O lo o fa’agasolo i le taimi nei se suesuega faapitoa a le Matagaluega o Fa’atoaga a le malo, i le taumafai lea e saili le tulaga tonu ua i ai tulaga o fa’atoaga ua afaina i le malolosi o matagi mai le ‘afa o Gita lea na a’afia ai le atunu’u i le fa’aiuga o le vaiaso na te’a nei.

I se fa’atalatalanoaga ma le Fa’atonusili o le Ofisa o Fa’atoaga i le vaiaso nei, na fa’amaonia mai ai e le susuga Filifa’atali Michael Fuiava le mae’a lea ona tofia o sana vaega faapitoa e fa’atinoina lenei asiasiga.

“E to’alua vaega mai lo’u Ofisa lea ua mae’a ona tofia latou te fa’atinoina le asiasiga i le motu atoa, ona e fia iloa poo le a le aofa’i o fa’atoaga ua faaleagaina i le atunu’u. O fa’atoaga o le a asia i lenei vaiaso e aofia ai fa’atoaga tetele faapea ai ma tama’i fa’atoaga o lo o toto i tua o maota ma laoa o aiga uma o le atunu’u”, o le saunoaga lea a Filifa’atali.

“Afai ae mae’a ona faia lenei asiasiga, ona tu’u fa’atasia lea o se matou ripoti ma le fa’amoemoe e auina atu i Ta’ita’i o le malo”.

“O le a matou fesiligia fo’i Kamupani ma pisinisi tetele o lo o aumaia fualaau aina i le atunu’u, poo le a le tele o a latou sapalai o lo o i ai, ae poo i ai fo’i ni a latou sapalai o aga’i mai i se taimi o i luma, ina ia fuafua i ai le umi e mafai ona tua atu i ai le atunu’u mo le fofoga taumafa. Afai loa ae mae’a ona tu’u fa’atasia uma nei ripoti, ona tu’u aloaia atu ai loa lea o le matou ripoti faai’u i le Ofisa a le Feterale o lo o gafa ma fesoasoani mo lenei fa’alavelave (FEMA), ina ia mafai ai ona maua mai se fesoasoani mo le fofoga taumafa o le atunu’u”, o le saunoaga lea a Fuiava.

Na maua le avanoa e faatalatalanoa ai e le Samoa News ni isi o le mamalu o le aufai faatoaga i le atunu’u, i ni o latou finagalo e tusa ai o le oge lea o le a aga’i atu i ai le atunu’u, e mafua mai ina ua faaleagaina uma faatoaga e pei o fa’i, taro ma ulu i le ‘afa o Gita.

Na taua e ni isi o le aufai fa’atoaga e fa’apea, ua tatau ona amata galulue aiga o le atunu’u e toto loa le fa’i ma le taro, ina ia mafai ona tua i ai le atunu’u i le fofoga taumafai i le isi 5 i le 6 masina o lo o lumana’i nei.

E talitonu ni isi o le aufai fa’atoaga a le atunu’u, afai e le vave galulue le aufai fa’atoaga e toto ma atina’e fa’atoaga, o le a umi se taimi e feagai ai Samoa ma le oge i taumafa.

Na taua e i latou nei le oge sa feagai ma le atu Samoa ina ua tuana’i ‘afa tetele i le 1990 ia Ofa ma Valelia. O le latou talitonuga, e le tatau ona toe alia’e mai ia tulaga pagatia i lenei vaitau.

O le tele o fa’atoaga i vaega na malosi i ai le agi o le matagi ua matua faaleagaina uma i lalo. O ma’umaga, fa’i ma ulu ua toulu ma pauu i lalo.

Na taua e le ali’i faifa’atoaga ia Malaki Unuto’a i le Samoa News e faapea, afai e le vave mai se fesoasoani a le malo tele poo isi atumotu o le pasefika i le tulaga o taumafa e pei o le fa’i ma le taro, o le a umi se taimi e pagatia ai Samoa e lua i le oga ona o taumafa.