Ads by Google Ads by Google

Popole to’atele o tagata faigaluega i le umi malologa Kamupani i’a


Tagata faigaluega a le StarKist Samoa i le latou savali o le fu’a i le 2015. [ata AF]
ausage@samoanews.com

Ua fa’aalia lagona popole ma le le mautonu o le to’atele o tagata faigaluega a le kamupani i’a a le StarKist Samoa, ona o le fa’aliuga mai le Pulega e malolo le tumau ai galuega mo le 5 vaiaso, ona o galuega o loo moomia le toe fa’aleleia i vaega e fa’atino ai galuega.

 

Na taua e ni isi o tagata faigaluega i le Samoa News o latou popolega, i le aafia atu ai ma tapenapeaga a aiga i le fa’aiuga o le tausaga, ona o le a umi se taimi e malolo ia le kamupani e leai ni galuega.

 

Na taua e se tasi o tagata faigaluega sinia a le kamupani e fa’apea, o suiga faafuase’i e pei ona alia’e mai i le kamupani i lenei tausaga, i le leua ane lava ma malolo, ua tutupu ai lagona popole ina ne’i alia’e mai se fa’aletonu i le tautua a le kamupani i le lumana’i, ona avea lea ma itu e le toe maua ai ni galuega mo se vaega to’atele o le atunu’u.

 

“E le i mamao atu fo’i tulaga pagatia na feagai ma tagata faigaluega ina ua malolo le kamupani i le vaiaso atoa, ma le mafai ai ona maua ni siaki e tausi ai aiga, a o lea fo’i ua toe sauni atu mo lenei malologa umi. Talosia e le o i ai fo’i se isi malologa umi i luma atu pe a mae’a lenei malologa,” o le saunoaga lea a se tasi o tagata faigaluega.

 

O tulaga le manuia i le malologa e pei ona alo atu i ai le kamupani i le masina fou, o le a’afia atu ai lea ma aiga o lo o fa’alagolago le tupe maua i galuega a le kamupani, e pei ona taua e se tasi o Tama mai Vaitogi.

 

“Ma te galulue uma ma lo’u to’alua i le kamupani, ae tutupu la faafitauli fa’apenei, e tele le a’afiaga o le ma aiga. Pau lea o le auala o lo o maua ai le tupe e tausi ai le ma fanau e to’a 4, o totogi o lo o maua mai i le kamupani,” o le saunoaga lea a se tasi o Tama.

 

O le vaiaso nei na fa’amaonia mai ai e le Pulega a le kamupani i’a o le StarKist Samoa le fa’aiuga e tapunia ai lana auauaga mo le 5 vaiaso, amata mai i le aso 21 Oketopa e oo atu i ile aso 26 Novema o le tausaga nei.

 

O lea fa’aiuga e tapunia le tumau ai le tautua a le kamupani, ona o ni galuega e fia fa’aleleia i totonu o fale o lo o gaosi ai apa taumafa a le kamupani.

 

Na taua e le kamupani i se pepa o fa’amatalaga lo latou talitonuga o lo o i ai, i le a’afia o nai tagata faigaluega, o le atunu’u, le malo ma pisinisi ona o lenei fa’aiuga. Ae i latou talitonuga, o le fa’aiuga pito sili lea na lelei ma mautu e tatau ona faia, e fesoasoani ai i le toe fa’aleleia o masini ma vaega o loo moomia le toe fa’afou, ina ia tulaga lelei ai pea le auaunaga a le kamupani i le atunu’u ma le malo.

 

Na taua e le Pulega a le Kamupani le mae’a lea ona latou fesootai ma le afioga i le ali’i Kovana ia Lolo M. Moliga e tusa ai o lenei fa’aiuga, ma ua lagolagoina fo’i e le ta’ita’i o le atunu’u ma le agaga fiafia.

 

O le aso 27 Novema lea ua fa’amoemoe e toe tatala aloaia ai galuega masani a le StarKist Samoa.

 

Na taua e ni isi o tagata faigaluega e fa’apea, o popolega o lo o i ai, afai ae fa’aauau pea malologa masani a le kamupani i fa’aiuga o tausaga, lona uiga e na o le 3 vaiaso e toe a’e ai galuega ae toe malolo fo’i mo aso malolo o le kerisimasi ma le tausaga fou, ma atili ai lava ona le lava se tupe e fesoasoani ai i le tausiga o aiga.