Onosa’i i Mea Tiga

Vaega: 104

 

Alo maia, o le a toe fa’aauau atu la tatout ala, ae ia manuia le alo atu o le atunu’u i faiva ma tiute o le a feagai ai. Na muta mai la tatou tala, ina ua i ai le manatu o le tama o Lilo, o le a fa’aioa loa i lona tina le mea ua tupu i le to’alua o lona tuafafine o Filipina. Ae ua le taulau, ona ua sagai ane nei e fai le taumafataga ma talanoa fiafia, ae tu loa ma le toeaina o Lefefe.

 

O lea na fai le tala a Vesi e uiga i a Lefefe, ona o le vae ‘ai o le toeaina, ae na fai ane i ai le lo’omatua o Malia, “Ia outou fa’alogo lelei mai lava, o le a le finagalo o le Atua ia te a’u, ia outou alolofa ma tausi i si toeaina o Lefefe, e tutupu lava mea e avea, ma e sili fo’i ona manuia le na te foa’i, na i lo le na te taliaina, ia outou manatua lau tala le na.”

 

E uma loa le tala a le lo’omatua, ae saofa’i loa ma le toeaina, “Malia, malo lava le soifua manuia ia te oe le tina, ua a, ua fai sau fa’amalosi tino, ia va’ai, ou te tautala sa’o lava, na ou sosogi mai lava i lo’u fale, i le alu atu o le manogi o le sua’ia a le tamaloa lelei lene o Vesi.”

 

Ua alu nei le tali e, a Malia ma lana fanau, “Lepopoi, ia saofa’i mai loa tatou a’ai fiafia o lea ua vela mai le mea’ai na gao’o e Vesi, o a mai oe.?” Ua ‘ata Lefefe ma tilotilo ane ia Malia, na fa’apea mafaufauga o le toeaina, “E le uma lava tala lusi a le lo’omatua lenei, o lo’o manuia lava a’u Malia, fa’afetai fo’i i le Atua, o lo’o maua pea lou soifua laulelei ae maise fo’i le afioga i a Lilomaiava ia ma tama’ita’isa nei.”

 

“Lefefe, va’ai e le o ni taupousa fo’i nei e nonofo atu ua e iloa, alo ane loa e tali lau sua ma tatou talatalanoa, e a, e i ai se isi mea e te toe alu i ai, pe a uma fo’i i’inei ona e alu lea e fa’aosooso le inuina o le pu lu.”

 

Ua ‘ata’ata Lefefe, o le uiga o le tala a Luisa, ona ua fa’alogo i tala, o le toeaina o Lefefe lea e ta’ita’ia le faiga lea. “Luisa, e leai, e te iloa lava o a’u o se tagata e fa’apena, ua e va’ai mai nei, o lenei ua toetiti fuli i le lua, e le toe ioe mai Lonisi i a te a’u, ae tu’u ai pea ia, e fai le mea e loto i ai le lo’omatua latou, a Malia.”

 

Ua ‘ata le lo’omatua o Malia ma fa’asolosolo le aiina o le ‘ia i lea taimi e le i toe tautala, o lea e saofa’i i ona talane Filipina ma auau ane le ‘ia a si ona tina ma ‘ata i tala a Lefefe. Fai mai, o Lefefe, a tilotilo i ai le tagata, o se tama e ‘ese le tausa’afia o ona uiga, e aga malie fo’i, ae fai mai a fai mea o le aiga, e ‘au lava ma Malia.

 

Ae e i ai fo’i aso, fai mai, toe toe a pa’ilima Lefefe ma Malia, ae e uma lava, va’ai atu Mose ua toe talie mai. Ae a fai atu i ai Mose, ae sau le tali a le lo’omatua, “Mose ma le ‘ato ‘ofe, va’ai oe, se o mea o lo’o sau i le ata, e te le iloa lava na mea, ailoga na fa’amatamata oe e lou tama ma lou tina i se ata tifaga a le tama o Pusali.”

 

Fai mai, na o le lulu o le ulu o si toeaina o Mose, o uiga la ia ma mea ia a le lo’omatua e fai i si toeaina, o lea e galo gata ai i le lo’omatua. E le i umi, ae manava atu loa galuega a tama’ita’i o le aiga. Fai mai, e alu atu lava le solo ma tali e, ae le iloa, o lea e talie, ina ua o latou iloa atu si toeaina o Lefefe.

 

E le i umi ae tu fo’i ma le ta’avale a Loleta, ua fo’i atu, sa alu e asi nai ona tuagane i lona aiga, ma talatalanoa fo’i i nisi mea e fa’amautu ai si o latou aiga. “Mataniu, o le a le mea e ‘ata so’o ai ou gutu, ua pei oe o se tama’i teineititi, tu’u la’ia o au aga na e, te’i fo’i oe, ua va’ai mai le lo’omatua ua futi fa’atata atu lou ulu, savavali mai i le fale.”

 

E faia pea...

Comment Here