Ads by Google Ads by Google

PESEPESEGA O LE KERISIMASI 2017 - AFIAFI LONA LUA


Leone Miracle AOG lea ua fa'afiafia ma pesepese i vi'iga o le Atua i le latou Medley sa saunia. Matagofie lo latou sao i le afiafi o Pesega o le Kerisimasi na faia i le Gov Lee Auditorium i le afiafi aso Gafua. [ata: Leua Aiono Frost]

O se suiga matagofie le suiga ua i ai nei le nofoaga e fa'aauau ai Pesepesega mo le Kerisimasi a le tatou Malo lea e fa'atautaia e le Arts Council ma le DYWA.  O le soso'oga o pesega ua masi'i mai nei i le Fale Laumei i Utulei ma ua filemu mea uma. Ua matua fa'afiafiaina tagata uma e maimoa ma le toto'a ma fa'afofogaina pesega matagofie na tapenapena i ai le mamalu lautele o le atunu'u sa saunia ma ua pasia fa'apitoa latou sao mo lenei tausaga e ala i vi'iga o le Atua.

 

Na tatala le afiafi o pesega e Aufaipese a Aasu & Aoloai Catholic mai luga o le mauga, peita'i o lea fo'i e logologoa mai le matagofie o lea tumutumu mauga i teuga o la'au Kerisimasi o lo'o gasolo atu le atunuu e maimoaina.

 

Ua fa'apea lava ona matagofie fo'i a latou pesega ua mae'a tapena lelei, ma sa patipatia e le mamalu na potopoto lo latou sao na tatala ai pesepesega.

 

Na soso'o lea ma le fa'alauiloa mai o le Aufaipese a Taputimu CCCAS ma sa lanumoana ma le papa'e le latou toniga matagofie na latou la'eia mo le latou sao. E tolu a latou vi'iga na tapena, ma e le avea fo'i le siufofoga matagofie o le a'ufaipese.

 

Leone Miracle AOG na soso'o ai lea e galulue ai le Rev. Mose Katina ma le faletua. O le tama'ita'i fo'i e ta'ita'ipese sa ia fuaina a latou pesega e fitu na soso'o lava e le motu lona usuina ma sa matagofie lo latou sao.

 

O le masi'i mai o le A'oga Fa'afaife'au a le Samoa Bible College a le AOG i Ottoville Tafuna, e le'i tu'umamaina lava le latou avanoa. Na matua masi'i mai ma le mea atoa, aua o latou pesega na fa'aaoga e i latou pese vave, pese matagofie e talafeagai ma le fa'amoemoe, ma ia le iva fo'i le afiafi.

 

E faia taga o latou pese e lua, ae matua matagofie fo'i le vi'iga na tolu i ai latou pese na fofogaina. O le fuataimi lava fo'i ina matua mataala.

 

O le  sao o Gataivai EFKAS sa soso'o ai ma le to'aitiiti ai lava le aofa'i o lea aufaipese i lr matau atu i ai, a'o vi'iga fa'asalamo sa latou usuina, matagofie tele. O latou toniga fo'i sa fa'afuala'au pa'epa'e e palasi lelei i le lanumoana vaivai, ma e ata tele i afiafi fa'apenei.

 

O le Fagaitua Katoliko na soso'o ai i o latou vi'iga na saunia e fa, ma sa fa'anotaina e le tama'ita'i faia'oga musika sa ia taimiina fo'i nei vi'iga mo le aufaipese lea. Matagofie fo'i lo latou sao, ma sa tau fai patipatia fo'i e le mamalu na sasao lo latou sao i le afiafi a tamali'i.

 

O le Aufaipese #2 Futiga EFKAS na soso'o ai ma sa matofie siufofoga o tama'ita'i na tau'avea le soprano i lea aufaipese, e to'afa lava i latou ae matua au lava nota maualuluga sa usuina ai nei vi'iga taua e fa'ailo ai le afio mai o le Mesia e togiola le lalolagi.

 

Matagofie lo latou sao i pesega o le Kerisimasi i lenei tausaga, ma avea fo'i lo latou sao ma fiafiaga o le afiafi o pesega mo le Ali'i.

 

Na soso'o lea ma Holy Place Youth a Pavaiai Penetekoso, o le A'oga a Coleman ECE PTA na soso'o ai. O le sao ole Aufaipese a Lauli'i Metotisi na soso'o ai i le fa'asologa, Nuuuli CCCAS Youth a soso'o ae tomuli le afiafi ia Pavaiai Katoliko ma Faga'alu CCCAS na taualuga ai le fa'amoemoe atoa i le po lona lua o pesega o le Kerisimasi 2017.

 

O le fofoga o le afiafi o le susuga le Komesina o Leoleo Le'i Sonny Thompson ma o le toe tatalo e fa'aiu ai le afiafi na si'itia lea e Rev. Lalomauga Pa'au o le EFKAS i Faga'alu lava.