Ads by Google Ads by Google

Polokalame Ofisa o Aoga foia ai fa’afitauli fualaau faasaina i aoga


Fa’atonusili o le Ofisa o Aoga a le malo, Dr. Ruth Matagi-Tofiga. [ata AF]
ausage@samoanews.com

Ua fa’agasolo nei e le Matagaluega o Aoga a le malo se polokalame mautu, e fesoasoani ai i le taumafaiga e fofo le fa’afitauli o fualaau fa’asaina ua ulufale atu i totonu o aoga ma a’afia ai fanau aoga.

 

I le iloiloga sa faia a le Komiti o le Saogalemu Lautele a le maota o sui i le vaiaso nei, e talanoaina ai le pili a le Senate e toe teuteu ai le fa’aupuina o fa’asalaga mo i latou e fa’amaonia i le umia o fualaau fa’asaina, na fesiligia ai e Faipule le Fa’atonusili o Aoga, i ni auala ua faia e foia ai le fa’afitauli i fualaau fa’asaina.

 

O le to’atele o afioga i Faipule na maua le avanoa fesiligia ai molimau a le malo, le tama’ita’i Fa’atonusili ia Dr. Ruth Matagi-Tofiga, ma le Komesina o Leoleo ia Le’i Sonny Thompson, sa taua ai lo latou fia malamalama i se gaioiga a le Ofisa o Aoga ua faia e foia ai lenei fa’afitauli.

 

Saunoa Matagi-Tofiga e fa’apea, talu mai le fa’alavelave lea na aafia ai fanau aoga i fualaau fa’asaina i se tasi o aoga, ua matua mataalia ai le Ofisa o Aoga i le taumafai lea e saili auala e foia ai le toe tula’i mai o lenei fa’afitauli.

 

O polokalame eseese ua faia e aofia ai le aoaoina o faiaoga ina ia latou malamalama i gagana ma gaioiga e fa’aaoga e fanau aoga, aemaise lava i latou o lo o tau masalomia le a’afia i tulaga nei, ina ia vave ona maua ma faia loa i ai se galuega e pei o le fesootai atu i ai, logoina o matua poo le fa’afesootai o le Ofisa o Leoleo.

 

Sa ia taua fo’i le faia e ni isi o aoga o polokalame e mafuta faatasi ai fanau aoga, faiaoga ma matua, ina ia mafai ai ona mafana le sootaga i le va o faiaoga ma matua, ma mafai ai ona fa’aauau pea lea sootaga i se tulaga e le mafai ai ona toe motusia - ae maua ai le avanoa e fetufaa’i ai i manaoga o fanau aoga i soo se taimi e tula’i mai ai.

 

Na fa’afetaia e Matagi-Tofiga le polokalame e pei ona fa’atula’i e le Kovana, lea fo’i o lo o lagolagosua e le Komesina o Leoleo, e pei ona galulue fa’atasi ai le malo, Ofisa o Mataupu Tau Samoa, Ekalesia ma afioaga eseese, i le taumafai lea e saili auala e fa’aitiitia ai le a’afia o fanau i fualaau fa’asaina.

 

Na taua e le afioga i le ali’i faipule ia Veevalu Meauta Lauoi Mageo i luma o le Komiti e fa’apea, o se tasi lenei o mataupu ua ofo mai ai le fesoasoani a le Komesina o Leoleo, o le auina atu lea o ali’i ma tama’ita’i Leoleo e siaki aoga eseese i le atunu’u, ina ia mautinoa e le o toe afea e i latou o lo o masalomia i le tuleiina o fulaau fa’asaina.

 

Na fa’afetaia e Veevalu le tofa Le’i Sonny Thompson, i le vave o le tali atu a Leoleo i se fa’alavelave na tula’i mai i le aoga maualuga a Samoana i le vaiaso na te’a nei, ina ua masalomia e le Puleaoga se ta’avale na aga’i atu i totonu o le lotoa, ma tau masalomia ai le taumafai o lea tagata e tufa atu fualaau fa’asaina i fanau aoga.

 

Na vave ona taunu’u Leoleo ma mafai ai ona foia lea fa’afitauli. Ua le toe vaaia fo’i le ta’avale lea i totonu o le lotoa a le aoga.

 

Saunoa le afioga i le ali’i faipule ia Timusa Tini Lam Yuen e fa’apea, e taua tele le tatau lea i le ofisa o aoga ona mataalia i le puipuia o fanau aoga mai le a’afia i lenei fa’afitauli, ona o lea ua molimauina le sosolo fa’aafi i soo se aoga.

 

Sa ia fia iloa fo’i pe ua i ai ni tagata ua taofia e Leoleo ona o le umia o fualaau fa’asaina, aemaise ai lava le taumafai e tufa atu i fanau aoga.

 

Saunoa Le’i e fa’apea, ua i ai tagata ua molia e le malo talu ona fa’avae le Vaega Faapitoa a Leoleo e sailia fualaau fa’asaina, peita’i e le o muta ai lava le fa’aauauina o le latou tautua, ina ia mautinoa e le toe vaaia ni fualaau fa’asaina i totonu o le atunu’u.