Pasia Fono fa’aopoopoga e $2 miliona i le paketi a le malo

ausage@samoanews.com

Ua pasia e le Komisi So’ofa’atasi o le Paketi a le Fono Faitulafono le talosaga sa tu’uina mai i le faigamalo a Lolo ma Lemanu, e fa’aopoopo ai le $2 miliona i totonu o le paketi a le malo mo le tausaga tupe fou 2017.

 

O lenei alaga tupe o lo o fuafua le malo e fa’atupe mai i tulafono taufa’aofi lea o lo o i luma o le fono, e fa’atulaga ai si’itaga fou i totogi o uta mai fafo, lea o le a fa’aaoga i ai e le Ofisa o Tiute masini mai fafo (scanner) e su’e ai oloa.

 

O le vaiaso nei na talosaga ai e le faigamalo le $2 miliona i tu’u i le paketi mai tupe lotoifale ina ua mafai e le FAA ona latou faatupeina ni poloketi e lua i le malae vaalele i Tafuna.

 

O le agaga o le faigamalo a Lolo ma Lemanu e pei ona fa’aalia i se tusi sa tauaao atu e le afioga i le ali’i kovana ia Lolo Matalasi Moliga i ta’ita’i o le Fono Faitulafono, ia mafai e Amerika Samoa ona fa’amaonia atu i le ofisa o le FAA a le malo tele, o lo o i ai le fa’anaunauga o le malo e tutu fa’atasi ma le FAA i le fa’atinoina o gaioiga uma, e lagolagoina ai le toe fa’aleleia o le malaeva’alele fa’avaomalo a le atunu’u i Tafuna.

 

O le taeao nei lea ua fa’amoemoe le maota o sui e faia ai sa latou fa’aiuga i le tulafono e siitia ai totogi mo le su’eina o uta mai fafo, lea o lo o fuafua e maua mai ai le alagatupe e fa’atupe ai le tupe e $2 miliona lea ua toe fa’aopoopo i le paketi a le malo.

Comment Here