Sailiga Tupe i totonu o aoga fa’atupe ai galuega mo fanau aoga


Afioga i Faipule o le Maota o Sui i le Fono Faitulafono a le atunu’u. [ata AF]
ausage@samoanews.com

Ua talosagaina e le afioga i le ali’i Faipule ia Sataua Dr. Mataese Samuelu se iloiloga a le Komiti o Aoga a le Maota o Sui ma le Fa’atonusili o Aoga a le malo, sei talanoaina ai le faafitauli lea ua maitauina i ni isi o aoga i le atunu’u, o le faia lea o sailiga tupe e fa’atau ai mea faitino (supplies) e fa’atino ai galuega mo fanau aoga.

 

Na taua e Sataua i le taimi o folafolaga a le maota o sui i le vaiaso na te’a nei e fa’apea, e lagoa lona fa’anoanoa ona o ni tulaga le manuia ua tutupu i ni isi o aoga, i le faia lea o sailiga tupe e fa’atau ai sapalai a aoga.

 

“Ou te le i manatu o lo o tupu lenei fa’afitauli i totonu o aoga”, o le saunoaga lea a Sataua. “A o lea ua maua fa’amatalaga, ua fa’aaoga e faiaoga le ta’aloga o le HIT 3 e saili ai tupe e fa’atau mai ai sapalai mo fanau aoga. Afai o le tulaga lea ua tula’i mai, o fea ua ave i ai tupe sa pasia atu i le paketi e fa’atau ai sapalai mo aoga”.

 

E ese mai i sailiga tupe, ae sa taua fo’i e Sataua isi fa’afitauli i totonu o aoga e pei o le fa’aletonu o pasi aoga, atoa ai ma isi lava tulaga e fitoitonu i le auaunaga a le Matagaluega o Aoga.

 

Na lagolagoina e le afioga i le ali’i Faipule mai Manu’a #2 ia Toeaina Faufano Autele le mataupu a Sataua, ina ia fa’atulaga se iloiloga e fesiligia ai le Fa’atonusili o Aoga i le tele o mataupu o lo o fia malamalama i ai afioga i Faipule.

 

Ae na taua e le Ta’ita’ifono o le Komiti o Aoga a le maota o sui, afioga Vaetasi Tuumolimoli Saena Moliga e fa’apea, o lo o teena e le Fa’atonusili o Aoga ripoti o lo o faia ni sailiga tupe e fa’atau ai sapalai a aoga.

 

“O le saunoaga a le Fa’atonusili o Aoga, o lo o lava ma totoe sapalai mo aoga i le taimi nei. O ripoti i sailiga tupe atoa ai ma taumafa o lo o fa’atau i totonu o lotoa a aoga taitasi, e le fa’atagaina tulaga i totonu o aoga a le malo. O lo o i ai le polokalame a le School Lunch latou te tapenaina taumafa mo fanau aoga”, o le saunoaga lea a Vaetasi.

 

Sa ia taua atili fo’i e fa’apea, e tusa ai ma le la fesootaiga ma le Fa’atonusili o Aoga, e leai lava ni fa’asea faapea ua oo atu i lona Ofisa.

 

“Ua talosaga mai le Fa’atonusili o Aoga, a i ai ni fesili a afioga i Faipule e fa’atatau i le tautua a le matagaluega, e na o le 100 futu lava le mamao o le tatou fale fono ma lona ofisa e afifio atu i ai Faipule, e matala pea fo’i lona ofisa i soo se taimi e mana’omia ai o ia”.

 

E le i nofo lelei i le fa’afofoga a Toeaina le saunoaga a Vaetasi. Saunoa Toeaina e fa’apea, e moni lava e le mamao le ofisa o le Fa’atonusili o aoga mai le maota fono, ae o mataupu uma e talanoaina i totonu o le maota e auala uma atu ia te ia le Ta’ita’i Komiti o Aoga a le maota.

 

Ae i le fa’aleleia atili o tulaga i pasi aoga, na saunoa Toeaina e fa’apea, ua tatau fo’i ona oo le silasila a le malo i le fa’aaoga lea o se vaega o tupe mo Atina’e Tetele (CIP) e fa’atau ai pasi aoga.

 

“O le fa’anoanoaga tele o lo o i ai, tele isi atina’e a le malo o lo o fa’aalu i ai tupe mai le CIP, ae i lo’u taofi, e tatau ona fesiligia le Fa’atonusili o Aoga, pe le o i ai sana fuafuaga e fa’aalu se isi vaega tupe a le Matagaluega o Aoga e fa’atau mai ai pasi aoga, ina ia taofia ai le fa’afitauli o le fesili atu ae fai mai e leai se tupe”, o le saunoaga lea a Toeaina.

 

“Vaai pea lava ma le alofa i fanau aoga i le savavali i le timuga ma le mugala i aso ta’itasi i le aoga, o isi fanau e pu’e le pasi tua e malaga ai, totogi ai ma le pasese, ma alu atu ai fo’i na tupe e tatau ona fa’aaoga i isi mea aoga, ae ua fa’aalu ona ua leai ni pasi aoga a le malo e tautuaina i latou”.

 

E le i tu’u mama e le afioga i le Fofoga Fetalai ia Savali Talavou Ale le mataupu e fa’atatau i sailiga tupe o lo o fa’agasolo i totonu o aoga e faatau ai sapalai a aoga.

 

“O le itu e pito sili ona matuia ai lenei mataupu, ona o lea sa fa’aalia i totonu o le maota, o sailiga tupe o lo o faia ua aofia ai faiaoga ma fanau aoga, ae le o ni tulaga ia e tatau ona tutupu”, o le saunoaga lea a Savali.

 

“Ae foliga mai o lea ua ese le molimau sa tuuina mai i totonu o le maota, ese fo’i le molimau a le Fa’atonusili o aoga lea ua fa’aalia e le afioga i le ali’i faipule. E sili ai pe a fa’atulaga se iloiloga sei fesiligia ai le tama’ita’i fa’atonusili o aoga i le tulaga tonu o lenei mataupu”.

 

I le tulaga o pasi aoga, na taua e Savali le fa’ateia o ia ina ua toe alia’e mai fo’i le fa’afitauli i le leai o ni pasi aoga, ae o lei leva atu fo’i na taunu’u mai isi pasi aoga fou na fa’atau mai.

 

I lona talitonuga, afai o le fa’afitauli lea ua tula’i mai ua mafua ai ona leai ni pasi aoga, ona e le o i ai se tupe e fa’atau mai ai, ua tatau i le Fono ona sailiili i auala e maua ai se alagatupe e fa’atupe ai ni pasi aoga fou, ona lelei lea ma taua tulaga o lo o naunau i ai afioga i Faipule.

 

“Ua tatau ona tatou sailiili i se auala e maua mai ai se alagatupe mautu e fa’atau ai ni pasi fou, ae le aoga lo tatou pisapisao ae leai se auala e foia ai le fa’afitauli. Ae ou te talosagaina le ta’ita’i komiti o aoga a le maota e fa’atulaga se iloiloga ma le Fa’atonusili o aoga, se’i fa’amanino le eseesega o tali ua i luma o le maota e tusa ai o lenei mataupu”.

Comment Here