Ads by Google Ads by Google

Saili aufai fa’atoaga Samoa maketi fou e la’u i ai a latou talo


Le Faatonusili o le Ofisa o Fa’atoaga, Rev. Filifa’atali Michael Fuiava. [ata AF]
ausage@samoanews.com

O le fa’aiuga a le Fa’atonusili o le Ofisa o Fa’atoaga a Amerika Samoa e taofia ai le toe auina mai o le talo mai Samoa, talu ai ripoti i le i ai lea o le siama ua a’afia ai le talo a Samoa, na taua ai e le Minisita o Fa’atoaga a Samoa i sana tusi sa tu’uina mai i le afioga i le ali’i Fa’atonusili ia Rev. Filifa’atali Michael Fuiava, le saili e le aufai fa’atoaga a Samoa o isi maketi fou e la’u i ai la latou talo.

 

Na atagia i le tusi a le afioga i le ali’i Minisita ia La’aulialemalietoa Leuatea Polataivao Fossie Von Schmidt na tu’uina mai ia Filifa’atali lona lagona le fiafia, i le taofia lea e Amerika Samoa o le talo mai Samoa ae o lo o fa’aauau pea ona talia e isi atunu’u tetele o le lalolagi e aofia ai Amerika, Niu Sila ma Ausetalia o le talo.

 

Na taua e La’aulialemalietoa i lana tusi e fa’apea, e le mafai e fa’asalalauga i luga o upega ona fa’amatalaina le mafua’aga tonu na ala ai ona taofia le toe auina mai o le talo a Samoa i le teritori, o le mafua’aga lena o lona manatu e tusi mai, se’i fa’amanino atili ai le mafua’aga o le mataupu.

 

“O le fa’amaoniga, ona o lo o talia mai pea e le Malo tele o Amerika, Hawaii, Niu Sila, Ausetalia fa’apea le lalolagi atoa ona fa’aulufale atu le talo a Samoa. O le agaga atoa lena o le tusi na avatu, ona sa tatau ona feutaga’i Matagaluega o Fa’atoaga a Samoa e lua, e maua ai iina mea moni e fa’avae ai le fa’aiuga ua e faia e taofia ai le talo mai Samoa”, o se vaega lea o le tusi a le ali’i Minisita.

 

“E pei ona ou fai atu i la’u tusi muamua, o le a ou le aiaina lau faaiuga ona e pule lava le Sitafune i le la o ona va’a. Afai e te le fa’atauaina ma aloaia lenei itu o le galuega, ona ou manatu lea o le a fa’ataatia ai fa’apea lenei mataupu sei i ai se aso. Ua maea ona ou soalaupule ma le aufai faatoaga uma a le atunu’u sa latou tautuaina atu lena itu o le motu, o le latou fa’amatalaga, o le a saili nisi maketi fou mo a latou fua o fa’aeleeleaga”, o le fa’aiuga lea o le tusi a le ali’i Minisita.

 

I se iloiloga sa faia i luma o le maota o sui i le 2 vaiaso talu ai, lea na fesiligia ai e afioga i Faipule le ali’i Fa’atonusili i le tulaga o le talo mai Samoa, na taua ai e Rev. Filifa’atali le tumau pea o lana fa’aiuga ua mae’a ona faia, e taofia le tumau ai le toe auina mai o le talo mai Samoa, se’i vagana ua tu’uina mai se fa’amaoniga o le suega sa auina atu i Siamani, e saili ai le siama lea ua ripotia mai le a’afia ai o le talo i se vaega o Upolu.

 

Na fa’ailoa fo’i e le ali’i Fa’atonusili i luma o afioga i Faipule lona tauaaoina o se tusi mai le Minisita o Fa’atoaga a Samoa, lea o lo o talosagaina ai le toe iloilo o le fa’aiuga ua ia faia, peita’i sa manino i lana folasaga lona talitonuga o loo i ai, o lona tiute i lalo o le tulafono o le vaavaai lea i auala e puipuia ai fa’atoaga i totonu o le atunu’u.

 

Saunoa atili Rev. Filifa’atali e fa’apea, na pau le itu o lo o fa’atali ai se isi ana fa’aiuga, o le tu’uina mai lea e le Ofisa o Fa’atoaga a Samoa o se fa’amaonia i le tulaga malu puipuia o le talo o loo i ai, ona fa’atulaga loa lea o se latou malaga ma sui o lona Ofisa i Samoa.

 

E le i manuia taumafaiga a le Samoa News mo le toe fesiligia o le alii Fa’atonu i se isi tulaga ua i ai lenei mataupu i le taeao ananafi, ona o lo o malaga o ia i fafo mo ni isi o ana fonotaga.