Pili faaee ai malo lafoga maualalo mo pisinisi uma i le atunu’u

ausage@samoanews.com

Ua i luma nei o le Fono Faitulafono se pili mo se tulafono taufa’aofi e fa’aulutalaina e fa’apea, o se tulafono e suia ai lafoga maualalo mo pisinisi i Amerika Samoai le isi ala lelei.

 

O lenei tulafono taufa’aofi na fa’aulufaleina e le faigamalo a Lolo ma Lemanu i luma o le Fono Faitulafono, mo le fa’amoemoe e maua mai ai se isi alagatupe fesoasoani mo le malo, ina ua maitauina le to’atele o pisinisi ua ‘alo mai le totogiina o lafoga e tusa ai o a latou tupe maua i tausaga ta’itasi.

 

E talitonu le malo, ua matua to’atele naua le aofa’i o pisinisi i Amerika Samoa ua ‘alo mai le totogiina o a latou lafoga fa’atulaga e tusa ma tatau ai o pisinisi, e ui o loo fa’ailoaina mai le tele o a latou tupe o lo o maua i lea tausaga ma lea tausaga.

 

O lenei faiga le talafeagai ua fa’agaoi ai le tamaoaiga o tagata o Amerika Samoa ma lana faigamalo, i se aofa’i sa tatau ona maua mai, e fesoasoani ma auauna ai i le fa’avaeina lelei o pisinisi i totonu o le atunu’u ina ia lelei ma manuia.

 

O lenei fo’i faiga ua matua le taitai fetaui i ni isi o pisinisi o loo latou tausisia pea tulaga fa’amaoni e ala i le totogiina lea o a latou lafoga, fa’avae mai i tupe o loo latou maua i tausaga ta’itasi, ma fa’ailoa ai lo latou sao i le atina’eina o le tamaoaiga ma le malo o Amerika Samoa.

 

O le fa’avaeina la o lea lafoga maualalo mo pisinisi, o lo o i ai fa’atasi ma le mana’o o tagata lautele o Amerika Samoa, ina ia mautinoa lava, soo se fa’alapotpotoga tau pisinisi i totonu o le atunu’u, e tatau lava ona totogi a latou lafoga e avea ma o latou sao i le atina’eina o le malo.

 

O le Maga fou la o le tulafono lea ua fa’avaeina nei (11.0534), o lo o faatulaga mai ai le lafoga maualalo e 1% e totogi e le pisinisi i totonu o le tausaga, fuafua i tupe maua a le pisinisi mai le tausaga atoa, ma ua fa’amoemoe e amata aloaia lea tulafono i le tausaga fou 2018.

 

O pisinisi uma lava fa’atoa fa’avae i le tausaga lea e fa’amamalu ai lenei tulafono, o le a fa’aagafua i latou mai lo latou totogiina o lea lafoga fa’apea ai ma le tausaga e sosoo ai.

 

O lenei lafoga e pei ona fuafuaina e le malo, o le a fa’apitoa mo pisinisi uma lava i le atunu’u, ae le aofia ai Faalapotopotoga e le o galulue i latou mo ni tupe faasili e aofia ai Ekalesia ma Faalapotopotoga Tumaoti, ona o le autu o le latou tautua e fesoasoani lea i isi tagata.

 

Na fa’amanino e le ta’ita’i o le Komiti o le Tamaoaiga a le malo (Revenue Task Force), le susuga i le loia sili ia Talauega Eleasalo Ale, i se feiloa’iga ma sui o le Fono Faitulafono i le amataga o le masina nei e fa’apea, o le fa’afitauli ua maitauina e le malo, o le to’atele o pisinisi e le o fa’amaoni i latou i le tu’uina atu o fa’amaumauga i tupe maua i le tausaga, o le mafua’aga fo’i lena o lo o ‘alo ai i latou mai le totogiina o le lafoga mo pisinisi.

 

Na taua e le faigamalo e fa’apea, o lenei fa’afitauli ua avea lea ma tulaga ua le mafai ai e le malo ona ao mai se vaega tele o tupe sa tatau ona maua mai e fesoasoani ai i le atina’e ma le tamaoaiga o le malo i tausaga ta’itasi.

 

O lenei tulafono o le a aloaia i le taimi lava e pasia ai e le Fono Faitulafono ma sainia e le afioga i le ali’i kovana.

Comment Here