Ads by Google Ads by Google

Pasia Fono Faitulafono isi tofiga a le Kovana


Afioga a Fagaoatua Dorian T. Salavea ma Sataua Dr. Mataese Samuelu. [ata AF]

Le Fa’atonusili tofia o le Matagaluega o Tautua ma Auaunaga Lautele, Taeaoafua Dr. Meki Solomona. [ata AF]
ausage@samoanews.com

A o fa’agasolo ai pea iloiloga a komiti o maota e lua i le fesiligiaina lea atoa ai ma le pasiaina o tofiga a le afioga i le ali’i kovana ia Lolo Matalasi Moliga, o le taeao ananafi na pasia ai e maota e lua ni isi o tofiga a le ali’i kovana, mo i latou ua mae’a ona fesiligia e komiti a latou agava’a i le vaiaso nei.

 

I luma o le maota maualuga, na pasia ai e afioga i Senatoa i la latou palota fulisia le suafa o le tama’ita’i foma’i ia Dr. Ruth Matagi-Tofiga e avea ma Fa’atonusili o le Matagaluega o Aoga a le malo, fa’apea ai ma le suafa o le afioga a Ali’itama Sotoa e avea ai ma Fa’atonusili o le Ofisa o le Enetia (TEO), i le palota e 16-0.

 

O le pasia ai e le Senate o suafa o Dr. Matagi-Tofiga ma Sotoa, ua aloaia ai loa le avea o i laua ma Faatonusili o le Ofisa o Aoga ma le Ofisa o le Enetia, i le mae’a ai lea ona pasia o i laua e le maota o sui i le vaiaso na te’a nei.

 

O le taeao ananafi na pasia ai e le maota o sui ia Sotoa i le palota e 15-3, fa’atasi ai ma le suafa o le ali’i foma’i ia Taeaoafua Dr. Meki Solomona i le palota e 13-5.

 

O fa’aiuga a le maota o sui fa’asaga ia Taeaoafua ma Sotoa, na faia lea ina ua mae’a ni iloiloga sa fa’atautaia e fesiligia ai o la agava’a, e tusa ai o le toe filifilia o i laua e le kovana e fai ma ta’ita’i o ni isi o Ofisa a le malo mo le isi 4 tausaga o loo lumana’i nei.

 

ILOILOGA A TAEAOAFUA

 

E ui e lei tali le afioga i le alii Fa’atonusili tofia ina ua fesiligia o ia e tusa ai o le mataupu lea na tula’i mai i le va o ia ma se tasi o tagata faigaluega i lona Ofisa, talu mai le taimi na mae’a ai le palota o le tausaga na te’a nei, ae na maua lava le avanoa e fa’asoa ai e Taeaoafua ona lagona e tusa ai o lenei mataupu, ao fa’afofoga le komiti fa’apea ai se vaega to’atele o lana aufaigaluega ma ni isi o lona aiga na fa’amalo’ulo’u atu e lagolagoina lona fa’amoemoe i le aso ananafi.

 

“E i ai taimi e le atoatoa ai le tagata i le fa’atinoina o lana galuega, ae i le tulaga o loo i ai le tautua a le Matagaluega, e i ai lo’u talitonuga e le fesiligia e le atunu’u le fa’aauau pea o le tautua a lenei Ofisa mo le mamalu o le atunu’u”, o le saunoaga lea a Taeaoafua.

 

“E i ai taimi e tutupu mai ai fa’aletonu i le soifuaga lenei, ae o le upu e taua ia te a’u, o le fa’amagalo”.

 

“E le aumaia pisaga o le alatele e taofia ai la’u tautua i le atunu’u e sili ona pele i lo’u loto, ou te le atoatoa ae ou te loto fa’amagalo, talu ona tula’i mai lenei mataupu, ua outou fa’afofoga e leai lava sa’u tala e tasi ua faia, ona o lea ou te talitonu o lo’o o’u faia le galuega na tofia a’u e fa’atino”.

 

Na taua e le toatele o faipule lo latou le fesiligia o agava’a o Taeaoafua e tusa ai o lana tautua i le atunu’u. Saunoa le afioga a Manumaua Wayne Wilson e fa’apea, talu mai lava lona laititi e oo mai i le taimi nei, sa avea mai lava Taeaoafua o se tagata sa fai ma fa’ata’ita’iga mo ia, o ia fo’i o se ta’ita’i lelei ma fa’atuatuaina e le atunu’u.

 

Na fa’afetaia fo’i e Vui Florence Saulo lagona fa’amaualalo o le ali’i Fa’atonu i le taimi o lana saunoaga, e tusa ai o le mataupu sa fesiligia ai o ia, ae i lona talitonuga, o ia o se ta’ita’i ua iloa ana galuega, ma ua fa’atuatuaina fo’i o ia e le kovana ma le faigamalo.

 

Na fautua le Fofoga Fetalai ia Savali Talavou Ale ia Taeaoafua ina ia tautuana ma ia mea o loo tutupu mai i lana galuega.

 

“Tautuana ma oe tulaga e pei ona alia’e mai, o lea matou te tapua’i atu i ou faiva i le tautuaina o le malo, afai e i ai ni mea e tutupu mai i le ta’ita’iina o lau galuega, e lagona fo’i e i matou le popole”, o le saunoaga lea a Savali.

 

Na fa’afetaia e le afioga a Sam Ioka Ale Meleisea polokalame fa’aauau a le matagaluega i tua i nu’u ma afioaga, e pei ona fesoasoani malosi ai i le faaitiitia o le tagofia e tupulaga o fualaau fa’asaina ma le ‘ava malosi.

 

ILOILOGA A SOTOA

 

O le aoauli o le aso Faraile na te’a nei i le mae’a ai lea o le tauaofiaga a le maota o sui, na fa’atautaia ai le iloiloga mo le afioga a Sotoa, lea na ta’ita’ia e le afioga i le ali’i faipule ia Manumaua, o le sui taita’i komiti lea o le Pulega o le Eletise ma le Suavai a le maota.

 

O se tasi o mataupu sa fesiligia e faipule i lea iloiloga, o se fuafuaga a le ali’i Fa’atonu ma lona Ofisa e tusa ai o polokalame o loo agava’a ai aiga e maualalo le tamaoaiga i totonu o le atunu’u.

 

Na taua e Sotoa e fa’apea, ua silia i le 3,000 le aofa’i o aiga o le atunu’u ua mae’a ona lesitalaina i le latou polokalame talu mai fa’amaumauga o le tausaga na te’a nei, ma o lo o fa’aauau pea lea polokalame seia oo mai i le tausaga lenei.

 

“I le tulaga o le fa’aaogaina lea o le malosiaga o le la e maua mai ai le eletise i totonu o le atunu’u, o lea ua mae’a ona fa’atinoina lenei auaunaga i Ta’u, Manu’a, ma le fa’amoemoe o se taimi o le tausaga nei e tatala ai lea tautua i le Falelua i Ofu ma Olosega, ae o loo i ai le fa’amoemoe e tatau ona mae’a atu le tausaga e 2025 ua soo atoa le motu o Tutuila i lenei tautua fa’aauau a le Ofisa, e pei ona matou galulue fa’atasi ai ma le Ofisa o le Pulega o le Eletise ma le Suavai a le malo o Amerika Samoa (ASPA)”, o le saunoaga lea a le ali’i Fa’atonusili.