Vaega: 87

Alo maia, o le a toe fa’aauau atu la tatou tala. Na muta mai la tatou tala, ina ua tamo’e mai nei le tama’ita’i tausima’i i le mea o lo’o nonofo atu ai Lilo, Luisa, Loleta ma Mareta. Fai mai, na ona iloa mai lava e Lilo le tamo’e ane a le tama’ita’i tausima’i, tu loa i luga ma tamoe mai e fa’afetaui le tama’ita’i tausima’i.

“E i ai se mea ua tupu, ta’u mai, o a’u o le tuagane o Filipina, fa’amolemole ta’u mai.” Ua tu le tama’ita’i tausima’i ma tilotilo ane ia Lilo. O le se tama e lalelei ona foliga, ma ua mautonu ai i le manatu o le tama’ita’i tausima’i, e moni o le tuagane lea o Filipina, ona e lalelei fo’i le tama’ita’i o lo’o i totonu o le potu o le falema’i.

Na fia iloa e le tama’ita’i tausima’i, po’o ai le igoa o le tama, na tali ane i ai Lilo, o lona igoa o Lilo, ae po’o le a le mea ua tupu, pe i ai se fa’alavelave ua tupu i lona tuafafine. Na tali ane i ai le tama’ita’i tausima’i, “Lilo, ua i ai le mea ua tupu, ua ola lou tuafafine o le tama lana tama, ae o lo’o tau togafiti pea lou tuafafine i le taimi lenei, ua le mafai e si teine ona manava, ma ua te’i lava ua va’ai atu foma’i ua pe lona fatu.

“Ae na tuli mai a’u e le foma’i, e logo mai outou, ae ‘aua tou te popole, fa’atali mai pea se i ma’ea lelei su’esu’ega a foma’i ona ou toe sau lea e toe logo vave mai outou, ae ia outou loto tetele.”

Na fetaui lava le tala lea a le tama’ita’i tausima’i, ma le taunu’u ane loa o le tamo’ega a Luisa, Loleta ma Mareta. Fai mai, na ona a’apa atu lava o Loleta i le lima o lona to’alua o Lilo, tagi loa ma le tama. Ua le mautonu ai manatu o teine, aua ua va’ai atu nei, ua pei o timuga le maligi ifo o loimata o Lilo i lea taimi.

Na taumafai nei Loleta, e fa’ato’ato’a le loto o si ona to’alua, ae ua amata ona fetagisi atu ai ma Luisa ma Mareta, “Lilo, e i ai se mea ua tupu ia Filipina, Lilo, tautala vave mai, o i ai se mea ua tupu i a Filipina.” O le aunagi ane lea a lona tuafafine o Luisa, ae ua le tautala le tama i lea taimi.

Na u’u nei e Loleta le lima o lona to’alua, ma taumafai e ta’ita’i ane i le nofoa lea sa o latou nonofo ai. O le taimi lea, ua le iloa e Luisa ma Mareta le mea o le a fai, ona o lea lava e va’ai atu ua ‘ese uiga o Lilo i lea taimi. Ua na o le punou o Lilo ma tilotilo atu i le isi itu, ma na iloa lelei lava e Lilo, o le itu lea, sa toso i ai e ali’i foma’i le moega o si ona tuafafine ina ua uma ona fanau, lea na logo ane ai i latou e le tama’ita’i tausima’i.

“Mareta, e pei lava ua i ai se mea ua tupu i si o’u uso, e talofa e, ia Pina, ae po’o a mai si ana tama, pe o ola pe leai, Mareta, talofa e, po’o a mai si o’u uso, e se mea a leaga o mea fa’apenei.” Ua saofa’i ifo nei i lalo Luisa ma ona loimata, a’o le taimi lea, o lo’o taufa’ato’ato’a pea e Loleta lona to’alua o Lilo, ona ua ‘ese lava le va’aiaga a Loleta i si ona to’alua i lea taimi.

E faia pea...