Ads by Google Ads by Google

PATEA: Ua uma avanoa sa tu’uina atu mo oe, o le toese lava lou iuga


Le nofoaga o le toese i Tafuna lea la’a tuli ai le fa’asalaga fa’a falepuipui e 15 tausaga a le ali’i talavou o Siaosi Ieremia. [ata AF]
ausage@samoanews.com

I le toe aafia ai o le ali’i talavou ia Siaosi Ieremia isi solitulafono e tele, a o fa’anofovaavaaia ai o ia e le Fa’amasinoga Maualuga ina ua fa’amaonia isi ana ulua’i solitulafono, na manatu ai loa le Fa’amasinoga i le vaiaso na te’a nei, ua uma avanoa sa tu’unia atu mo ia, ae sili ai loa ona taofia o ia i le falepuipui ina ia a’oa’ina ai lona mafaufau.

 

O le aso Faraile na te’a nei na fa’asala ai e le fa’amasinoga maualuga le ali’i o Ieremia e taofia i le falepuipui mo le 15 tausaga, ina ua fa’amaonia e le fa’amasinoga moliaga mamafa e 2 o le talepe fale i le tulaga muamua ma le gaoi sa tu’uaia ai o ia e le malo.

 

E ese mai i le fa’aiuga lea ua tu’uina atu e le fa’amasinoga e tuli ai e Ieremia le umi e 15 tausaga i le falepuipui, o le aso Faraile fo’i na te’a nei na fa’aleaoga ai e le fa’amasinoga tuutuuga o le nofovaavaaia e 5 tausaga a le ua molia, ina ua fa’amaonia lona le usitaia o poloaiga sa tu’uina atu mo lana faanofovaavaaia, ma ua poloaina o ia e tuli i le toese le umi e 5 tausaga lea sa fa’amalumalu e le fa’amasinoga talu mai le tausaga e 2014.

 

O le fa’asalaga tuai la a Ieremia e 5 tausaga lea sa fa’amalumalu mai i le tausaga e 2015, lea ua poloaina o ia e tuli, fa’apea ai ma lana fa’asalaga fou e 15 tausaga lea na maua mai ina ua fa’amaonia moliaga fou e 2 sa tu’uaia ai o ia, o le a tuli fa’atasi uma i le taimi e tasi i totonu o le toese.

 

Na talosaga Ieremia i le fa’amasinoga mo se avanoa e toe fo’i atu ai i tua e saili sana galuega e tausi ai ona matua ma lona aiga, aemaise ai le tautuaina o lona nu’u ma le Ekalesia. Sa ia ta’utino i le fa’amasinoga lona salamo moni e tusa ai ma lona soli soo o le tulafono, ma ua ia manatu ai ua tatau ona fai se suiga i lona olaga mo le lumana’i.

 

E pei ona e le to’atele o pagota i le ta’utino lea i luma o le fa’amasinoga suiga ua latou sauni e faia pe afai ae maua se isi avanoa, sa faapena fo’i ona faia e Ieremia i le aso Faraile na te’a nei, e ala i lona ta’utino i luma o le fa’amasinoga, na te le toe solia lava se tulafono pe afai ae tu’uina atu se isi avanoa o ia.

 

Na talosaga fo’i lana loia fautua ia Michael White i le fa’amasinoga mo se fa’asalaga fa’anofovaavaaia, ina ia maua ai le avanoa o le ua molia e fo’i ai i tua i lona aiga e saili sana galuega e tausi ai le aiga ma ona matua, ma toe fuata’i se isi taeao fou mo lona olaga, lea fo’i na lagolagoina e le loia a le malo ia Robert Morris.

 

Na taua e Morris i le fa’amasinoga se vaega o loo taua i le ripoti a le Ofisa Faanofovaavaaia, e fa’atatau i le toe solitulafono lea o Ieremia a o fa’anofovaavaaia ai o ia, ma ua manatu ai le itu a le malo, e talafeagai lava sina fa’asalaga fa’a falepuipui mo ia, ina ia a’oa’iina ai lona mafaufau mai le a’afia soo i le tulafono.

 

I le mae’a ai ona iloilo e ali’i fa’amasino o sa latou fa’aiuga e tuuina atu mo Ieremia, i le mae’a ai lea ona latou fa’afofoga i fa’afinauga a loia aemaise ai o le talosaga a le ua molia mo se isi avanoa o ia, na saunoa ai loa le afioga i le ali’i Fa’amasino Sili Lagolago ia Elvis. P. Patea e fa’apea, e foliga mai e le o i ai lava se lesona aoga o a’oa’oina e Ieremia mai avanoa e tele sa tu’uina atu muamua e le fa’amasinoga ia te ia.

 

“Ua uma ona matou iloiloina fa’amaumauga a le fa’amasinoga, aemaise ai avanoa e tele sa tu’uina atu muamua, ae foliga mai e leai ma se aoga o ia avanoa sa tu’uina atu ia te oe. E le gata e te le i usita’i i poloaiga o lau nofovaavaaia, ae sa e toe solitulafono fo’i”, o le saunoaga lea a Patea.

 

“E le gata na e solitulafono, ae ua manino i le tagi a le malo, e 3 solitulafono eseese sa e faia, e ala i le osofa’i ma gaoi meatotino a isi aiga, o se gaioiga e atagia mai ai lou le manatu mamafa i le poloaiga a le fa’amasinoga, ma ua talosaga mai fo’i i latou nei ina ia fa’asala oe i le fa’asalaga e pito sili ona maualuga o lo o fa’atulaga mai e le tulafono”.

 

“Ua atagia mai fo’i i le ripoti a le Ofisa Fa’anofovaavaaia tulaga pagatia sa fetaia’i ma le to’atele o aiga i le afioaga i Vaitogi, ona o le amio sa e faia o lou fealua’i solo lea i totonu o le nu’u ma gaoi meatotino a tagata i se auala fa’atautala, ma ua manatu ai loa le Fa’amasinoga, o le fa’aiuga o le a tu’uina atu ia te oe, o le a taofia ai lou toe faia o lenei amioga”.

 

E 3 tagi sa fa’aulu e le malo fa’asaga ia Ieremia. O le tagi muamua, ua ta’usala ai o ia i le solitulafono mamafa o le talepe fale i le tulaga muamua, ma ua poloaina ai o ia na te tuliina le umi e 15 tausaga i le falepuipui.

 

I le tagi lona lua sa fa’aulu fa’asaga ia Ieremia, na ta’usala ai o ia e le fa’amasinoga i le moliaga mamafa o le gaoi, ma ua poloaina ai lona tuliina o le fa’asalaga fa’a falepuipui e 7 tausaga i le falepuipiu.

 

O se tasi o tuutuuga o le maliliega a le malo ma Ieremia, lea fo’i na talia e le fa’amasinoga, o le a solofua e le fa’amasinoga moliaga uma o loo totoe i le tagi 1 ma le 2 sa fa’aulu fa’asaga i le ua molia, e aofia ai ma le solofua o le tagi lona 3 i lona atoaga o lo o i ai.

 

O le afioga i le ali’i Fa’amasino Lagolago ia Mamea Sala Jr ma Su’apaia Pereira na lagolagosua i le afioga i le ali’i Fa’amasino ia Patea i le iloiloina o le fa’asalaga a Ieremia.