Onosa’i I Mea Tiga

Vaega: 93

 

Alo maia, o le a toe fa’aauau atu la tatou tala. Na muta mai la tatou tala, ina ua fetaui lava le feosoi o teine i totonu o le ta’avale o le a o i le falema’i e va’ai Filipina, ae tu loa ma le ta’avale a Lilo, Loleta ma lo latou tina matua o Malia.

 

Na oso vave mai nei i fafo Loleta ma fesili loa i a Mataniu, po’o fea o le a o i ai, na tali Mataniu e fia o e va’ai Filipina. Na toe tali ane i ai lona tina, e nonofo, ma o mai i le fale, e i ai le mea o lo’o fia talanoa ai Lilo ia i latou e uiga i le ma’i o Filipina. Na lagona e Mataniu le fa’anoanoa, ae na usita’i i le fa’atonuga a lona tina ma ua toe feosofi mai ioa i fafo mai le ta’avale.

 

Na savali sa’o atu lava Mataniu ua ta’ita’i mai i fafo lona tina, o Malia, ma ta’ita’i loa i totonu o le fale. Ae fa’alogo mai Mataniu, ua tau pole atu e lona tina ia lona uso o Ataata i lea taimi. Na vala’au mai nei i ai le lo’omatua o Malia “Loleta, ‘aua le faia le teine, se o tou uiga a na ou te le fiafia ai, ‘aua le faia fua le teine.”

 

“Ataata, e te va’ai i ai pe a au mai lou lipoti e fa’aletonu mai e, ua e laki o le lo’omatua, ae e te va’ai fo’i i ai e va’ai mai fo’i ua e alu atu ua ‘oti fa’asolo atoa lou ulu, tau polili teuteu mai au amio e.” Ua le tautala Ataata i lea taimi, ae ua savali sa’o nei i lona tama. “Papa, e ‘ese a uiga o Mama ia, fai mai lava ia o a’u e leaga.”

 

Ua ‘ata Lilo ma a’apa ane ua fusi si ona afafine i lea taimi, “Ata, ia e fa’alogo ma ia e usita’i, ‘aua lava ne i o’u toe fa’alogo atu i sau tala e toe tali ai i lou tina, e sa sa lava ona ou fa’alogo atu i ai ua e fa’alogo mai.” Ua tu Ataata ma ata, ma a’apa ane ua u’u mai le lima o lona tama ma savavali loa i totonu o le fale.

 

E taunu’u ane i totonu o le fale, ua saofafa’i mai ai Lefefe, Vesi, Mataniu ma le lo’omatua o Malia. Na fa’ate’ia Lilo ina ua va’ai i a Lefefe, ae na musumusu ane i ai Vesi, na te’i ina ua tu ane le toeaina, e le o iloa lava la e Lefefe le mea lea e tupu.

 

O le manatu o Lilo, ia ‘aua ne i iloa e se tasi, ae paga lea, po’o a lava mea e taumafai le tagata e natia, e iloa lava, ai fo’i ua mafua ona o’o ane Lefefe i lo latou fale, ona ua i’ite le toeaina i le va’ai mai, o alu le ta’avale a Filipina lea na o ai Luisa ma le lo’omatua.

 

Ua le toe tautala Lilo i lea taimi, ae na fa’ate’ia, ina ua fa’alogo atu o fa’apea le tala a Vesi, “Malia Matalena, o fea na tou tau o i ai, ua tou tutu a’e lava, tou feosofi i le ta’avale ae leai se isi e tautala mai, ana tou o o nei, tutupu mai ni fa’alavelave, o le a le mea tou te fai, se tu’u mafaufauga na fa’atamaiti, ua outou matutua.”

 

Ua le tautala Malia i lea taimi, o le afafine matua lea o Vesi, ae ua tilotilo ane i lona tama, “Vesi, o matou na matou tau o i le falema’i e asi Filipina, ia a’o lea ua taunu’u mai le lo’omatua, ia ua tu’u fo’i.”

 

E faia pea...

Comment Here