Ripoti o le Faigamalo Tatalaga Tauaofiaga lona 35 a le Fono Faitulafono
Folasaga Kovana Lolo Matalasi Moliga
O le taeao ananafi sa potopoto ai le mamalu fa'atafatolu o le Faigamalo Fa'ateritori a Amerika Samoa i le Gov. H. Rex Lee Auditorium ina ia tatala aloa'ia tauaofiaga lona 35 a le Fono Faitulafono i ona maota e lua, Senate ma le Maota o Sui, ma o le aso atofa fo'i lea fa'aletulafono, e saunoa aloa'ia ai le Kovana Sili o fa'auluuluga o le Faigamalo a Amerika Samoa e fa'ailo le tulaga o i ai le tamaoaiga tausi o le atunu'u mai le tausaga ua tuana'i, ae maise o le gasologa i le lumana'i a le Malo ma ona tagata.
O le susuga le Fa'afeagaiga, Rev. Semo Tapaleao mai le Ekalesia Fa'apotopotoga Kerisiamo i Aoloau ma lana aufaipese sa tofia fa'apitoa e si'itia le tataloa amata ma toe fa'ai'uina le sauniga mamalu fa'atasi ai ma le fofogaina o vi'iga o le Atua e lana aufaipese siufofoga malie.
"Ina ua aofia moli i le futiafu e tasi, i le manuia mai le Atua, ua tatou iloa fo'i, e ui lava ina sousou le folauga, ae ua to'ai taunu'u mai i manu le amataga o lenei tausaga 2018. O le aotelega o mea uma na fa'atino ma lutia ai le folauga i tulaga o le tamaoaiga fa'asoasoa, o le a taumafai lea e fa'aleo, aua o mea taua nei i se folauga mai le tausaga ua tuana'i, ae maise o le taotoga o i ai ma fa'asolo atu mo le aga'i i luma."
Na saunoa lana afioga le Kovana Lolo Moliga i mea ua ia fa'ailo, o mea e taua, o ni matati'a ua ausia, ma ni mea fo'i ua le gafatia ona fa'atino e le Malo peita'i ua amatalia ae le'i mae'a.
"O le a ou fa'ailo ni matati'a ua ausia, aua o se mea lelei fo'i, ona o lea e pa'au mai le Sui i Uosigitone, Aumua Amata, aua e mana'omia lana fesoasoani i mea e le'i mae'a ona fa'atino, ae sa i ai fo'i lona sao aoga tele i taumafaiga ua a'e manumalo. O le taua lea o le galulue fa'atasi o ta'ita'i uma o le atunu'u, ia mafai ona faia ma le saogalemu galuega mo le agai i luma o lana faigamalo."
O le ulua'i matati'a ua ausia nei, "O le gafatia ona faliu o le fa'aiuga a le NOAA ina ia fa'aitiitia mai le tatou sone fagota mai le 50 maila i le na'o le 12 maila. O lea sone fagota ua fa'atulaga mo va'a laiti e le o'o le tetele i le 60futu le uumi, peita'i, ua faliu nei ma ua fa'ailo mai le finagalo fa'aalia o le Fa'amasinoga a le Feterale i Hawaii, e matua taua lava le fa'aiuga na fa'ataoto mai e augatua'a ua mavae o Amerika Samoa e fa'atautaia ai le malo fa'ateritori o Amerika Samoa mai le amataga. E ui la ina o lo'o taoto pea le fa'aiuga e fa'ato'a fa'ailo mai pe a mae'a le taimi atofaina, ae ua ataata mai ata o taulelei ona o lea avea'i ua fa'ailo mai e le Fa'amasinoga a le Malo Tele i Hawaii, lea e aumaia fo'i se i'uga."
Sa fa'ailoa mai e le Kovana, "Ona o le tutu fa'atasi o ta'ita'i i vaega e tolu o le faigamalo, ma latou soalaupule i se fa'ai'uga e faia i lea avea'i na fa'ao'o mai e le NOAA, lea ua iloga ai le malosi tele o le tatou pito la'au tau'ave, ia galulue fa'atasi ma tutu fa'atasi e mautu ma manuia ai se mataupu e tau fa'ailo ma tauanauina se suiga lelei. Sa nofo tatalo tagata uma, aua o le tatou tamaoaiga tele lea e tausia ai lo tatou lotoifale e ala mai i faigafaiva i le tatou gataifale."
Lona lua o matati'a ua ausia, sa ia fa'atepa ai le pa'ia na sasao, na taimi na fa'ailo ai le sala a le Kamupani I'a ma sa a'afia ai le tamaoaiga tausi i le to'atele o aiga o si tatou atunu'u. Fai le vaega a le tatou malo i ona ta'ita'i fa'apea ma le mamalu o tagata lautele, ae maise le tatou Sui i le Konekeresi, lea ua tatou a'ea'eina se manuia ua toina ese mo le tatou malo ma ona tagata sa a'afia. Lea fo'i sa faia le vaega a le Malo saili nisi ala e fesaosoani ai i le to'atele e le o faigaluega, saili avanoa faigaluega i fafo, lea ua mae'a malaga atu nisi o le atunu'u e tausaili ai tamaoaiga tausi mo latou aiga i na avanoa faigaluega i kamupani tetele i fafo."
"O se manuia lea ua tatou maua, ae fa'afetai e le o manatu lava le Kamupani I'a lea e tula'i ese atu.
O le galulue fa'atasi fo'i le vaega a le Loia Sili ma lana aufaigaluega ma Aumua Amata le tatou sui i le Konekeresi ua mafai ai ona ausia lena manuia, fa'afetai."
Matati'a lona tolu na saunoa i ai le Kovana, "Tulaga o le Faletupe a le tatou Malo, ma se numera mo ana galuega feso'ota'i ma isi faletupe ma pisinisi tau fefa'ataua'iga ma isi malo uma. E ui ina le galulue fa'atasi uma tagata i lenei poloketi, ae sa matua finau malosi i latou na avea ma sui mo lea galuega ina ia tu ma fa'atautaia sa'o ia maua le numera lenei. O tama sa tutula'i mai e faia lenei galuega, fa'afetai i lo outou finau i mea e lelei ai le malo ma ona tagata. Lea ua ausia lena matati'a ma e fa'aauau ai pea ona taumafai atili e fa'aleleia atoatoa mea uma. O le taua lava lea o le galulue fa'atasi o le fono faitulafono ma le faigamalo e mafai ai ona ausia tulaga fa'apenei, aua ana le tali le fono, e fa'apenei lava e le mafai ona maua se numera lea sa taumafai i ai mo le faletupe. Aua e moni lava, e fesuia'i aso ma tausaga ae tumau lava faiva e tautua ai le malo."
I lana folasaga tau galuega fa'atino i le tausaga 2017, sa fa'ailoa ai e Kovana Lolo Moliga, "O se tausaga pito i faigata lea i le folauga a le tatou faigamalo. O le tausaga 2013 lelei tupe a le Malo, tausaga 2014 aitalafu le malo, 2015 lelei tupe a le malo, 2016 tulaga lelei pea tupe a le Malo, lea ua a'e manumalo le 2017 e ui i le faigata."
"O poloketi fa'ata'ita'ia a le ASPA lea ua faia nei i le Eletise i Manu'a, lea ua amata nei ona tula'i mai o le a fa'aauau ma e aoga tele lea i le Manu'atele ma le mamao o i ai. Tausaga e 2015, tapunia mai le Samoa Tuna ma fa'apena fo'i ona leai ai ma ni galuega a le to'a 800+ tagata sa faigaluega ai, ae maise fo'i o tautua feso'ota'i ma isi pisinisi tumaoti sa latou fa'aaogaina, ua motusia ma atili ai ona a'afia le tamaoa'iga tausi o le tatou malo i le silia ma le $6miliona."
"Ia Ianuari 2016, suia mai le faigamalo a le Iunaite Setete ma ua a'afia ai le tele o aiaiga o tupe e toina mai mo le tatou teritori. Mo se fa'ata'ita'iga o le vaega tupe mo le TAOA lea fefinaua'i e o'o mai i le taimi nei. Ua fesuia'i ta'ita'i o na vaega i le Malo tele, ae a'afia ai fo'i ma i tatou i le fa'atautaiga o le polokalama i le tatou nei malo. A le seti mai lava fafo, ua fa'apena ona le mautu ai ma alamanuia mo i tatou iinei."
I le toega o lana lea folasaga tau le tamaoaiga sa ia fa'ailoa ai, "E ui ina lutaluta le tai o le folauga i le 2017, ae ua o'o ane i lona fa'ai'uga ua uliuli mai, ua le mumu. E tusa lava pe le atoa se $100,000. lea e uliuli ai, ae o le mea sili o lea ua tele aitalafu lea ua mae'a totogia, ma ua uliuli mai le vaitusi ua se'ei ai."
"O le a se fuafuaga o le aga'i i luma o le tatou malo?
O lo'o ua galulue nei le malo e sapaia le Hawaiki Cable e pei ona finagalo i ai le ASTCA aua pea afai e va'ai toto'a atu i ai e aoga lea so'otaga ina ia fa'aleleia atili ai le tautua tau feso'ota'iga i le atunu'u.
I le tulaga fo'i o le tatou falema'i ma le tautua lautele mo le soifua maloloina, ua talia nei le auina atu o tatou tagata mo togafitiga o latou gasegase i Niu Sila. E taugofie ma e lelei tele fo'i le latoo togafitiga o tatou gasegase, e matua le fesiligia lava. Ua mae'a pasia uma nei mea, ae sa fa'afaigata aua e ao fo'i ina mua'i pasia mai fa'ato'a fa'alauiloa atu ai lea o nei suiga lelei. Peita'i o se tasi lea o ala ua fa'aitiitia ai le tupe fa'aalu, aua e taugata tele pili mai falema'i ma talavai i setete eseese o Amerika pe a fa'atusa atu i talavai totogi i Niu Sila."
"I le tulaga o le sala a le Star Kist lea e totogia, o lea vaega tupe sa tatau lava ona ta'i 50% mo Amerika Samoa 50% mo le malo tele, aua o i tatou tonu lava lea e ona le ogasami lea e talanoaina ma ta'usala ai le Star Kist. O lo'o galulue pea i ai le Ofisa o le Loia Sili pe tua ma ni a lena finauga."
"O le tulaga fo'i tau le totogi maulalo e ao ina fa'amalosia iinei, e ta'utino atu, e matua tatou le gafatia lava ona totogia lena totogi maulalo. Ae maise fo'i o le Kamupani I'a e i'u ai ina tula'i ese atu, ma le toe i ai loa ni galuega mo le 3,000 o tagata faigaluega ae maise o Pisinisi o lo'o feso'ota'i a latou tautua ma le Kamupani I'a. E ao ia i tatou uma ona saili nisi ala fou e mafai ai ona tatou tapena, ma tatou le afaina tele i nei omiga pe afai ae tutupu mai."
"E moni tatou te tatalo, ae fiu e tatalo, ae a le galulue fa'atasi lava i ai, e le mafai ona fua mai ni mea lelei. Sa ia fa'alauiloa mai le mae'a lelei o le "All Purpose Building" a le Kolisi i le aso. Ua vala'aulia uma ai fa'atasi ta'ita'i o le Malo ia auai. O lea fo'i se galuega ua atoa ai le taumafaiga ina ia pasia le agava'a o le Kolisi Tu'ufa'atasi o Amerika Samoa.
E tusa lava po'o le a le tau faasoasoa o le tupe maua a le Malo, ae taumafai lava ia fa'atutu falea'oga fou, ia si'itia le atamamai o faia'oga e a'oa'o ai le fanau a le atunu'u, ma ia fa'aleleia fale e fa'aaogaina mo a'oa'oga a le fanau. Ua le gata i le Kolisi Tu'ufa'atasi ae ua galueaina fo'i falea'oga i A'oga Maualuluga, fa'apea ma falea'oga fo'i i A'oga tulaga muamua."
Ua fa'alauiloa mai fo'i se aso o lenei vaiaso po'o le vaiaso a sau, e tatala aloa'ia ai le Uafu Fou i le Taulaga, lea e tusa ma le $10miliona lona tau aofa'i. E tele galuega o lo'o fia faia mo Uafu, peita'i e fa'asolosolo lava. O le Malae va'alele toeititi mae'a le galuega o lo'o fa'agasolo mo ona ala sese'e ai va'alele. Ae ua mae'a le fesuia'iga o tulaga ma nofoaga e fa'atutu a Tane Suau'u."
"O alatele fo'i o lo ua mae'a ona totogia uma aitalafu sa nofo aitalafu ai le Malo i le McConnell Dowell. Sa faia se maliliega ma lea kamupani fai auala ina ia latou faia auala ae tatalia le avatuga o le totogi se'ia gafatia e le Malo. Lea ua mae'a nisi o vaega o le alatele ma ua mae'a totogia fo'i la pili uma a le Malo i lea kamupani.
Peita'i o le a fa'aauau atu i le alatele i Taputimu ma Vailoa ae maise o Malaeloa. Atonu o le a le fausia se auala mautu, ae o le a fa'aleleia mo feoa'iga mo se vaitaimi seia toe toina mai fo'i se vaega tupe mo alatele mai le Fedeal Highway.
Tulaga o taligalu, lea ua va'aia ua amatalia galuega fa'aleleia o taligalu i le afio'aga o Taputimu ma Vailoa, afai o le a mae'a nei taligalu e fa'asolo mai i isi vaega o le atunu'u ua mae'a maitauina o lo'o i ai se afaina tele ona o le si'isi'i o le maualuga o le suasami ma le malolosi o galu."
"I le vaega o le Puipuiga Malu o le Malo ma le soifua o ona tagata, ua galulue a'ia'i i ai le afioga le Komesina o Leoleo ma lana matagaluega, ae maise le Puipuiga o le Saogalemu Fa'alotoifale o le atunu'u i le latou fo'i fa'atonusili ma le aufaigaluega. Ia utagia mai le tauamafaiga o lo'o fa'atautaia nei, ina ia mautinoa o lo'o saogalemu tagata uma mai a'afiaga o fuala'au o'ona ma vaila'au fa'asaina."
"O le Matagaluega o Paka ma Malae Ta'alo ua ou tofia ai Ken Tupua e tou te filifili i ai i lona agava'a peita'i o ia lea sa avea ma Sui Fa'atonu i le susuga Pili Gaoteote lea ua fa'amavae mai ai.
O le Matagaluega o Alamanuia mo Tagata Lautele lea sa tutula'i ai le tofa Taeaoafua Dr Meki Solomona ua maliu nei, o lo'o ua ou tofia fo'i John Suisala e avea ma fa'atonusili o lea matagaluega. O Suisala fo'i sa avea ma sui fa'atonu i lea lava matagaluega."
"O lo ua aofia i la outou lipoti ua taua'aina nei, le aiaiga o tulafono tau tupe ua taumafai mai le malo e fa'aulu atu mo a outou iloiloga i lenei tauaofiaga mamalu a le fono faitulafono.
Peita'i o se mea e ao ina tima'ia ai i tatou uma i lo tatou vaitau o le soifuaga, e ao ina tatou va'ai toto'a i le aiaiga o lo tatou va tu'inonofo ai ma le Malo Tele. Ua tatou uia lea ala fita i le taumafaiga e toe soloia le fa'atonuga mai le NOAA, lea ua tatou tau fai finaua lea mataupu ina ia toe tepa ai ma taumafai ai se tatou fa'avae mautu.
Peita'i le mamalu o le tatou faigamalo i ona ta'ita'i i ona vaega e tolu, e ui lava ina tatou taumafai i le mea suili e tautua ai ma faia ni galuega tau atina'e o le tatou malo, ae leai lava se galuega ma se taumafaiga e atoatoa. A le atoa fo'i se galuega, tau ina ia fa'aatoa e le Atua mo i tatou."