Onosa’i I Mea Tiga

Vaega: 94

 

Na muta mai la tatou tala, ina ua toe fo’i nei Malia ma lana fanau i lo latou aiga, fai mai, i le taimi na fai ai le fa’amavaega a Malia ma si ona uso, ua pei o tama’itamaiti, ua fetagisi nei ma fusi le tasi le isi. O uiga ia o le lo’omatua o Malia, ua iloa e lana fanau. E alofa i ona uso ma si ona tuagane e to’atasi, ua maliliu uma ae toe lava o Malia ma si ona uso lea o lo’o soifua mai.

 

O le taimi lea, ua toe ma’itaga fo’i Loleta, ma afai ae ola, e to’atolu ai le la fanau, ae fai mai le tala, o Mataniu, o le au lea a le lo’omatua o Malia. Ua iloa uma lava lea tulaga, aua e fai mai lava le lo’omatua o Mataniufeagaimaleata i mea uma. O lea fo’i la, e fai lava e le teine mea lelei mo si ona tina, aua ua ta’u tina lava Malia i a Mataniu.

 

O lea fo’i la ua nonofo fa’atasi Mataniu ma le lo’omatua i lo la fale, ae o lo’o nonofo fo’i Filipina ma lona to’alua o Roger i lo la’ua fale. Ua fa’apena Vesi ma Luisa ma si a la fanau teine, ua matutua fo’i le fanau a Vesi ma Luisa. Ae fai mai, e le mafai ona tu’ua e Lilo le fanau a si ona tuafafine o Luisa. A’o le i avea Filipina i le falema’i, ua uma ona talatalanoa ma fetufa’ai i le fa’aipoipoga a le tama’ita’i o Malia Matalena, le tama a Vesi ma Luisa.

 

O le isi lea itu na popole i ai Lilo, ona afai ae tupu mai lenei fa’alavelave i lona tuafafine o Filipina, o lona uiga, ua tele lava le avega o le a tauamo. O lea sa ia lagona ai le loto fa’afetai ma lona loto fiafia i lea taimi. Ua fai nei le talatalanoaga a Malia ma lana fanau.

 

Fai mai, ina ua iloa e le toeaina o Lefefe, ua na o le nofo ma punou i lea taimi, a fa’ate’ia fo’i ia i lea tala, aua na te le iloa le mea o lo’o tupu. Ae fai mai, ua uma ona fa’amatalatala i ai e Vesi mea uma i le toeaina. O le fesili muamua lava a Lefefe, po’o a mai le lo’omatua, ae na tali Vesi, o lo’o manuia lava Malia.

 

O le taimi lea, o lo’o talatalanoa pea Luisa ma Mareta i le falema’i, ua uma ona fai si a la fa’amalosi tino, o le mea’ai na alu ane ma Lolesio, le tuagane o Loleta. Na fa’atali pea i la’ua nei, se toe fai ane se tala a le tama’itai tausima’i, ona fai loa lea o a la fuafuaga pe o i le fale, pe nonofo ai pea i le falema’i.

 

E le i umi, ae toe savali ane le tama’ita’i tausima’i, fai mai, ua sui le tama’ita’i, ona ua sui fo’i le taimi o uati a tama’ita’i tausima’i. Na iloa mamao atu lava e Luisa le savali ane a le tama’ita’i tausima’i i le itu o lo’o la nofo nofo ai. Na fesili nei le tama’ita’i po’o ai o i la’ua e igoa ia Luisa, na tali ane i ai Luisa o ia. Na toe fa’apea ane le tama’ita’i, o lo’o fia va’ai ma fia talanoa Filipina ia te ia.

 

Fai mai, e pei o le ‘emo o le mata le tu a’e i luga o Luisa ma savali loa i le potu na fa’asino ane e le tama’ita’i tausima’i ia te ia. Na toe tilotilo mai nei i si ona tausoga o Mareta, ae na fai ane i ai Mareta e alu ia, ae o le a fa’atali atu. Ua fa’apea lava ona fai. Fai mai, na ona toso lava e Luisa o le pupuni, tagi loa ma a’apa ifo ua fusi atu si ona uso i lea taimi.

 

E faia pea...

Comment Here