pili tupe ia o le a teena, ona toe tuuina atu ai loa lea i luma o le Fono Faitulafono i le tausaga fou, e toe galulue i ai afioga i Senatoa ma Faipule.

Sa ia fa’ailoa atili lona fa’anaunauga atoa sa i ai, i le pasia lea e le Fono Faitulafono o le pili mo le lafoga o oloa e 7% (sales tax), ona o iina lea sa fa’amoemoe e tatau ona maua mai i ai se isi alaga tupe feololo mo le malo, peita’i, e ese fo’i le finagalo o le Fono Faitulafono ina ua taunu’u atu le tulafono, ese fo’i le tulaga sa i ai le finagalo o le faigamalo.

E ui o ia tulaga, na taua e le ali’i Kovana lona fa’aaloalogia o le fa’aiuga a le Fono Faitulafono ua faia.