Ads by Google Ads by Google

Osofa’i Leoleo nofoaga sa faia ai fefa’atauaiga o aisa ma feusuaiga

ausage@samoanews.com

Ua tapunia nei le nofoaga lea sa avea ma nofoaga e fai ai fefa’atauaiga o fualaau fa’asaina o le aisa ma feusuaiga ma tama’ita’i (tulou), ina ua fa’asea se tasi o tagatanu’u e ana le fale i Leoleo i le fa’aaoga e ni tagata o lona fale tu’ufua e aunoa ma se fa’atanaga, ma aga’i atu ai loa Leoleo e tali i le valaau.

 

O le fa’aiuga o le osofaiga a Leoleo sa fa’atinoina i le fa’aiuga o le vaiaso na te’a nei, ua taofia ai nei ni ali’i se to’alua sa maua atu ai i totonu o le fale, ona o tu’uaiga i le umia o fualaau fa’asaina ma se fana, ae o lo o tau sailia pea le isi ali’i e to’atasi, o ia lea o lo o taua i fa’amaumauga a le fa’amasinoga, o le fa’apogai lea o gaioiga uma sa faia i totonu o lea nofoaga.

 

O ali’i e to’alua ua molia e le malo e aofia ai le ali’i o Ioane Sakopo, lea o lo o tu’uaia i le moliaga mamafa o lona umia fa’asolitulafono o vaega o le fualaau fa’asaina o le aisa, atoa ai lona umia o se fana e le i lesitalaina, le tuaiga o le .22 (.22 caliber), lea na maua e Leoleo i totonu o se ta’avale pikiapu lanu pa’epa’e sa paka i luma o le fale, ua uma fo’i ona utu i ai pulufana, ma le ali’i o Wayne Gasolo, lea o lo o tu’uaia i le moliaga mamafa o lona umia fa’asolitulafono o vaega o le pauta fa’asaina o le aisa.

 

Na taua e le tagatanu’u sa fa’asea i Leoleo e fa’apea, e ui e le ola le uila ma le vai i lona fale tu’ufua lea, ae o ripoti ua ia maua mai ni isi o tagata, fai mai o lo o i ai tagata o lo o latou fa’aaogaina lona fale, o lo o fa’alogoina fo’i leo o leitio ma tama’ita’i o lo o feei ma pisapisao ai, atoa ai ma ta’avale o loo aga’i atu i le leva o le po i le fale.

 

E fetaui le taunu’u o Leoleo i luma tonu o le fale ae latou vaaia loa se pikiapu pa’epa’e ua sauni e tuua le nofoaga, ma latou taofia ai loa le pikiapu ae fesiligia le ave ta’avale, lea na mulimuli ane fa’atoa iloa, o ia lea o Sakopo.

 

Na maua e Leoleo i totonu o le ta’avale sa alu atu ai Sakopo se fana o le ituaiga, o le .22 ua mae’a ona utu i ai pulu i totonu. O isi mea faitino na maua e Leoleo i totonu o le ta’avale e aofia ai se paipa e fa’aaoga e ula ai aisa, o lo o i ai vaega o se pauta pa’epa’e i totonu, lea na su’e e Leoleo ma fa’amaonia ai, o vaega ia o le pauta fa’asaina o le aisa.

 

Na ulufale Leoleo i totonu o le fale ma latou aga’i atu i totonu o le isi potu, ma latou maua i ai ni paipa e fa’aaoga e ula ai le aisa, i totonu o ia paipa sa maua i ai vaega o pauta papa’e, lea na faia i ai se su’ega mulimuli ane ma fa’amaonia ai, o vaega ia o le pauta fa’asaina o le aisa.

 

Na fa’asolo le osofaiga a Leoleo i totonu o le isi potu, ma latou maua atu ai se ali’i, lea na mulimuli ane iloa lona igoa, o ia o Gasolo. Na vave gaioiga a Leoleo ma latou taofia ai le ali’i o Gasolo ae se’i saili totonu o le potu. I lea sailiga na maua ai e Leoleo se paipa o lo o i ai vaega o le pauta pa’epa’e. Sa maua ai fo’i e Leoleo i totonu o le potu ni straws se 2 ua uma ona tipi tulimanu, ae o totonu o le isi straw o lo o i ai vaega o le pauta pa’epa’e, lea na faia i ai se suega ma fa’amaonia ai, o vaega ia o le pauta fa’asaina o le aisa.

 

Sa maua ai fo’i e Leoleo i totonu o le fale ni tama’ita’i talavou se to’atolu, ma auina uma atu ai loa i latou i le Ofisa o Leoleo i Tafuna mo su’esu’ega.

 

Na taua e tama’ita’i e to’alua o lo o fa’aigoaina i laua i totonu o fa’amaumauga a le fa’amasinoga o O.P ma T.U i Leoleo e fa’apea, o le tele o taimi latou te feusua’i ai ma le ali’i o John Tuupo fa’apea ai ma isi ali’i e aga’i atu i le fale, ina ia mafai ai ona fesuia’i ma aisa.

 

E $10,000 le vaega tupe lea ua fa’atulaga e le fa’amasinoga e totogi ona fa’atoa mafai lea ona tatala ali’i e toalua ia ua taofia nei i le toese i Tafuna.