Ads by Google Ads by Google

Onosa’i I Mea Tiga

Vaega: 103

 

Ia manuia lou alo atu i faiva ma tiute o le a feagai ai i lenei aso, ae alo maia o le a toe  fa’aauau atu la tatou tala mo lenei aso. Na muta mai la tatou tala, ina ua taumafai nei Lilo e fa’ailoa i lona tina le mea ua tupu i le to’alua o Filipina, ae ulufale loa ma Filipina i totonu o le fale.

 

“Ia o le a le na, a lua talanoa lava na o oulua ae le ta’u mai ia te a’u, ou te fia faitatala fo’i a’u ia.” Ua tilotilo ane nei Lilo i si ona tuafafine i lea taimi, fai mai, ua liliu ‘ese le tama i lea taimi, ona ua le mafai ona taofiofi ona loimata. “Lilo, o le a le mea ua tupu, Malia, o le a le mea ua tupu ua fa’apea ai Lilo.”

 

Fai mai, e fai lava tala a Filipina ma a’apa atu ua si’i mai si ana tama, o le taimi lava na va’ai ifo ai Ali’ioaiga i foliga o lona tina, ua sa’a solo vae ma ‘ata a’e i lona tina. Na fa’apea ane nei le lo’omatua, “Ali’ioaiga, alu la’ia i lou tina e, ‘aua ne i e toe sau i a te a’u, e te va’ai mai o tau su’e se ta tupe e fai ai le taulaga i le Aso Sa, ae e fa’apena mai, ia fai la’ia i lou tina e au mai se tupe e fai ai le ta taulaga.”

 

Ua ‘ata Filipina ma tilotilo ane i si ona tina. Ua valusefulu tausaga o Malia, ae o lo’o va’aia pea lona malosi, ua le gata i le tino, ae ua fa’apea fo’i lona afaufau. A faitau le tusi paia a le lo’omatua, fai mai, e le fa’aaogaina e Malia se va’aiga, e faitau sa’o lava e le fa’aletonu.  O lona mafaufau fo’i, e sa’o lava, o ana tala fo’i e fai ane i lana fanau, e sa’o lava.

 

Fai mai, e pese le lotu i taeao uma lava, e pese fo’i le lotu i afiafi, ae e le misi se sauniga lotu i Aso Sa uma. O le va’aiga fo’i a tagata o le nu’u, o se tina ua sili ona malosi, o a fo’i fono a le aulotu e fai, e le misi lava le lo’omatua. Ua le mapu le fesili a Filipina i lona tuagane pe e le i maua mai lava se tala mai i lona to’alua.

 

Ua le tautala Lilo i lea taimi, ae e le i umi ae alu atu loa ma le solo a Luisa ma Vesi, e momoli ane le meatausami a le lo’omatua. E le i manava ane galuega a teine i lea taimi, ae ua taumafai nei Lilo se i fai ane se tala ona o le ua va’ai atu, ua i ai uma lona aiga i lea taimi.

 

Ua le iloa nei e Lilo po’o le mea o le a fai loa sana tala pe leai, ona e le o i ai Loleta i lea taimi. Fai mai ina ua taunu’u ane Luisa ma Lilo ma le mea’ai a le lo’omatua na saofa’i ifo nei i luga le lo’omatua, “E ta fe fe Vesi, ai fo’i o se sua’ia ta’i fa’afetai, le tautua Vesi, ia foa’i le Atua lou malosi, fa’afetai lava.”

 

E moni lava le i’ite a Malia, o le saka talo ua le fa’alifuina, ona ua matua’i lololo le sua’ia, o le ma’oi lea o le lo’omatua. O nisi fo’i aso, e saofa’i lelei lava Vesi i le umukuka e fai le tunu’ia mo le meatausami a le lo’omatua. Fai mai, ai na iloa ane e Vesi ma Luisa, ua i ai Lilo ma Filipina i le fale o si o latou tina, o lea na topetope ailoa le mea’ai, ma ua a’ai uma ai nei.

 

Ai ona o le fiafia o Lilo ona o lea ua fa’atasitasi nei ma nai ona tuafafine ma si o latou tina, ua te’i lava ua galo ‘ese atu ona mafatiaga sa i ai. Fai mai, ua olioli mai nei le lo’omatua i le sua’ia lea ua ta’atia nei, ma ua lauau ane nei e Vesi. O le mea ua tupu, fai mai, ua tau amata atu le ‘aiga o le sua’ia, ae tu ane loa ma le toeaina o Lefefe. “Leaga lava le toeaina e vae ‘ai tele, po’o fea fo’i na fa’amata pusi mai ai, ua na iloa ai o lea e ‘ai le tatou sua’ia.”

 

Ua ‘ata le lo’omatua o Malia i le tala a Vesi, ae na toe fa’apea ane, “Va’ai outou si a’u fanau pele, o le a le finagalo o le Atua ia te a’u, ia outou alolofa ma tausi i a Lefefe, o outou manuia na, e tutupu fo’i mea e avea, ma e sili lava le manuia o le e foa’i na i lo le na te talia.”

 

E faia pea...