Ads by Google Ads by Google

Onosa’i I Mea Tiga

Vaega: 82

 

Alo maia, o le a toe fa’aauau atu la tatou tala. Fai mai, ua o’o i le aso o le fa’aipoipoga a Filipina ma le ali’i Palagi o Roger, ae a fa’aigoa e le lo’omatua o Malia si ali’i palagi ua igoa ia Lota, ia fika ane ia e oe, po’o le a le igoa Samoa o si tama, aua o lea ua fa’aigoa e le lo’omatua ia Lota.

 

Fai mai tala, o se aso ua sili ona matagofie, e moni lava e leai se paolo o le fa’aipoipoga a Filipina, ae na masi’i mai le aiga o Roger mai atunu’u mamao. Ua i ai matua o le tama, o ona uso e to’alua ma ana uo. Sa uo sili le uo mamae a Roger, o lo’o la va’ava’alua i luga o galuega, aua o Roger o se ali’i kapeteni i va’alele tetele.

 

O se mitamitaga tele lea i a Malia, ina ua ia  va’ai ma ua ia mautinoa ua manuia le olaga o si ana tama teine o Filipina. Ua o tatou iloa fo’i, po’o le lava le tele o mea, ae a aunoa i tatou ma le alofa, ua leai se aoga o mea uma. Ae i le va’ai a le aiga o Filipina, o se tama e loto alofa le ali’i o Roger, ma na fa’ate’ia le tama ina ua va’ai atu, ua sau soli le aiga o Filipina.

 

Manatua fo’i, na pau tagata o lo’o va’ai pea i ai le Palagi pe a o’o ane ma Filipina i le fale o Filipina, ua na o Malia, o Lilo, Loleta ma le la fanau e to’alua, o Luisa  ma Vesi ma le la fanau, a’o le aso o le fa’aipoipoga, fai mai, ua fa’ate’ia le tama ina ua va’ai atu, sole, ua matua’i tumu lalo nei, i le to’atele o tagata.

 

Na i’u lava ina musumusu ane Roger i lona to’alua o Filipina ina ua o’o i le taimi o fa’aaloaloga masani a si o tatou atunu’u, “Pina, who are all these people, your family.” Ua ‘ata le teine fa’aipoipo ma tali ane i lona to’alua, “Yes, when you marry me, you marry my whole family clan.”

 

Fai mai ua ‘ata le tama ma tilotilo ane i nai ona matua ma lona aiga i lea taimi, ae fetaui le tilotilo ane a le tama, ua tau fiu e su’e lona tina ma lona tama, ae va’ai atu, ua i luga o le foloa, o lo’o sisiva lona tina ma le isi soga’imiti, ae o lo’o sisiva mai lona tama ma le lo’omatua o Lonisi.

 

Ua ‘ata le ali’i Palagi ma lulu lona ulu, ma a’apa ane ua u’u atu le lima o lona to’alua o Filipina. Na fa’apea mafaufauga o le ali’i o Roger, “O, to’o many, too many people, one family, cousins, uncles, anties, oka, oka, uma lava pisupo.”

 

Fai mai le tala, po’o le a le alu o le lo’omatua o Malia i le to’oto’o, na va’aia e tagata uma na auai le malosi o le lo’omatua. Ua fa’ata’atia ‘ese e Malia le to’oto’o, ae afe i luga lona ie ma fa’aaliai lana malu matagofie. Fai mai, ua tete’i tagata sa auai, aua e leai se isi na iloaina, ae ua na o lana fanau lava ma si ona to’alua o Mose. O le malu a le lo’omatua e nonofo lava ma Mose ua leva ona ta e le ta tatau a lona nu’u, ina ua avea o ia ma taupou.

 

O lea la ua matua’i fuli le lo’omatua e fa’aaliali i lea aso, ua na o le fe’emo o mea pu’eata a le aiga o Roger, ona o le pa’epa’e o le lo’omatua, ua matua’i matagofie ai le mamanu o lana malu. 

 

Ua na o le ‘ata o Lefefe ma pati ona lima ma vala’au atu i a Malia, “Mataniufeagaimaleata, alo i ou faiva, tago i ai, tago i ai, ‘aua lava ne i toe tu’ua se mea, lalo, lalo, oi ta fefe, letioa a lagilagi le aso, lea ua sa’asa’a le afioga ia Mataniufeagaimaleata, tago i ai, ae fai fai lamu, fai fai lamu, va’ai se lo’omatua i pa u.”

 

E faia pea...