Polokalame fa’apitoa mo Fanau aoga uma i totonu o le atunu’u


Susuga i Faiaoga ma fanau aoga mai le ECE a Siliaga i le latou ata ma le Faletua o le Kovana ia Cynthia Moliga i le taimi o le Field Trip a le fanau i le vaiaso nei i luga o le maota o le malo i le Maugaoali’i. [ata AF]
ausage@samoanews.com

O le taumafai ina ia malamalama fanau aoga i mataupu eseese o lo o aoaoina ai i latou i totonu o potu aoga, o le autu lea o se mafutaga fa’apitoa ua fa’amoemoe e fa’ataunu’uina i le taeao o le aso To’onai o le vaiaso nei, i le itula e 8:00 i le maota o le Lee Auditorium i Utulei, lea o le a feiloa’i ai fanau aoga ma faiaoga fa’apitoa ua i ai le tomai i le a’oa’oina o mataupu eseese

 

O le polokalame fa’apotia lenei mo fanau aoga o loo tu’u fa’atasia e le matagaluega eseeese a le Ofisa o Aoga o loo aoaoina mataupu e aofia ai le Science Technology Engineering Mathematics i Amerika Samoa (The American Samoa STEM), lea o le a fai paaga fa’atasi ma le Matagaluega o Aoga a le malo fa’apea ai le Puleaga o le Eletiese a le Suavai (ASPA).

 

O le autu o lenei polokalame e pei ona taua e le Fa’atonusili o Aoga a le malo i luma o le fonotaga a le Kovana ma lana Kapeneta i le vaiaso nei, o le taumafai lea e sailiili i auala e si’itia ai le iloa o fanau aoga i mataupu o loo aoaoina ai i latou i tulaga o Fefa’atauaiga, aemaise lava i fanau o le a ulufale atu i Kolisi tetele.

 

“O le taua o lenei polokalame o le a mafai ai ona maua le avanoa o fanau aoga latou te feiloa’i ma fetufaa’i ai ma faiaoga ua lava lo latou tomai i auala e a’oa’oina ai mataupu o loo fia malamalama atili i ai fanau aoga”, o le saunoaga lea a Dr. Ruth Matagi-Tofiga.

 

O fanau aoga e agava’a i lenei polokalame e aofia ai fanau aoga mai le K-5 e oo atu lava i le Vasega 12.

 

“O se avanoa lelei lenei o le a mafai ai e fanau aoga ona fesili ma malamalama i soo se vaega o mataupu o loo aoaoina i totonu o potu aoga, e le gata mo mataupu o loo aoaoina i totonu o aoga i le atunu’u ae fa’apea fo’i ma mataupu o lo o a’oa’oina i aoga i fafo, lea o lo o to’atele fanau aoga mai Amerika Samoa o lo o autova’a atu i ai”, o le saunoaga lea a le Fa’atonusili o Aoga.

 

Na taua e le afioga i le ali’i kovana ia Lolo Matalasi Moliga le taua tele o polokalame fa’ataoto a le Ofisa o Aoga, lea o loo maua ai le avanoa e fesoasoani ai i le a’oa’oina o fanau aoga a le atunu’u ina ia atamamai i latou ma manuia taunuuga o latou olaga.

 

“O le fatu atoa lea o le lumana’i o aiga ma le malo, o le aoaoina lea o fanau ina ia i’u manuia mai i aoga ma maua galuega lelei e aoaoina ai, e fa’afetaia ai le Faatonusili ma le Ofisa o Aoga ona o nei polokalame eseese ua fa’ataoto mo le manuia o lumana’i o fanau aoga”, o le saunoaga lea a le ali’i kovana.

Comment Here