Ads by Google Ads by Google

Pasia e le maota o sui tofiga a le Kovana mo Dr. Ruth Matagi-Tofiga


Le Fa’atonusili filifilia mo le Matagaluega o Aoga a le malo ia Dr. Ruth Matagi-Tofiga i le taimi o lana iloiloga i luma o le maota o sui i le taeao ananafi. [ata AF]

Ni isi o aiga ma uo sa lagolagoina le fa’amoemoe a le tama’ita’i fa’atonusili tofia o le Matagaluega o Aoga a le malo i le taeao ananafi, susuga Dr. Ruth Matagi-Tofiga i luma o le maota o sui. [ata AF]
ausage@samoanews.com

E 17-1 le palota na pasia ai e le maota o sui i le taeao ananafi tofiga a le afioga i le ali’i kovana ia Lolo Matalasi Moliga, mo le tama’ita’i foma’i ia Dr. Ruth Matagi-Fa’atili e avea ai ma Fa’atonusili fou o le Matagaluega o Aoga a le malo.

 

O lea fa’aiuga mai afioga i sui filifilia o itumalo taitasi i le atunu’u, na tu’uina atu ina ua mae’a se iloiloga sa fa’atautaia e le Komiti o Aoga a le maota o sui i le taeao ananafi, lea na maua ai avanoa o afioga i Faipule e fesiligia ai agava’a ma le tomai o le tama’ita’i foma’i e avea ai o ia ma ta’ita’i fou o le Ofisa o Aoga a le malo.

 

O ni isi o fesili sa fesiligia ai e afioga i Faipule le tama’ita’i foma’i, o ni fuafuaga ua ia sauni e fa’atino ina ia foia ai le fa’afitauli lea o loo fa’aauau pea ona tula’i mai i le Ofisa o Aoga, e le gata i le fa’aletonu o togi o fa’aiuga o suega a fanau aoga, ae o le to’atele fo’i o faiaoga ua alu lo latou taimi e saili ai fa’ailoga ona o le naunau ia si’i le totogi, ae fa’atamala ai i le fa’atinoina o le latou pito laau o le a’oa’oina lea o fanau aoga ina ia popoto ma atamamai.

 

Saunoa Dr. Matagi-Tofiga e fa’apea, e leai se isi auala e mafai ona fa’aleleia ma si’itia ai le auaunaga a le Ofisa o Aoga i le atunu’u, “o le galulue fa’atasi lea o tagata uma o le Matagaluega i ta’ita’i, faiaoga, puleaoga atoa ai ma i latou e faia fa’aiuga, ina ia fa’atula’i ni suiga lelei e manuia ai fanau aoga”.

 

I le 3 vaiaso talu ai ina ua tofia Dr. Matagi-Tofiga e avea ma Fa’atonusili le tumau o le Ofisa o Aoga, sa ia taua ai lona asia o aoga uma lava i totonu o le atunu’u, ma ia molimauina ai lu’itau e tatau ona foia ina ia si’itia ai i luga le tautuaina o alo ma fanau aoga a le atunu’u.

 

“E le o se galuega faigofie lea ua taoto mai ou te fa’atinoina, i le silia ai i le 13,000 alo ma fanau aoga i totonu o le atunu’u, 22 aoga Tulaga muamua, 20 Aoga Amata ma aoga maualuluga e 6, o se galuega faigata ma tele lu’itau, ae fa’amoemoe lava i le Atua fa’atasi ai ma le galulue fa’atasi o le aufaigaluega atoa ina ia manuia le fa’amoemoe”, o le saunoaga lea a le tama’ita’i fa’atonusili filifilia.

 

Saunoa le afioga i le ali’i faipule ia Gafatasi Afalava e fa’apea, o le fa’afitauli lea ua ia maitauina i le taimi nei, ua naunau tele faiaoga e saili fa’ailoga ina ia maua ai le totogi lelei, ae fa’atamala ai i lana pito laau o le a’oa’oina lea o fanau ina ia popoto.

 

Ae na fa’aleo e le afioga i le tama’ita’i faipule ia Vui Florence Saulo fa’afitauli o loo fetaia’i ma aoga i Tualauta, e pei o le to’atele o fanau aoga i totonu o le potu aoga, e le o lava fo’i nofoa ma laulau e fa’aaoga e fanau aoga i taimi o vasega.

 

Na fa’amaonia e Dr. Matagi-Tofiga le saunoaga a Vui e tusa ai o fa’afitauli i aoga i Tualauta, ma ia taua ai e fa’apea, pau aoga o loo tula’i mai ai lea fa’afitauli o le aoga Tulaga muamua i Pava’ia’i ma Lupelele, ae o loo galulue pea i auala e foia ai nei fa’afitauli.

 

O se tasi o mataupu na fesiligia ai le tama’ita’i fa’atonusili filifilia, o le polokalame e fa’atatau i le fa’aaogaina o le gagana Samoa (Dual Language) e a’oa’o ai fanau aoga, pe na te lagolagoina le fa’aauau o lenei polokalame pe leai, ae na saunoa Dr. Matagi-Tofiga e fa’apea, o le a vaavaai i ai i fa’amaumauga e tusa ai o lenei polokalame, ma afai o loo aoga, e tatau ona fa’aauau pea, ae afai e i ai ni fa’afitauli, ona toe vaavaai lea i ai.

 

Na taua e le afioga i le ali’i faipule ia Faimealelei A. Fu’e Allen le taua o le polokalame lea e fesootai ai matua ma faiaoga, ina ia silafia ai e matua le tulaga o loo i ai meaaoga a fanau i totonu o le potu aoga, aemaise lava tulaga o meaaoga e fai i le fale a fanau aoga (homework), lea e tatau ona galulue fa’atasi ai matua ma fanau i le tulaga lea ina ia fesoasoani ai i le mafaufau o fanau aoga.