'Po o Fiafiaga Hope House'


O se vaaiga i le siva na tapena i ai le Filipino Community e lolotu i le Ekalesia Katoliko mo le po fiafia o le Hope House. Lea ua va'aia le fiafia o nei talavou e sisiva i nai siva a le latou malo. [ata: Leua Aiono Frost]

O le po o fa'afiafiaga na fa'atulaga mo se sailiga tupe a le Hope House lea ua mae'a i le afiafi o le aso Gafua i le Malae i Fatuoaiga lava. Ma na fa'atasi atu i ai le to'atele o i latou na vala'aulia fa'apitoa e le Komiti Fa'afoe a le Hope House.

 

"O le fa'amoemoe lava i lenei Komiti ina ia mafai ona lava fo'i se fesoasoani tau le seleni e fa'atautaia ai le Hope House aua o se tautua e aoga tele i matua matutua ua tausia fa'apitoa, ma ua po'ia fo'i i gasegase tumau e ao ina mataituina le tausiga lelei i taimi uma. E le gata i lena ae o fanau ua le atoatoa le tino ma le mafaufau, ma isi ua tatau ona tausia fa'apitoa i taimi uma e i latou ua mae'a a'oa'oina fa'apitoa mo nei ituaiga o tausiga o i latou,” o se fa'amatalaga lea a se tasi o le Komiti Fa'afoe.

 

Na auai le komiti e tautuaina lea po e ala i tiute eseese e ao ina fa'atino ia mautinoa ua sao ma uli le fa'amoemoe. Na fa'atumulia uma lava fale'ie na fa'atutu mo lea afiafi a tamali'i. Na mua fo'i le sauniga sa tatalaina fa'apitoa e se tasi o Patele tofia ma i ai se avanoa na saunoa fa'apitoa ai fo'i le afioga Epikopo Peter Brown e tusa o le fa'amoemoe.

 

"O la outou talia o le vala'aulia, o le fa'ailoga lea o lo outou alolofa tula'i mo le fa'amoemoe i le po nei. Fa'afetai lagolagosua i le auaunaga, ae maise o le fa'amanatuina fo'i o nei tausaga e tele talu ona fa'aa'e lenei auaunaga aoga, ma ua iloga e mana'omia lava i totonu o le tatou atunu'u,” o sana tala lea e amata ai lana tautalaga pu'upu'u.

 

Sa ia tapa fo'i le auai mai o se tasi o Tama'ita'i Sa ua iloga lana tautua i Amerika Samoa, ua toe pa'au mai lava, ona o lea o lo'o olaola pea se fatu sa latou totoina faatasi ma le Ituaiga Sa, aua le tusiga lelei o e ua agava'a i ai le nofoaga a le Hope House i Fatuoaiga.

 

I le tulaga o fa'afiafiaga, sa ia fa'ailoa atu ai i le vasega fa'afiafia o le a fa'asolo i lea afiafi a tamali'i, "Tau ina ia siva ma le fiafia, ae ua iloa fo'i e lou tagata fa'afiafia, ua patipatia lo outou sao e i latou o lo'o tausia fa'apitoa i le Hope House po'o le A'ai o Fa'amoemoega. Fa'afetai mo lo outou alofa tula'i ma le tali vala'au ma le fa'aaloalo."

 

Na tatala fa'afiafiaga e le Autalavou mai Amanave, ma sa matagofie fo'i lo latou sao, e lua lava siva sa latou saunia e pei ona fa'atulaga ai, o le Mauluulu ma le Sasa ona saunia fo'i lea o le latou taualuga, ae sa tatala lea siva mulimuli i le $500 ina ia fesoasoani fo'i le aofia i le latou foa'i i luga o le  fola. Sa latou vala'auina le latou tama fa'aleagaga ina ia sausaunoa mo i latou fa'atasi ai ma le Faletua o le kovana sili Cynthia Moliga ma Sister Sheila.

 

O le fa'afiafiaga na  soso'o ai o le Sosaiete a Fanau A'oga e Maualuluga Togi mai le A'oga Maualuga i Kanana Fou. O lea foa'i sa latou fa'atino ai latou Ato meaalofa ua maea fa'atutumu lelei ma teuteuina i oloa eseese e fa'aaoga tele i le tausiga o gasegase i le Hope House. O meaalofa masani e latou te fa'ao'o i le Hope House i aso faailogaina e pei o le Kerisimasi ma le Tausaga Fou ae maise o Aso Fa'afetai ma Lotu a Tamaiti.

 

Na faia fo'i le sao matagofie o le Sosaiete a Tagata Filipino e tapua'i i le Ekalesia Katoliko ma sa latou foa'ia fo'i se tinoitupe ma faia a latou siva fa'a- Filipino e lua. Matagofie le latou sao, ma ua iloga ai fo'i lo latou agalelei ma le alofa tula'i.

 

O tatou uso mai Tonga o lo'o auai i le Ekalesia Katoliko, sa faia fo'i lo latou sao matagofie ma le mataina i lea po. O latou tausala e to'afitu sa filifilia lelei mo a latou siva e lua, ma sa iloga ona fiafia tagata uma e maimoaina teuga feilafi toe felanulanua'i.

 

O le tina o Seini ma lana ekalesia sa latou foa'i le $200 e tatala ai latou fa'afiafiaga, ae na iloga fo'i ona matua tufi le anoanoa'i o foa'i i luga o le fola i taimi uma a'o sausaunoa le vasega o 'tahine fo'iate'   ma ua fa'aosofia ai fo'i le agaga foa'i o nai uso mai Tonga. O le latou taualuga na matua toe sasa'a ai le fafao ma saga foa'i le mamalu na aofia i lea po.

 

O le Sosaiete a Sagata Ana, sa tula'i le latou ta'ita'i, Fr Vaiula Iulio ma fa'ao'o atu le latou meaalofa, ma faia le taualuga lea na ia vala'aulia uma ai sui mamalu o lo'o sasao i talaluma ina ia sausaunoa fa'atasi ma tina o le Sagata Ana.

 

O le sao fo'i o le Ekalesia Aso Fitu o le Toe Afio Mai i Pago Pago, sa latou usuina ai vi'iga o le Atua e lua mo le fa'apotopotoga ma le latou foa'i tupe na taua'aoina e tatala ai lo latou sao e $200. Na fa'afetaia fo'i lo latou sao matagofie i lea afiafi.

 

Ona o'o mai lea i le sao o le Autalavou a le Aiga Pa'ia i Tafuna lea sa lua i ai autalavou na fa'atulaga e le Komiti e aumaia lava i totonu o le Pulega e fa'afiafia fa'atasi ma isi sosaiete eseese i le atunu'u.

 

Ua fa'ailoa mai le fa'afetai tele a le Komiti Fa'afoe mo le mamalu lautele sa auai, ae maise o i latou na vala'aulia fa'apitoa e fa'afiafia. "Sa latou faia lava le mea sili ma foa'i ma le loto, fa'afetai lava."

Comment Here