Poloaiga Kovana suiga Ofisa vaavaaia tupe mai le Feterale


[ata: archive]
ausage@samoanews.com

O le vaiaso na te’a nei na sainia ai e le afioga i le ali’i kovana ia Lolo Matalasi Moliga sana poloaiga fa’alaua’itele, e tofia ai le susuga ia Arona Maiava e fa’auluulu i ai le Ofisa e vaavaaia tupe fesoasoani mai le Feterale, le Ofisa sa fa’auluulu i ai le susuga ia Jerome Ierome.

 

Na taua e Lolo i lana poloaiga fa’alaua’itele lea ua tufatufa atu i Fa’atonusili ma Fa’auluuluga o Matagaluega ma Ofisa eseese a le malo, e fa’apea, talu ai o nai suiga laiti ua faia i ni isi o Ofisa a le malo, lea ua tofia ai Ierome na te vaaia le Ofisa e gafa ma Atina’e tetele a le malo (Capital Improvement Projects and Special Program), ua ia manatu ai loa e tofia Maiava e fa’auluulu i ai le Ofisa e vaavaaia tupe fesoasoani mai le feterale mo Amerika Samoa (Office of Grant Oversight and Accountability).

 

O le a galulue fa’atasi fo’i Ierome ma Maiava i le Vaega Fa’apitoa e vaavaaia auala e taofia ai le tula’i mai o tulaga fa’aletonu i tupe fesoasoani mai le feterale.

 

I le poloaiga a le kovana e fa’avae ai le Ofisa e vaavaaia tulaga o tupe fesoasoani mai le feterale i totonu o le Ofisa o le Kovana, na fa’avae mai lea i le fa’anaunautaiga ina ia tulaga lelei pea le fa’asoasoaina o tupe fesoasoani mai le feterale, lea o loo fa’amatu’u mai e fa’atupe ai atina’e ma galuega tetele i Amerika Samoa.

 

O se tasi o tiute tauave o lenei ofisa o le vaavaaia lea atoa ai ma le puleaina o fa’amatalaga e fa’atatau i le fa’aaogaina o tupe feterale, ina ia taofia ai le toe tula’i mai o tulaga fa’afitauli e pei ona maitauina i tausaga ua mavae.

 

E pei ona taua e le ali’i kovana i lana poloaiga, e matua manaomia lava e Amerika Samoa le toe iloiloina o tulaga uma e fa’amalosia ai lona tamaoaiga.

 

Ae talu ai o le tulaga malosi o loo iai puipuiga a le malo tele i le fa’aaogaina o tupe fesoasoani o loo fa’amatu’u mai i teritori ma setete e aofia ai ma Amerika Samoa, e tatau ai ona fa’avaeina lenei Ofisa latou te vaavaai i auala e fa’aleleia atili ai le tautua a le malo i le fa’aaogaina o tupe fesoasoani mai fafo.

 

O le a matai fo’i e le Ofisa lenei ona tu’u fa’atasia fa’amatalaga mai Ofisa eseese a le malo o loo fa’atupe a latou tautua i tupe mai fafo, ina ia mautinoa e laina tutusa uma ofisa taitasi a le malo i tulaga o tupe fesoasoani mai fafo.

 

Na taua e le afioga i le ali’i kovana ia Lolo i le fonotaga a le kapeneta i le amataga o le masina lenei o Aperila, e tatau i Fa’atonusili o Ofisa uma a le malo o loo maua mai a latou tupe mai le feterale ona galulue soosoo tauau a latou tagata faigaluega ma le Ofisa lenei, ina ia mautinoa e le toe tula’i mai tulaga faaletonu e pei ona maitauina i tausaga ua mavae, o le taofia lea o le fa’amatuu mai o tupe fesoasoani ona o le fa’amatala i le tu’uina atu o fa’amatalaga.

 

O lenei poloaiga na aloaia lava e le kovana i le taimi na sainia ma tu’uina mai ai, ma ua amata nei le tautua a lenei Ofisa se’i vagana ua toe tu’uina mai se isi poloaiga mai le kovana e toe fa’aleaogaina ai lenei Ofisa.

Comment Here