Ads by Google Ads by Google

Pili fa’atulaga ai suiga tulafono o totoga o ta’avale afi


[ata: SN]
ausage@samoanews.com

Ua i luma nei o le Fono Faitulafono se pili mo le suiga o aiaiga o tulafono tau ta’avale afi, ina ia fa’atulaga ai le mamafa o le ituaiga pepa iila uli (tint) e ufi ai tioata o soo se ta’avale afi i totonu o le atunu’u.

 

O lenei tulafono taufa’aofi mai le faigamalo a Lolo ma Lemanu, na taunu’u i luma o le Fono Faitulafono i le vaiaso mulimuli o galuega a maota e lua, ma faia ai loa le fa’aiuga ina ia taofia le iloiloina o nei tulafono seia toe a’e mai galuegaa le Fono i le tauaofiaga lona 3, lea e fa’amoemoe e usuia i le aso Gafua lona 2 o le masina o Iaunari 2018.

 

Na taua e le afioga i le ali’i kovana ia Lolo M. Moliga i sana tusi i Ta’ita’i o le Fono Faitulafono e fa’apea, o lenei tulafono taufa’aofi, o le a mafai ai ona fa’a faigofie le fa’atinoina o galuega a Leoleo, e ala i le vaavaaia lea o le malosi o pepa uli o lo o ufi ai tioata o soo se ta’avale.

 

Sa ia taua i lana tusi e fa’apea, o le tulafono o lo o aiaia ai tulaga o pepa iila e ufi ai tioata o ta’avale, e le i toe faia lava i ai se suiga talu mai le tausaga e 1972. Talu mai lea tausaga, ua tele oloa e teuteu ai ta’avale ua fa’aulufale mai i le atunu’u, ma ua faigata ai ona fa’atonutonu le ituaiga malosi e tatau ona i ai pepa uli nei i luga o tioata o ta’avale.

 

O se tasi o mafua’aga ua manatu ai le malo ina ia faia se suiga i lenei tulafono, e le gata ia fa’a faigofie ai galuega a Leoleo, ae sili ai lava le tulaga o le saogalemu o Leoleo i le taimi e fa’atino ai a latou galuega i le po.

 

Saunoa atili le ali’i kovana e fa’apea, o le fa’aopoopo ai o mea teuteu nei i tino ma tioata o ta’avale, e le gata e fa’alavelave ai mo le vaai a le ave ta’avale, ae atili ai ona faigata i le taimi e fa’atino ai galuega a ali’i ma tama’ita’i leoleo.

 

O le tioata tele o le ta’avale i le pito i luma, e tatau ona 70% poo lalo ifo fo’i le malosi o le tint e fa’apipii ai. O tioata i autafa o le ta’avale, e tatau ona i lalo ifo o le 32% le malosi o le tint e i ai. Ae mo le tioata i le pito i tua, e tatau ona i lalo ifo o le 35% le malosi o le tint e tatau ona i ai.

 

Ua i ai fo’i le fuafuaga a le faigamalo, o le a tu’uina atu fo’i isi tulafono e fuafua ai suiga i isi vaega o totoga o ta’avale afi, e pei o le lautetele o pa’u e tatau ona fa’aaoga e ta’avale i luga o le alatele, atoa ai ma le malosi poo le leotele o le pao o le mafa o le ta’avale e tatau ona i ai.

 

O le vaiaso na te’a nei na solofua ai e le Fa’amasinoga Fa’aitumalo ni pepa sala tau ta’avale afi se 2 sa tu’uaia ai e Leoleo se tagatanu’u, e mafua mai i le malosi o le tint atoa ai ma le pao leotele o le mafa o lana ta’avale.

 

E le i mafai e le Leoleo sa ia tuuina atu pepa sala i le tagatanu’u na a’afia ona oo atu i luma o le Fa’amasinoga Fa’aitumalo, e fa’amanino le mafua’aga na ala ai ona tuuina atu pepa sala i lenei ali’i.

 

Ae na taua e le ali’i i sana tusitusiga sa tuuina atu i le Fa’amasinoga, lea fo’i na maua ai le kopi a le Samoa News, o le auala na ala ai ona maua ana pepa sala e 2 mai Leoleo, na tuuina atu lea ina ua mae’a ona saili e Leoleo lana ta’avale ma lona tagata e le maua i ai ni fualaau fa’asaina.

 

E fa’alua ona taofia e Leoleo mai le Vaega Faapitoa a Leoleo o loo sailia fualaau fa’asaina le ta’avale a lenei ali’i, ma latou sailia ai pe maua i lona tino ma lana taavale ni fualaau fa’asaina, peita’i e aunoa ma ni fualaau fa’asaina sa maua i ai.