Ads by Google Ads by Google

Poloa’i e le Fa’amasinoga ia Joeita Fa’aaliga e tuua le atunu’u


[ata: SN]
ausage@samoanews.com

Ua poloaina e le Fa’amasinoga Maualuga le ali’i o Joeita Fa’aaligae ina ia ona tuua le atunu’u ae toe fo’i atu i Samoa ma nofomau ai mo le umi o lana nofovaavaaia, tusa lea e 12 tausaga.

 

Ao fa’atele ona tolopo mai e le Fa’amasinoga Maualuga o le mataupu a Fa’aaliga, ona o le taumafai e sailia poo ai moni le igoa o lana sponsor na talosagaina le pemita e 30 aso lea na ulufale mai ai i le 2012, ma nofo fa’asolitulafono ai lava i le atunu’u seia oo i le taimi na ia fa’atinoina ai le mau solitulafono eseese e pei ona fa’asala ai o ia i le falepuipui, o le aso Tofi na te’a nei na tuuina aloaia mai ai loa le fa’aiuga a le fa’amasinoga fa’asaga ia Fa’aaliga.

 

O le fa’aiuga e pei ona tolaulauina e le afioga i le ali’i Fa’amasino Sili ia Michael Kruse, o le a leai se faaiuga e faaleaoga ai le nofovaavaaia a Fa’aaliga, ae ua toe faaopoopo i ai e le fa’amasinoga le isi tuutuuga mo lana nofovaavaaia sa tuuina atui le 2013.

 

O lea tuutuuga, o lona tuua lea o le teritori o Amerika Samoa, ma aumau ai i fafo atu mo le umi o lana nofovaavaaia e 12 tausaga.

 

Ana faapea e fa’aleaoga e le fa’amasinoga le nofovaavaaia a Fa’aaliga, e ono poloaina o ia e tuli tausaga e 34 i totonu o le falepuipui. E lei finagalo le fa’amasinoga e tuuina atu lea ituaiga fa’asaga ia Fa’aaliga, ona o le manatu i le ono avea lea ma avega i le malo.

 

Na tolopo mai le mataupu a Fa’aaliga i le 2 vaiaso talu ai, ina ua poloai e Kruse le loia a le malo ia Robert Morris ma le Pulesili o le Ofisa o Femalagaaiga, afioga Peseta Dennis Fuimaono, e saili atu le faila o lo o i ai le kopi o le ulua’i talosaga o le pemita a Fa’aaliga.

 

Ina ua toe valaau le mataupu a Fa’aaliga i le vaiaso na te’a nei, na manatu ai loa le fa’amasinoga o le a fa’atulaga se aso faapitoa e iloiloina ai le mataupu e fa’atatau i le faila ma le sponsor a Fa’aaliga, ae o le a fa’ate’a muamua atu loa le fa’aiuga fa’asaga i lenei ali’i talavou.

 

O Fa’aaliga, na ulufale mai i le pemita e 30 aso i le masina o Setema 2012 ma nofo faasolitulafono ai lava ina ua mae’a le 30 aso ae lei toe fo’i o ia i Samoa.

 

I le masina o Me o le tausaga na sosoo ai, 2013, na talepe ai e Fa’aaliga se faleoloa ma gaoi le tele o oloa. O le masina o Iulai o le tausaga lava lea, na toe talepe ai fo’i e Fa’aaliga le isi faleoloa ma gaoi le tele o oloa. O ulua’i mataupu ia e lua na molia ai e le malo ia Fa’aaliga ma fa’asala ai loa o ia i le falepuipui.

 

A o tuli ai le fa’asalaga fa’a falepuipui a Fa’aaliga, na soloa i tua o ia i le masina o Iulai 2016 ma ia osofaia se faleoloa Asia i le po, ae gaoi le $1,500 sa i totonu. I le masina lava lea o Iulai o le 2016, na toe sola ese ai fo’i Fa’aaliga i tua o le falepuipui ma ia gaoi le ato tupe a se fafine sa i totonu o lana ta’avale, lea sa paka i luma o le ofisa o le Pulega o le Eletise male Suavai i Tafuna.

 

Na tuli e le to’alua o le fafine ia Fa’aaliga ma maua, ma logo ai loa Leoleo e uiga i lea fa’alavelave, o iina na fa’atoa iloa ai e Leoleo o Fa’aaliga sa sola i tua mai le falepuipui.

 

Mai solitulafono eseese e 2 o le sola i tua mai le falepuipui faapea ai ma le gaoi o le aso a le fafine sa i totonu o le ta’avale, na poloaina ai e le fa’amasinoga ia Fa’aaliga na te tuli tausaga e 12 i le falepuipui.

 

Afai loa ae mae’a ona tuli lana fa’asalaga faa falepuipui e 12, e ala i lona tuliina o le tasi o vae tolu e 4 tausaga, ona agava’a loa lea o ia i le polokalame o le Palola, ma poloaina ai loa lona toe fo’i atu i Samoa.