Ua pasia e afioga i Faipule o le Maota o Sui pili tupe e 2 sa fa’aulu e le faigamalo a Lolo ma Lemanu, e faia ai suiga i tulaga o lafoga e fesoasoani ai i tupe maua a le malo mole lumana’i.

O le fa’aiuga a le maota o sui e pei ona pasia ai pili tupe e 2 a le faigamalo, na faia lea ina ua mae’a se iloiloga sui o le Komiti Tupe a le afioga i le ali’i kovana ia Lolo Matalasi Moliga, mo le fa’amaninoina o auala e toe siitia ai tupe maua a le malo i luga o lafoga.

O pili tupe e 2 ua pasia e le maota o sui, e aofia ai le pili e sii ai le lafoga o oloa eseese mai le 5% i le 8%, atoa ai ma le pili e sii ai le lafoga mo oloa o le ‘ava malosi ma le molo. O pili nei sa fa’aulu e le faigamalo a Lolo ma Lemanu i le tausaga ua mavae, a o lea fo’i ua toe tuuina mai i lenei tausaga e lalafo i ai finagalo o le Fono Faitulafono.

O sui o le malo na molimau i le iloiloga sa fa’atautaia e le Komiti o le Sailiga o le Tamaoaiga o le malo a le maota o sui, e aofia ai le Teutupe ia Ueligitone Tonumaipe’a, o le sui Teutupe ia Keith Gebauer, o le Faatonusili o le Ofisa o le Paketi ia Cathy Saelua, ma le Loia Sili lagolago ia Loralei Meredith.

Na taua e Tonumaipe’a i lana folasaga e fa’apea, o le tele o lafoga o oloa eseese a le malo o lo o i ai i le taimi nei, ua tele tausaga e le o toe faia i ai se suiga. O suiga e pei ona fuafua e le malo i lalo o tulafono tupe nei, o lo o fuafua e maua mai ai tupe fou e fesoasoani i le galuega faatino a le malo i le lumana’i, aemaise lava i le faatinoina o isi auaunaga e aofia ai le fa’aleleia o le soifua maloloina, atoa ai ma le faaleleia o le auaunaga a le Ofisa o Leoleo.

O le tupe e maua mai i le pili e sii ai lafoga o oloa eseese ua faatulaga, o le 75% e teu i le Teugatupe Tele a le malo, o le $1 miliona e alu i le polokalame o Sikolasipi a fanau aoga, ma le tupe e totoe ai e faasoasoa i galuega e pei o le faaleleia atoa ai ma le faafouina o faleaoga a le malo, faapea ai ma isi mea faigaluega a le malo.

Mo le pili e sii ai le lafoga i le ‘ava malosi ma le molo, na taua ai e le Teutupe e fa’apea, o le auala o lo o totogi ai le lafoga lenei i le malo i le taimi nei, e faigofie ona fai i ai e tagata gaioiga faasolitulafono, ina ia le mafai ai ona latou totogiina le lafoga sa’o e tatau ona totogi.

O lea faiga ua mafua ai ona le maua e le malo tupe sa’o sa tatau ona maua mai i le lafoga o le ‘ava malosi ma le molo. O nei faiga ua mafua ai ona a’e se lagona i le malo, ua tatau ona faia se auala e puipuia mai ai le malo mai le aafia pea lea i faiga le sa’o faapenei.

O le suiga e pei ona faia e le malo i le latou pili tupe, ua aveese le 190% sa masani ona totogi i le ava malosi o loo ulufale mai i le atunu’u, ae o le a laugatasia faipisinisi uma i le lafoga e .35 sene i le aofai e 12 aunese o le apa pia mai fafo.

Saunoa le afioga i le ali’i faipule ia Vailoata E. Amituana’i e fa’apea, e taua le fuafuaga a le malo e fetuunai ai le lafoga mo le pia ma le molo, pau lona popolega, ina nei avea ma itu e aafia ai ni isi o faipisinisi o lo o latou aumaia le pia i le atunuu i le maualuga o le lafoga, ae o lo o tau atina’e a latou pisinisi fou.

Na fautua le afioga i le tamaitai faipule ia Vui Florence Saulo i molimau, ina ia silasila toto’a i ni isi o tagata faipisinisi o lo o latou fa’atauina mai le pia mai le faleoloa o le Militeli i totonu o le atunu’u, ona o lea ma toe fa’atau atu i a latou faleoloa. Saunoa Vui e fa’apea, o le isi lea faiga o lo o ma’imau ai lafoga e tatau ona maua e le malo.

I le tulaga o le lafoga i le sikaleti, na taua ai e le afioga i le ali’i faipule ia Sataua Dr. Mataese Samuelu lona faanaunauga o lo o i ai, ina ia aofia ai ma le sikaleti lea ua ta’atele i le taimi nei, le ‘e-cigarette’, ina ia maua ai fo’i se isi tupe mo le malo.

Ua taoto atu nei i le maota maualuga pili tupe e 2 a le maota o sui ua mae’a ona pasia, mo le faia i ai o sa latou faaiuga, ae ua mae’a fo’i ona tauaao e le maota o sui pili tupe e 2 a le Senate na pasia i le vaiaso na te’a nei mo sa latou fa’aiuga.