Ads by Google Ads by Google

Pasia Faipule le pili fa’aopoopo ai nofoa itumalo o Maopu i le Tualauta


Le afioga i le tama’ita’i faipule ia Vui Florence Saili Saulo, lea sa fa’aulufaleina le pili taufa’aofi e fa’aopoopo ai nofoa mo le itumalo o Maopu poo le itumalo o Tualauta e pei ona silafia ai e le to’atele i le taimi nei i le maota o sui o le Fono Faitulafono. [ata AF]
ausage@samoanews.com

E 18-0 le palota fulisia na pasia ai e le maota o sui a le Fono Faitulafono i le taeao ananafi, le tulafono taufa’aofi na fa’aulufale e le afioga i le tama’ita’i faipula ie Vui Florence Saulo, mo se pili e sui ai le Fa’avae Toe Teuteu a Amerika Samoa, ina ia mafai ai ona fa’aopoopo ni nofoa se 2 mo le Itumalo o Maopu lea ua lauiloa nei o Tualauta.

 

E pei ona manino i le tino o le tulafono na ulufale atu ai i le maota o sui, e 2 nofoa sa taua i le tulafono e tatau ona fa’aopoopo mo le itumalo, ae i le mae’a ai o se iloiloga sa fa’atautaia e le Komiti o Tulafono a le maota o sui i le vaiaso na te’a nei, lea na saili ai le tofa ma le fa’autaga a afioga i sui mamalu o itumalo eseese i le atunu’u, na tasi ai loa le fa’afitiga o aleaga e ala i le suiga sa faia ma pasia, ina ia fa’aitiitia mai i le tasi le nofoa e fa’aopoopo mo le itumalo fa’apalota Tualauta.

 

I le tino o lenei tulafono taufa’aofi o lo o taua ai e fa’apea, o le itumalo o le Tualauta, e toetoe lava o le 2/3 o le faitau aofa’i o tagata o loo nonofo i le teritori o lo o alala ai i lea itumalo, ma o le si’itia o le aofa’i o tagata e nonofo ma alala tumau i totonu o le itumalo, e tatau fo’i ona atagia mai ai le aofa’i o sui i totonu o le maota o sui e nonofo ai i lea itumalo.

 

“O le taimi nei, o loo matua le lava sui o le itumalo...i le Fono Faitulafono, ona e na o le to’alua le maota o sui, e tutusa lava ma isi itumalo e laiti mamao a latou faitau aofa’i”, o se vaega lea o le tulafono.

 

O le afioga i le ali’i faipule ia Vaetasi Tu’umolimoli Saena Moliga, o ia fo’i lea o le sui taitaifono o le Komiti o Tulafono a le maota o sui na ta’ita’ia le iloiloga i le aso Tofi na te’a nei, lea na maua ai le avanoa o afioga i le Fofoga Fetalai ia Savali Talavou Ale ma sui mamalu o le maota e fetufaa’i ai ma sasa’a le tofa i le taua o lenei tulafono.

 

Ina ia fa’amausali atili le tulafono i lona tulaga e tatau ona taoto ai ina ia tusa ai ma le Fa’avae o le atunu’u, na fautuaina ai e le afioga i le ali’i faipule ia Puleleiite Tufele Li’amatua Jr le tatau lea ona toe taoto le tulafono i le komiti, ae saili muamua se finagalo o le itumalo o Tualauta e ala i le vaevae lea o le Itumalo atoa i Itumalo fa’aPalota, e pei fo’i ona faia e le itumalo o Sua, e tasi le itumalo ae eseese ona Itumalo Fa’apalota, lea fo’i na lagolagoina e le afioga i le ali’i faipule ia Vailoata Eteuati Amituana’i, ma sauni ai loa le Komiti e fa’apalota le mau ina ia toe taoto le pili i le Komiti.

 

A o le i alo le Komiti mo le palota, na maua le avanoa e toe lalafo ai ni isi o afioga i Faipule i le taua o lenei tulafono, e aofia ai le Fofoga Fetalai ia Savali, o le sui fofoga fetalai ia Fetu Fetui Jr, atoa ai ma le tama’ita’i faipule sa fa’aulufaleina le tulafono taufa’aofi ia Vui.

 

Saunoa Savali e fa’apea, o le tiute o le Fono Faitulafono o le fausia lea o tulafono e manuia ai le atunu’u lautele, latou te vaavaai fo’i i auala e mafai ona fausia ma fa’amausali ai tulafono ina ia malosi ma lelei, o le lagona fo’i lea sa lagolagoina e le sui fofoga fetalai, ma mafua ai loa ona toe tafa le finagalo o Puleleiite e toe fa’aui i tua lana mau ina ia taoto atu le pili i le Komiti.

 

Ao le i fa’aauau le iloiloga, na fa’amanino e Vui i le maota e fa’apea, o se tulaga faigata pe afai e toe taoto le pili ae fono le itumalo ina ia vaevae i itumalo faapalota, e le gata e faigata ona faia lea suiga, ae o le to’atele o tagatanu’u a le itumalo o loo faigaluega ma totogi lafoga i le malo, e leai se avanoa e ofi atu ai o latou leo i saofaiga a nu’u ta’itasi o le itumalo.

 

Na tafa le finagalo o Puleleiite ma ia toe fa’atula’i ai loa le mau ina ia toe fa’aui i tua lana talosaga sa mua’i tu’uina atu e toe taoto ai le tulafono taufa’aofi i le maota, ae sili loa pe a fai se suiga i le tulafono, ina ia sui mai le 2 nofoa fa’aopoopo i le tasi le nofoa, ae sauni loa e tu’uina atu le tulafono mo lona fa’apasiaina.

 

Sa ia i fo’i se fautauga mai le afioga i le ali’i faipule ia Toeaina Faufano Autele, ina ia fa’atulaga se isi iloiloga ae aami Tamali’i o afioaga ta’itasi i le itumalo sei fesiligia so latou finagalo, peita’i na pasia lava le mau ina ia pasia le suiga ua faia ae tu’u atu loa le pili i luma o le maota e fai i ai se finagalo o le maota.

 

Na fa’afetaia e Vui le maota e tusa ai o le tofa ua fa’aalia, lea ua mafai ai ona pasia le tulafono, e ui e le o se tulafono e faigofie.

 

Ma o le a tuuina atu nei lea tulafono i le Senate.