Ads by Google Ads by Google

Oso se taxi la’u pasese i totonu Fale o Tupulaga i Pago Pago


Foliga o le itu i luma o le Ofisa o Tupulaga Talavou i Pago Pago na afaina ina ua so’a e se taxi la’u pasese i le taeao ananafi. [ata foa’i]
ausage@samoanews.com

Na avea le moe o le ali’i ave taxi sa ia fa’afoeina se ta’avale la’u pasese ma mafua’aga na oso ai lana ta’avale i totonu o le nofoaga autu o Tupulaga Talavou i Pago Pago, i le vaveao o le aso Gafua na te’a nei pe tusa o le itula e 5:00 i le vaveao.

 

E leai se isi na maliu i lenei fa’alavelave e pei ona fa’amaonia mai i se ripoti mai le Ofisa o Leoleo, se’i vagana ai le pasese a le taxi na manu’a ina ua tau lona ulu i le tioata o le ta’avale, ma fa’anatinati atu ai loa lea ali’i i le falema’i mo togafitiga.

 

Na taua e se sui sinia o le Ofisa o Leoleo i le Samoa News le mae’a o a latou su’esu’ega sa faia e uiga i lenei fa’alavelave, ma ua tu’uina atu le ticket o le ave ta’avale fa’atamala i le ali’i ave ta’avale, e tusa ai o lona fa’amatala ua mafua ai ona tula’i mai lenei fa’alavelave.

 

“E i ai le malosi o le malo e faila ai se tagi fa’asaga i le ali’i ave ta’avale, ina ia totogi mea sa fa’aleagaina i lana ta’avale, o le itu la lena e le oo i ai le malosi o le Matagaluega o Leoleo, se’i vagana ai le fa’amasinoga. E mafai fo’i e le pasese na manu’a ona faila sana tagi savili i le fa’amasinoga e tusa ai o manu’a ua a’afia ai o ia ona o le fa’atamala o le ali’i ave ta’avale”, o le saunoaga lea a le sui sinia o le Ofisa o Leoleo.

 

O le vaega o le Ofisa o Tupulaga Talavou o lo o i ai le fale koleni na a’afia i lenei fa’alavelave, peita’i e lei i ai se isi i totonu o le fale koleni i le taimi na tula’i mai ai le fa’alavelave.

 

Na taua e se sui o le Ofisa o Tupulaga Talavou i le Samoa News le tapunia le tumau o le nofoaga o le fale koleni a le Ofisa sei mae’a galuega fa’aleleia ona toe tatalaina lea i le atunu’u.