Ads by Google Ads by Google

Onosa’i I Mea Tiga

Vaega: 85

 

Ae alo maia, o le a toe fa’aauau atu la tatou tala. Na muta mai la tatou tala, ina ua ma’ea le fa’aipoipoga a le tama’ita’i o Filipina, lea sa alo i ai aiga ga lua, i ona itu tetele ma ona itutaulagi, e fa’atino le aganu’u ua tatou masani ai.

 

E ui fo’i ina fa’apea o le to’alua o le tama’ita’i o se ali’i papalagi, ae sa fai lava fa’aaloaloga e aiga, e tali atu ai ma le loto fa’afetai ua i’u manuia fuafuaga uma. Ua fa’asolosolo pea aso o le soifuaga, ma o le tele lava o mea o lo’o fa’atino i totonu o le aiga, e galulue fa’atasi ai Lilo ma le tamaloa o Vesi, ua tu lelei le aiga, ua le toe i ai se tulaga o le tau fa’asoasoa, aua ua fesoasoani malosi le tama’ita’i o Filipina ae maise fo’i o le tama’ita’i o Mataniu i le fa’amautuina o le aiga.

 

Ua ma’itaga Filipina, ma na lagona le fiafia o le lo’omatua o Malia, o le taimi lea ua fitusefuluiva tausaga o le lo’omatua, ae o lo’o va’ai pea lona malosi. Fai mai le tala e le i ola Filipina, ae ua uma fo’i ona nofo le lo’omatua ma fai le igoa, na fa’apea ane ia Filipina, “Pina, afai lava o le a le finagalo o le Atua i lou ola, ou te mana’o ia fa’aigoa lau tama pe afai o se teine i le igoa,  Levalasi, ae a ola a’e o se tama ia fa’aigoa ia Ali’ioaiga.”

 

Fai mai, ua le tautala le tama’ita’i, ona o lona manatu fo’i i si ona to’alua, le ali’i palagi o Roger, e tatau fo’i ona i ai se leo o le tamaloa latou i se igoa e fa’aigoa ai si a la tama pe afai e ola mai. Ona i ai lea o le manatu o le teine, afai o le igoa lea ua mana’o i ai si ona tina, o le a faia lava, ae e tatau ona i ai ma se igoa mai i si ona to’alua e fa’alua ai.

 

Ua ma’ea ona fau le fale e nonofo ai Filipina ma lona to’alua palagi i totonu o fanua o le aiga, o le mana’oga lea o Filipina na mana’o e fai e lona to’alua, ia fai sa la fale ina ia latalata ai i si ona tina, fa’apea ma si ona aiga. Ua ma’ea la le fale mautu o Filipina ma lona to’alua, o se fiafia sili lea i le lo’omatua o Malia, ae maise fo’i o Lilo ma Loleta, o Luisa ma Vesi, ae maise o le fanau a Luisa, ona e fiafia tele ma alolofa tamaiti ia Filipina.

 

O aso uma e alu ai malaga a Roger i isi atunu’u, e nofo to’atasi lava na o Filipina i la fale i le taulaga. O le ala fo’i lea na naunau ai le teine ia fo’i i si ona aiga, e fesoasoani malosi i si ona tuagane ma si ona uso, aua e leai nisi o le aiga.

 

Na va’aia e tagata o le nu’u le atian’eina o le fatu aiga a le lo’omatua o Malia ma lana fanau, ua sili atu mea ua o latou maua i le taimi lenei, na i lo le taimi a’o soifua si toeaina o Mose. Fai mai le tala, e alu alu lava se talanoaga, te’i lava ua va’ai atu i le lo’omatua ua punou na soloi ona mata, ma ua iloa fo’i e tama’iti ua o’o fo’i mafaufauga o le lo’omatua i le toeaina.

 

Ua fa’au’u Mataniu mai ana a’oa’oga, fai mai o se fiafiaga sili lea i a Lilo ma Loleta, o le teine, o lo’o taumafai e ave lana fa’afoma’i.  O lea ua pasi uma mataupu a le teine, ma o le ala lea ua lagona ai le fiafia tele o le aiga. O le fanau fo’i a Vesi ma Luisa, ua faigaluega lelei uma tama’iti, e leai se isi o toe ola falolo.

 

Ua o’o i le tasi aso, a’o fai se talatalanoaga a Filipina ma lona tina, fa’apea lona uso o Luisa, na fa’ate’ia, ina ua va’ai mai, ua vili tiga le tama’ita’i, o lona uiga, ua o’o i le taimi e fanau ai. A’o le aso lea, o lo’o alu ai le faigamalaga a lona to’alua o Roger e ave le va’alele e aga’i atu i Ausetalia, ae ua nofonofo nei Filipina ma lona tina ma lona aiga.

 

E faia pea...