Ua i luma nei o le Fono Faitulafono se pili sa tuuina atu e le faigamalo a Lolo ma Lemanu, e fa’atulafono ai ta’iala mo Pisinisi o lo o latou talaina ma lafoina tupe i totonu  ma fafo atu o Amerika Samoa.

O lenei tulafono o le a toe teuteu ai le Ulutala 13 o le Mataupu 28 o le Tulafono Toe Teuteu a Amerika Samoa.

I se tusi a le afioga i le ali’i Kovana ia Lolo Matalasi Moliga sa tu’uina atu i Ta’ita’i o le Fono Faitulafono e lagolagoina ai lenei pili tau fa’aofi, na taua ai e le kovana e fa’apea, o pisinisi lafo tupe, o se tasi lea auala ua mafai ai ona fa’atupulaia auaunaga tau le tamaoaiga i soo se vaega o le Iunaite Setete o Amerika.

E tusa e 49 setete ua mae’a ona fa’atulafono ta’iala e fa’afoe ai a latou pisinisi lafo tupe, ae mo lo tatou teritori, o lo o fa’afoe lea auaunaga e aunoa ma se tulafono e fa’atulaga ai ta’iala.

Talu ai le maualuga o le aofa’i o tupe o lo o taulimaina e ituaiga pisinisi lafo tupe nei, e manaomia ai se tulafono e fa’atautaia ai ta’iala o nei ituaiga auaunaga, ina ia mautinoa lelei o lo o lelei le taulimaina o nei tupe.

O le tulafono lenei e aofia ai ituaiga pisinisi talatupe poo le lafo tupe e 2, o le pisinisi e mafai ona fesuiai ai tupe fa’avaomalo, ma le pisinisi e lafo ai tupe.

O le isi mafua’aga e ala ai ona taua le tulafono lenei, ina ia mautinoa ai e pisinisi lafo tupe nei ona tatala ni a latou teugatupe i pisinisi talitupe i le atunu’u.

Ma le vaega mulimuli e ala ai ona taua lenei tulafono e pei ona taua e le Kovana i lana tusi, o le mafai mai ai ona fesoasoani i le malo o Amerika Samoa mo ana fa’amaumauga, ma mafai ai fo’i e pisinisi lafo tupe ona totogi se vaega tupe laititi i auaunaga ta’itasi uma latou te faatinoina.

O lenei tulafono ua fa’amoemoe e talanoaina e le Fono Faitulafono, pe a toe a’e i le aso 12 o Mati, talu mai lana malologa e 4 vaiaso o lo o fa’agasolo i le taimi nei.