Vaega: 101

Alo maia o le a toe fa’aauau atu la tatou tala. Na muta mai la tatou tala, ina ua fai nei le talatalanoaga a Lilo ma lona to’alua o Loleta e uiga i le to’alua o Filipina, le tuafafine lea o Lilo. Fai mai, ua na o le fesilisili nei o Filipina i lona tuagane pe na la talanoa ma lona to’alua, ae pe ua maua mai fo’i se tala, po’o fea o i ai. Ua o’o fo’i i le lo’omatua o Malia, na o le fesilisili po’o fea o i ai Lota, aua o le igoa lea ua fa’aigoa ai e le lo’omatua si tamaloa Palagi, o Roger le igoa, ae ua fa’aSamoa e le lo’omauta, ia o lea ua Lota ai si toeaina, ae le o Roger.

“Lilo, o le a le tala a le teine na fai mai ia te oe, se tautala mai, o le a le tala a le teine.?” Ua fafa le isi fesili i luga o le isi fesili i lea taimi, ua oso a’e le tiapolo i le loto o Loleta, ua le to’a le fafine, ina ua va’ai atu i le maligi ifo o loimata o si ona to’alua.

“Leta, o le tala a le teine na tali maia le telefoni, o ia o le to’alua fa’aipoipo o Roger, ua fitu tausaga talu ona la nonofo ma lona to’alua. Ua to’alua le la fanau, o teine e fa tausaga le isi, ae lua tausaga o le isi, Leta, a e alofa mai ia te a’u, ‘aua ‘aua lava ne i ta’uina ia Filipina lenei mea, e fai lava e le Ali’i le taimi ma le aso o mea uma, ia e alofa mai ia te a’u, ua e fa’alogo mai.”

Fai mai, ua na o le nofo o Loleta i lea taimi, ua le mautonu lona mafaufau, ua ‘ese fo’i lana fa’alogo, ua pei ai o le a tau oso se ma’i o le fafine. Ua u’u nei le fatu ma tilotilo ane i a Lilo, ma lona loto mafatia. “Lilo, o le a le mea o le a fai nei, e ta fia ola e, o le a le mea o le a fai i a Filipina, oka ta’i leaga lenei tamaloa, “Va’ai, e moni lava o’u masalosaloga, ona o uiga o le tamaloa e fa’aali i lo tatou aiga, e pei o se tamaloa e leai lava se mea o mamafa i lona loto, a’o lea la ua tula’i mai ai lenei fa’aletonu, oka, oka e, Lilo, e se mea a leaga o mea fa’apenei.”

“Loleta, ia ‘aua lava ne i iloa e Filipina lenei mea, ta fa’atalitali pea, pau le mea lea ou te mana’o i ai, ia maua lava se taimi ou te talanoa ai ia Roger, se fa’amatala sa’o mai lava e Roger le tala moni, ae onosa’i, ta fa’atalitali pea, e i ai lava le aso ta te talanoa ai ia Filipina, ae se i uma le masina lenei, ona fai loa lea o se isi fuafuaga.”

Ua fa’apea lava ona fai, fai mai, o le tele o taimi ua tau le ‘ai Lilo, o le tele fo’i o taimi, ua taumafai le tama ia ‘aua ne i talanoa i ona tuafafine, ae fai mai le tala, e nofo nofo le tama i totonu o lona fale, ma tilotilo atu i le fale o lona tuafafine ma ona loimata i taimi uma.

O le isi taimi, ua alu i le fale o lona tina e asi le tama a lona tuafafine, lea ua taofiofie le lo’omatua i ona talane, ua le toe mana’o le lo’omatua e ave’ese e se tasi. O se va’aiga fiafia na iloa nei e Lilo, aua ua taunu’u ane nei, ae fa’alogo atu o sau le pese a le lo’omatua, “Lue, lue pepe, tumutumu o la’au, a agi le matagi ua lue atu ma toe sau, a gau le la la, ua pau i le moega, malie oe pepe i lau fa’aluega.”

Ua tu Lilo ma soloi ona loimata, e musu ne i te’i ua iloa e lona tina, le lo’omatua o Malia. Fai mai, na ona va’ai mai lava o le lo’omatua ua ulufale lana tama, fai ane loa, “Ali’ioaiga, ia o lea ua afio mai Lilomaiava e asi mai ta’ua, e a, va’ai i le manaia, ia ai fo’i ua sau ma au mai se ta tupe e fa’atau ai sou napekini, anusa, ta’i leva ona alu lou tama, ai ua alu i se va’a tu’u sa’o.”

E faia pea...