Ads by Google Ads by Google

Pasia Tulafono lesitala ai latou tausala i solitulafono mataga


Afioga i Faipule o le maota o sui ia Gafatasi Afalava ma Lavea Fatulegaee P. Mauga. [ata AF]
ausage@samoanews.com

Ua pasia nei e le Fono Faitulafono se tulafono tau fa’aofi sa talosagaina e le faigamalo a Lolo ma Lemanu, mo se pili e sui ai le Tulafono o le Lesitala ma le faailoa o le tagata na ta’usala i le faia o solitulafono mataga e a’afia ai fanau laiti.

 

O le amataga o le masina nei na pasia ai e le Senate lenei tulafono i lona faitauga fa’atolu, ae o le taeao ananafi na fa’atoa pasia ai e le Maota o Sui i lona faitauga fa’atolu lenei lava fo’i tulafono, i le palota fulisia e 13-0.

 

O le pasia ai e le Fono Faitulafono o lenei tulafono, ua fa’aalia ai lo latou lagolagoina o taumafaiga a le malo, e lesitalaina loa suafa uma o i latou ua mae’a ona ta’usala e le Fa’amasinoga i lo latou faia lea o solitulafono mataga i fanau laiti, ina ia mafai ai ona fa’ailoa nofoaga ma vaega eseese o loo nonofo ai i latou.

 

O le suiga e pei ona faia i le Tulafono lea ua fa’apuupuu i le (SORNA), o le a mafai ai e le malo ona fa’aauau pea le vaavaaia o tagata e matua sili atu ona mamafa a latou solitulafono na ta’usala ai i tulaga tau feusuaiga.

 

O i latou uma e tatau ona lesitalaina i lalo o le Tulafono o le SORNA, e aofia ai i latou na ta’usala i solitulafono o le faia o uiga mataga ma fa’asala ai i le falepuipui, faapea ai ma i latou na ta’usala i solitulafono mataga ae lei faasalaina i le falepuipui.

 

O lo o taua i se vaega o le tulafono e fa’apea, afai e atoa le 10 tausaga sosoo e le o toe solitulafono se tagata sa ta’usala muamua i nei ituaiga solitulafono, o le a mafai loa ona fa’aitiitia le umi e lesitalaina ai lona suafa.

 

Na taua e le afioga i le Loia Sili ia Talauega Eleasalo Ale i le taimi na molimau ai i luma o le maota o sui i lenei tulafono e fa’apea, o le taua o le tulafono lenei o le lesitalaina o tagata solitulafono, e mafai ai e tagata o le atunu’u ona latou iloa tagata sa a’afia i le faia o uiga mataga i fanau, ina ia mafai ai fo’i ona fa’aeteete i latou mai nofoaga o lo o nonofo ai i latou nei.

 

Mo se fa’ata’ita’iga e pei ona saunoa le Loia Sili i lana molimau, i se iloiloiga sa fa’atulaga e le Komiti o Mataupu Tau Fa’amasinoga a le maota o sui e fa’apea, e i ai le isi tagata e fesuisuia’i nofoaga e nofo ai i totonu o le atunu’u, ma faigata ai ona fa’alauiloa i latou nei.

 

Na taua e ni isi o afioga i Faipule le taua tele o lenei tulafono, e mafai ai ona fesoasoani i matua ma fanau laiti mai le puipuia o i latou mai tagata o lo o fiafia e faia amioga o le fa’atamaia lea o fanau laiti, e mafua mai i le malosi o le olaga tu’inanau o lo o soifua ai.