Ads by Google Ads by Google

Pili a le kovana e si’i ai tau o totogi i luga Uafu


Galuega o lo o fa’atinoina i luga o le uafu a le malo i Fagatogo. [ata AF]
ausage@samoanews.com

Ua i luma nei o le Fono Faitulafono se tulafono mo se pili tau fa’aofi ua fa’aulutalaina e fa’apea, o se tulafono e sii ai le tau o totogi i luga o le uafu i Amerka Samoa, sii ai le tau o lo o i ai nei ma fa’ataga ai le suia o totogi ia e ala i le pulega o tulafono ma galuega a le malo.

 

O lenei tulafono taufa’aofi ua taoto atu nei i Komiti o Sailiga o le Tamaoaiga o le malo a maota e lua, mo le fa’atulagaina ai o iloiloga atoa ai ma le fesiligiaina o molimau e tusa ai o lenei tulafono.

 

O le pili e si’i ai tau o totogi o tautua i luga o le uafu a le malo, o se tasi lea o pili tupe mai pili tupe e tele ua tu’uina atu e le faigamalo a Lolo ma Lemanu i le Fono Faitulafono mo le iloiloina ma pasia, ina ia fesoasoani ai i le tulaga fa’aletonu ua i ai tupe maua a le malo i le taimi nei.

 

O isi pili tupe e aofia ai lafoga ua fa’aee i luga o oloa, o uta mai fafo, fa’apea ai lafoga e totogi e pisinisi uma i le malo, fuafua lava i le maualuga o le tupe maua a le pisinisi i le tausaga atoa.

 

I le fa’atomuga o lenei tulafono taufa’aofi o lo o taua ai e fa’apea, ua silia i le 30 tausaga e le o i ai lava se suiga i le totogi o tautua i luga o le uafu a le malo, ma ua matua maitauina fo’i le si’i maualuga o le totogi e fa’aleleia ai mea faigaluega o lo o fa’atinoina ai tautua a le malo i luga o le uafu.

 

I le fa’atupulaia ai pea o manaoga i totonu o le teritori i vaega e tatau ona fa’aleleia i luga o le uafu, atoa ai ma le fa’ataunu’uina o galuega e foia ai nei manaoga eseese, ua manatu ai loa le malo ina ia fa’aee se siitaga i le totogi o ana tautua i luga o le uafu, ona o le tau o lo o i ai nei e matua maualalo lava pe a fa’atusatusa i le tulaga ua i ai le tau e fa’aleleia ai mea faigaluega e fa’atinoina ai le tele o lana tautua.

 

O lenei tulafono o le a taualoa lava i le taimi e pasia ai e le Fono Faitulafono ma sainia e le ali’i kovana.

 

O ni isi la nei o siitaga i totogi o tautua i luga o le uafu a le malo. E $100 le totogi o le pailate pe a manaomia lana auaunaga mo le tosoina mai o se va’a i totonu o le uafu, a o lea ua suia i le $170. E $10 le totogi e taula ai le va’a faila i le taulaga, peita’i o lea ua suia nei i le $17, ae o va’a faila uma lava e sili atu i le 12 futu le uumi, o le a fa’aopoopo ai loa le totogi e $8.50 i le futu e tasi pe afai e le mana’omia le tautua a le pailate e toso mai ai i totonu, ae afai loa e manaomia lea auaunaga, ona fa’aopoopo lea o le $17 i le futu e tasi.

 

E $85 le totogi mo le tosoina mai o soo se va’a i totonu o le taulaga, ma o nei siitaga o le a mafai ona toe iloilo pe a mae’a le 5 tausaga e le Fa’atonusili.

 

Mo va’a e pipii i le uafu, ua fa’aee fo’i totogi fou ina ia fuafua i le mamafa o le va’a ma lona umi. O le totogi o le tone i le aso e $0.03, ae o le totogi mo le umi o le va’a e $0.17. Mo uta e la’u ese mai i le uafu, e $3.40 e totogi i le futu mo uta e ta’i 40 futu le uumi pe sili atu fo’i.

 

O le tele o totogi fou ua fa’aee i luga o le uafu, o lo o fuafua lava i le auala e fa’atino ai e le malo lana tautua.

 

I le iloiloga lea sa faia i luma o le maota o sui i le vaiaso na te’a nei e fa’atatau i totogi o uta mo Manu’a, lea fo’i na molimau ai le Fa’atonusili o le Pulega o Uafu ma Malaeva’alele a le malo ia Taimalelagi Dr. Claire Poumele, na talosagaina ai e le tama’ita’i fa’atonusili afioga i faipule, ina ia alofagia totogi o lana aufaigaluega i le taimi e iloiloina ai e le Fono Faitulafono le paketi a lana matagaluega.

 

“Talosaga atu ia outou afioga ina ia tautuana ma outou totogi o la’u aufaigaluega pe a aumai la matou paketi tou te iloiloina, aemaise lava i totogi o le auva’a a le Manu’atele, mai le to’atele o tagata faigaluega i totonu o la’u matagaluega, e na o le to’a 8 lava tagata faigaluega e maualuga atu i le $30,000 o latou totogi i le tausaga, o le isi to’atele e maualalalo uma lava o latou totogi, e o o fo’i i le totogi o le Kapeteni o le va’a sa $10,000 i le tausaga mai le tele o tausaga ua mavae, ae fa’atoa si’i lava i le tausaga na te’a nei i le $17,000”, o le saunoaga lea a Taimalelagi.

 

O totogi o le auva’a e pei ona taua e le tama’ita’i fa’atonu e na o le ta’i $10,000 i le tausaga, e le maua ni ova taimi e leai fo’i ni isi lava fa’amanuiaga latou te maua, ae o se galuega e faigata o lo o latou fa’atinoina, e galulue ova taimi fo’i latou i le tele o aso e malaga ai le va’a.

 

“Ou te iloa o le isi lea tulaga o lo o naunau ai lava le ali’i kovana, ia lelei totogi o tagata faigaluega a le malo, ina ia fetaui ma le tulaga o lo o i ai le maualuga ua i ai le tau o le soifuaga i le taimi nei, ae fa’atoa mafai lava ona faia lea tulaga pe afai e finagalo i ai le Fono Faitulafono e ala i le pasiaina lea o le paketi a lo’u Ofisa e tuuina mai”, o le saunoaga lea a Taimalelagi.

 

Saunoa le sui fofoga fetalai ia Fetui Fetu Jr e fa’apea, e le na o le pulega o uafu ma malae va’alele o lo o tula’i mai ai le manaoga i le fia fa’aleleia lea o totogi o tagata faigaluega, ae o lo o aofia ai le malo atoa lava, peita’i o le fa’afitauli o lo o tula’i mai, e le o lava se vaega tupe a le malo e fa’atino ai lenei manaoga, ona o lo o i ai fo’i isi tautua e tatau ona fa’amuamua.

 

“O lo o i ai le manaoga mo ni foma’i lelei e tausia le soifua maloloina o le atunu’u, o lo o mana’omia ni faiaoga, o vailaau mo le falema’i, o le fa’aleleia o auala i vaega eseese o le atunu’u, atoa ai ma le tele lava o isi manaoga e tatau ona fa’amuamua”, o le saunoaga lea a Fetui.

 

Sa ia fa’afetaia le afioga ia Taimalelagi ma le tautua a lana matagaluega, i le fa’atinoina o le tautua matavela mo le itumalo o Manu’a.

 

“E le faigofie le tautua a le auva’a mo le itumalo, o se galuega e faigata ona e le talanoa se isi ma fa’alavelave e tutupu i luga o le sami, ae fa’afetai atu i le tautua o lo o ofoina atu mo le itumalo e ala i le auaunaga a le auva’a, ae taoto maia lau talosaga o le a silasila toto’a i ai le maota”, o le saunoaga lea a Fetui.