E 10 vaiaso le umi o se polokalame ua tatalaina e le malo, tauala atu i le tautua a le Matagaluega o Tupulaga Talavou, Tina ma Tama’ita’i, e a’oa’oina ai tupulaga talavou ina ia lava tapena i latou i le ulufale atu e avea ma tagata faigaluega mo le malo ma pisinisi tua.

E silia i le to’a 60 ali’i ma tama’ita’i talavou na auai i le polokalame na tatalaina i le amataga o le vaiaso nei, i le nofoaga autu o Tupulaga Talavou i Pago Pago.

O le afioga i le kovana ia Lolo Matalasi Moliga ma le lutena kovana ia Lemanu Peleti Mauga na auai i le tatalaina o lenei polokalame, lea o lo o fa’atupeina e le Matagaluega o le Atina’e ma le Tamaoaiga a le malo (DOC).

O le Sui Fa’atonusili o le Ofisa o Tupulaga Talavou, afioga Vaafusuaga R. Ausage na saunoa i le tatalaina o le polokalame, ma ia taua ai le ave o le fa’amuamua a le faigamalo a Lolo ma Lemanu i le sailia lea o auala e fesoasoani ai i le atina’eina o tupulaga talavou i le atunu’u.

Na taua e le afioga i le ali’i Kovana i lana saunoaga autu e faapea, e mafua ona naunau le malo e fa’atulaga polokalame mo tupulaga talavou, ona e talitonu le malo, o tupulaga talavou e fa’amoemoe i ai le lumana’i o le malo, le atunu’u ma aiga.

“Afai e le manuia tupulaga talavou, e fesiligia fo’i le lumana’i manuia o se malo ma se aiga. E tatau ona fa’atino e le malo auala eseese uma e fesoasoani ai i le atina’eina o tupulaga talavou, e ala i aoaoga ma galuega,” o se vaega lea o le saunoaga a le ali’i kovana.

Sa ia fautuaina tupulaga ua mae’a ona lesitalaina mo le polokalame ina ia fa’aaoga tatau le taimi, ina ia aoaoina ai le metotia fou e avea ai i latou ma tagata faiglauega manuia mo le lumana’i.

Sa ia taua atili lona fa’anoanoa i se ripoti sa tuuina mai i le Matagaluega o Tagata Faigaluega a le malo, e fa’atatau i le tele o tusi talosaga mo galuega fou o lo o taofia i le taimi nei, e mafua mai i le leai o ni avanoa faigaluega o tatalaina e le malo. Ae o le tele o nei tusi talosaga e pito toatele ai lava tusi talosaga mai tupulaga talavou e i le va o le 18 tausaga e oo atu i le 35 tausaga le matutua.

Saunoa Lolo e fa’apea, o lo o naunau pea le malo ina ia atiae tupulaga ina ia maua galuega e fesoasoani ai i le malo i le lumana’i.

O le polokalame e pei ona tatalaina nei, o le a aoaoina ai fanau i auala eseese e avea ai ma tagata faigaluega. O ni isi o avanoa o le a latou maua, o le asiasi lea i matagaluega eseese a le malo, ma vaavaai i auala e fa’atino ai galuega i le ofisa. Afai ae mae’a le polokalame ae filifilia ni isi o i latou nei e galulue tumau mo le malo, ua fautuaina i latou e le Kovana ina ia fa’aaoga tatau le avanoa o le a tuuina atu mo i latou.

Na lagolagoina e Lemanu le saunoaga a le ali’i Kovana, ma ia fautuaina ai tupulaga ina ia avea le avanoa ua latou maua o se taimi e fa’atauaina mo latou olaga, e aoao ai mea aoga ma lelei mo le lumana’i.