Vaega: 95

Na muta mai la tatou tala ina ua taunu’u i le fale le lo’omatua o Malia ma lana fanau, ae o lea ua tau vaovao mai ai ma tama’ita’i o le fanau a Vesi ma Luisa fa’apea ma le fanau a Lilo ma Loleta, ona o le fia o o teine e asi le tuafafine ma le uso o o latou matua.

Fai mai, a’o le i avea Filipina i le falema’i, ua uma ona talatalanoa le aiga, e uiga i le fa’aipoipoga a le tama a Vesi ma Luisa, le teine matua o Malia Matalena. O le isi lea itu ua fiafia ai le loto o Filipina ina ua o latou feiloa’i ma le tama o le a avea ma fesoasoani mo Lanuola i aso uma o lona olaga, o se tama e tausa’afia ona uiga.

Fai mai le tala, o le aso muamua lava na o’o ane ai le taule’ale’a e va’ai le aiga o Matalena, e le i toe fa’atali le lo’omatua o Malia, sa ia taliaina ma lona loto fa’afetai le o’o ane o Talitiga e fia nonofo ma Malia Matalena. Ua malilie foi i ai Vesi ma Luisa, ma ua o la lagona le fiafia, aua o le a o la va’ai i si a la tama ua nofo lelei ma taumafai mea uma o le aiga.

E moni lava le upu, e au le inailau a tina, aua o teine uma fanau a Lilo ma Loleta, o teine uma fo’i le fanau a Vesi ma Luisa, a’o lea ua fa’atoa maua se tama, ina ua ola le tama’ita’i o Filipina. ina ua logo e Lilo i lona tina o Malia o le tama le tama a Filipina, fai mai, na tagi le lo’omatua, aua ua fiafia lona loto ua  maua se tama i totonu o le aiga.

Fai mai, o talotaloga ia a le lo’omatua, ia maua se tama e fai ma tuagane o si ana fanau teine lea ua va’ai i ai ona mata. E nofo nofo lava Malia i isi afiafi, te’i lava ua maligi ifo ona loimata. “Mose, ma’imau pe ana e nofo mai, se i e va’ai i si a ta fanau, ae ui i lea, e le galo lava oe, e le gata i ou uiga lelei, ae maise fo’i o ou uiga fa’ataulaitu e tau pe ai lo ta fatu.” E fai fai lava, ‘ata le lo’omatua i ona lava mafaufauga e uiga i si toeaina ua alu ausulusulu na o ia lana malaga.

Se i o tatou liliu ane e va’ai po’o fea ua i’u i ai le tausiga ma’i a Luisa ma Mareta lea o lo’o i le falema’i mo le va’aiga o Filipina. Fai mai, na ona matala lava o le pupuni o lo’o taoto mai ai Filipina, e le i toe fa’atali le teine o Luisa, sa savali atu nei ua fusi mau si ona uso, “Pina, fa’afetai i le Atua, ua e toe malosi mai, toetiti lava a tupu le fa’alavelave ia te oe, o le a le mea na tupu.”

Na ta’u ane nei i ai e Filipina, fai mai, ua tau le mafai ona o’ono, a’o lea ua ta’u ane e le foma’i, e iva pauna o lana tama, o le tama. Ua talatalanoa fiafia nei, ma na toe ta’u i ai e Lusia, o lo’o fa’atali mai i fafo si o la tausoga o Mareta, na o latou o ane i le falema’i, ae ua o Lilo ma Loleta i le fale e va’ai le lo’omatua, ma toe ave le lo’omatua i lo latou aiga.

Na toe fesili ane lava Filipina, “Luisa, fai ia Lilo fa’amolemole e su’e le mea o lo’o i ai lo’u to’alua, e ta’u i ai, e ‘aua le popole ai o lea ua ou ola.” Na tali Lusia, ua lelei, o le a fai le mea ua mana’o ai. Na alu ane nei le foma’i, ma talatalanoa ma Luisa ma Filipina, ma ta’u loa i ai e le foma’i, ua sologa lelei mea uma, o le pepe fo’i, o lo’o malosi, ae e sili pe a fai pea e i latou le fuafuaga, ae e te’a lava i tua Filipina i le tolu o aso, se i toe fai nisi ona su’esu’ega, ona te’a ai lea i tua.

E faia pea...