Ads by Google Ads by Google

Poloa’i le Pule Ofisa o Femalagaaiga ina ia oo atu i luma Fa’amasinoga


[ata: foa'i]
ausage@samoanews.com

O le vaiaso na te’a nei na sainia ai e le afioga i le ali’i Fa’amasino ia Elvis P. Patea sana poloaiga, e fa’atonu ai le Pulesili o le Ofisa o Femalagaaiga ina ia o o atu i luma o le Fa’amasinoga, e fa’ailoa ai fa’amaumauga uma e fa’atatau i se tagatanu’u o Fiti ua ta’usala i moliaga mamafa o le talepe fale i le tulaga lua.

 

O le vaiaso na te’a nei na fa’atulaga e lau ai le fa’asalaga a le ali’i o Rusiate Tabete, ae talu ai e le i maua uma e le Fa’amasinoga fa’amatalaga e fa’atatau i lona aumai ai i Amerika Samoa, o le mafua’aga lea ua toe tolopo ai loa lenei mataupu.

 

O Tabete, 27 tausaga le matua, na ta’usala e le fa’amasinoga i le masina na te’a nei i moliaga mamafa e 3 o le talepe fale i le tulaga lua, i lalo o se maliliega sa latou sainia ma le malo. I le talia ai e le fa’amasinoga o le tali ioe a le ua molia, na solofua ai loa moliaga e 3 o le gaoi sa totoe ai i le pepa o le tagi sa fa’aulu e le malo fa’asaga ia te ia.

 

I le tali ioe ai o Tabete i moliaga e pei ona ta’usala ai o ia, sa ia ta’utino ai e fa’apea, i se taimi o le aso 11 Novema 2017 i Tafuna, sa ia ulufale fa’amalosi ai i totonu o se faleoloa, ma ave fa’agaoi ni oloa sa i ai e silia ma le $100 lo latou tau a’ofa’i.

 

Ina ua valaau le mataupu a Tabete i le vaiaso na te’a nei, na taua ai e le afioga i le ali’i Fa’amasino ia Patea lona lagona fa’anoanoa, i le le mafai lea e le Ofisa o Femalagaaiga ona galulue fa’atasi ma le Ofisa Fa’anofovaavaaia i le fa’asoaina o fa’amatalaga e fa’atatau i le taimi na ulufale mai ai Tabete i le atunu’u.

 

E tusa ai o fa’amatalaga na tuuina atu e le Ofisa o Femalagaaiga i le Ofisa Faanofovaavaaia, o Tabete na ulufale mai i le tausaga e 2015 o se ali’i fagota i luga o se va’a fagota, ma aumai ai lava i le atunu’u seia oo mai i le taimi na pu’e fa’apagota ai o ia i le tausaga na te’a nei.

 

O lana sponsor o le kamupani a le Manuia Fisheries.

 

Na taua i le ripoti a le Ofisa Fa’anofovaavaaia e fa’apea, ina ua asiasi i le Ofisa o Femalagaaiga mo le tau sailia mai o fa’amatalaga e uiga ia Tabete, sa fa’ailoa ane e se ali’i faigaluega a le Ofisa o Femalagaaiga ia te ia, latou te le iloa le aso na fa’atulaga e toe fo’i ese atu ai le ua molia i lona atunu’u.

 

Sa fa’atonuina fo’i e le Ofisa o Femalagaaiga le sui o le Ofisa Fa’anofovaavaaia e alu e saili i luga o le ‘google’ ni isi fa’amatalaga fa’aopoopo faasaga ia Tabete pe afai e mana’o i ai.

 

Na fiu le sui o le Ofisa Faanofovaavaaia e saili fa’amaumauga e fa’atatau ia Tabete i luga o le ‘google’ e le i maua ai.

 

Na fesili Patea i le sui o le Ofisa Faanofovaavaaia poo ai Manuia Fisheries, na tali le sui o le Ofisa Faanofovaavaaia na te le iloa, se’i vagana ai le Ofisa o Femalagaaiga e mafai ona latou taliina lea fesili.

 

“E foliga mai la e le o naunau le Ofisa o Femalagaaiga e galulue fa’atasi ma le Fa’amasinoga”, o le saunoaga lea a Patea ina ua valaau le mataupu a Tabete i le vaiaso na te’a nei.

 

“O le a toe tolopo le mataupu a Tabete seia aulia le aso 2 Me i le itula e 8:30, ae o le a tuuina atu le poloaiga a le fa’amasinoga e fa’atonu ai le Pulesili o le Ofisa o Femalagaaiga, ina ia o o mai i luma o le fa’amasinoga ma aumai fa’amaumauga e fa’atatau ia Tabele ma lona aumau ai i Amerika Samoa. E fia iloa e le fa’amasinoga po o ai Manuia Fisheries, o le a le aso e toe fo’i ese ai o ia ma le atunu’u, ae aisea fo’i na umi ai ona nofo o ia i Amerika Samoa”.

 

Ua toe taofia nei i le toese i Tafuna ia Tabete ina ua le mafai ona totogi lana $10,000 na fa’atulaga e tatala ai o ia i tua, e fa’atali ai le aso lea ua fa’atulaga e toe valaau ai lana mataupu.

 

E le o se taimi muamua lenei ua tuuina atu ai poloaiga a le fa’amasinoga i le Pulesili o le Ofisa o Femalagaaiga e oo atu ai i le fa’amasinoga.

 

O ni isi o mataupu na poloaina ai fo’i le afioga a Peseta Dennis Fuimaono e oo atu ai i luma o le fa’amasinoga, o le mataupu fa’asaga ia Pelenato Maiava atoa ai ma le mataupu a Joeita Fa’aaliga.

 

O le toe ulufale mai ai o le ali’i o Maiava i le atunu’u e ui o lo o taoto le poloaiga a le fa’amasinoga e fa’asa ai ona toe ulufale mai mo le umi e 7 tausaga, e mafua mai ina ua ta’usala o ia e le fa’amasinoga maualuga i le faia o uiga mataga i se teineititi i le 2010, na fesiligia ai loa le Ofisa o Femalagaaiga i le mafua’aga na ala ai ona toe sao mai Maiava i le teritori.

 

O ripoti na tuuina atu i luma o le fa’amasinoga na iloa ai, e lua igoa na fa’aaoga e Maiava, o Pelenato Maiava ma Pelenato Lino.

 

Ae mo le ali’i o Fa’aaliga, e foliga mai e eseese auala na sipela ai le igoa o lea ali’i, o e mafu’aaga lea na faigata ai ona maua lona igoa sa’o.