Ads by Google Ads by Google

Pasia e maota ta’itasi pili o le Paketi a le malo mo le 2017

ausage@samoanews.com

O le taeao ananafi na tau fai pasia uma ai e maota ta’itasi a le Senate ma le Maota o Sui a laua pili o le paketi fa’atasi ma suiga, aua le faatinoina o galuega fa’atino a le malo mo le tausaga tupe fou 2017, i le mae’a ai lea o le faitauina fa’atolu o lenei tulafono e pei ona talosagaina e le faigamalo.

 

E 12-0 le palota na pasia ai e le Senate lana tulafono, ae 15-0 le palota na pasia ai e le maota o sui lana tulafono taufa’aofi mo le paketi, lea ua suia ai le aofa’i o le paketi e fa’atino ai galuega a le malo mo le tausaga tupe fou i le aofaiga e $380,487,500, ina ua mae’a ona fa’aopoopo i ai le suiga e $2 miliona ua fa’amoemoe le malo e fa’afetaui ai le tupe e silia i le $20 miliona lea ua tu’uina mai e le malo feterale, e fesoasoani i poloketi e lua i le malae vaalele i Tafuna.

 

O le suiga e pei ona pasia e le Fono Faitulafono i le paketi a le malo, na afua mai lea i se talosaga na tu’uina mai e le faigamalo, ina ia aofia i totonu o le paketi o le tausaga tupe fou a le malo le vaega tupe e $2 miliona, e avea lea o se vaega tupe mo le malo o Amerika Samoa e fa’afetaui ai tupe fesoasoani mai le malo feterale i le atina’e o le malae va’alele.

 

Na taua e le afioga i le ali’i kovana ia Lolo Matalasi Moliga i lana tusi i ta’ita’i o le fono faitulafono e fa’apea, o le tupe e tusa ma le $20 miliona lea ua folafola e le feterale e tu’uina mai mo Amerika Samoa, e tusa ma le $7 miliona e alu i le toe suia o le tulaga e tu’u i ai tane suau’u o lo o i le vaega e paka ai ta’avale i le malae va’alele fa’avaomalo i Pago Pago, ae o le isi vaega tupe e tusa ma le $13 miliona, o le a fa’aaoga lea i le fa’aleleia o isi vaega o le malae va’alele.

 

Na tau fai fa’afetaia e ta’ita’ifono o le komiti soofaatasi o le paketi a le maota afioga i senatoa ma faipule, e tusa ai o le galuega sa fita i tuga i ai le komiti soofaatasi mo le siilia i le 2 ma le afa vaiaso, lea ua i’u ma le manuia i le vaiaso nei.

 

I luma o le maota maualuga, na fa’afetaia ai e le afioga a Laolagi o le ta’ita’ifono o le komiti so’ofa’atasi o le paketi, ae o ia fo’i lea sa avea ma peresetene le tumau mo le maota talu mai le vaiaso na te’a nei, mamalu o afioga i senatoa, e tusa ai o le galuega ua mae’a ma le manuia.

 

I luma o le maota o sui, o le afioga i le ali’i faipule ia Faimealelei A. Allen na fai ma sui o le ta’ita’ifono o le komiti o le paketi a le maota ia Timusa T. Lam Yuen na fa’atoa fa’atasi atu i le tauaofiaga a le maota o sui ananafi, talu mai le taimi atoa o le paketi e le i auai o ia, e faafetaia ai le maota ona o le galuega o le paketi.

 

Saunoa Faimealelei e fa’apea, i le 2 ma le afa vaiaso sa fa’atino ai iloiloga a le fono mo le paketi a le malo, sa tele lu’itau ma fa’afitauli na alia’e mai i le va o sui o le komiti soofaatasi, ae sa ia molimauina le to’a o le tai i finagalo fa’aaliga o afioga i faipule, lea ua mafua ai ona i’u manuia le galuega.

 

E ui o lea ua pasia le paketi i lona faitauina fa’atolu, ae na tula’i le afioga i le ali’i faipule ia Toeaina F. Autele ma ia taua e fa’apea, afai ae toe filifilia o ia e lona itumalo, o le a ia fesiligia i le tausaga fou le $200,000 lea o lo o fa’atulaga mai i le Polokalame Fa’apitoa a le ali’i kovana, e fa’apitoa mo le tusiaina o le Tusi mo le Tala Fa’asolopito o le malo.

 

Saunoa Toeaina e fa’apea, afai o lo o i ai se fuafuaga a le malo e lolomi kopi o lenei tusi ma toe fa’atau atu i le atunu’u, e tatau la ona toe i ai se isi vaega tupe a le malo e toe maua mai ai. Sa ia fa’afetaia fo’i le maota e tusa ai o le galuega o le paketi.

 

“O le mea moni lava lau afioga i le fofoga fetalai, e tele naua fesili sa fesiligia ai e lo’u sui tulaga o le paketi, ae na taofi lava fa’afinauga ona o le ‘ava atu i lau afioga ma le fono faitulafono a le atunu’u, ae o mataupu ia e tatau ona fa’amanino i le atunu’u, o le tulaga i lana paketi”, o le saunoaga lea a Toeaina na mafua ai ona saunoa le fofoga fetalai ia Savali Talavou Ale ma fa’alototele le afioga i le ali’i faipule, e tusa o le sauni atu mo le sailiga tofi a le atunu’u, ina ia toe fo’i uma mai afioga i faipule mo le fa’aauauina o le latou tautua i a latou itumalo ta’itasi.

 

O afioga i Senatoa sa pasiaina la latou tulafono e aofia ai Galea’i M. Tu’ufuli, Laolagi Fonoti Savali Vaeao, Fuiava Avaloa, Tialavea Misi, Uti Petelo, Soliai T. Fuimaono, Magalei Logovi’i, Gaea P. Failautusi, LeAtualevao Asifoa, Tuiasina Esera, Avegalio Aigamaua, ma Faletagoa’i Tuiolemotu.

 

Mo le maota o sui, o afioga i faipule na palota ioe mo le pasiaina o le pili o le paketi e aofia ai Fetu Fetui Jr, Vesi T. Fautanu Jr, Toeaina F. Autele, Legae’e P. Mauga, Maugaoali’i L. Anoa’i, Maeuta L. Mageo, Vaetasi T. Moliga, Faimealelei F. Allen, Manumaua W. Wilson, Vaeaitu M. Maluia, Puletuimalo D. Koko, Timusa T. Lam Yuen ma Atalina Asifoa.