Onosa’i I Mea Tiga

Vaega: 81

 

Alo maia, o le a toe fa’aauau atu la tatou tala. Na muta mai la tatou tala, ina ua maliu le toeaina o Mose, ae ua ola mai le isi afafine o Lilo, lea ua fa’aigoa nei e le lo’omatua o Malia, ia Ataataotaulelei, ma o le igoa lea o le tina o Mose.

 

Ua mou malie ‘ese tiga ma faigata na o’o ia Malia ma lana fanau, ae ua amata ona toe fo’i le aiga i le tulaga sa i ai, e ui lava ina ua le toe nofoia le nofoa o Tavita, ae sa talia ma le onosa’i tiga ma mafatiaga uma na o’o i ai le aiga. Fai mai, o uiga o Loleta sa i ai muamua, ua matua’i suia mea uma, ona o lona alofa ma le fa’amaoni ia Lilo. Ua lagona le salamo i lona loto ma ua suia ai nei le olaga o Loleta i se suiga lelei.

 

Ua fai fai mea fiafia nei ma tuafafine o Lilo, le teine o Luisa ma le teine o Filipina, ua talatalanoa ma fetufa’ai i mea e lelei ai lo latou aiga. Ua amata ona talatalanoa le aiga mo le fa’aipoipoga a Filipina ma le ali’i Palagi lea ua uma ona o’o ane i le fale. Fai mai le tala, e ‘ese le tamali’i o uiga o le Palagi, ma na iloa lelei lava e le lo’omatua o Malia.

 

O nisi o taimi, e fa’apea tala a le lo’omatua, “Se ma’imau pe ana lelei lata nanu, se manu e va’ai i ai le ali’i lea, ia ae soia ia, aua na tuli atu e matua e alu e a’o le ABC, ae alu atu fai le fa’ata pinesulu i le auala, ia o le ‘afu lava lea, lea la ua sau le palagi, ae ua le iloa nanu.”

 

Fai mai, a fai fai tala a le lo’omatua, fa’alogo atu lana fanau, ua tagi, a le o le na fo’i, e fai fai lava ana tala fa’apea ane, “E talofa e, ia Mose, ua alu fa’asulusulu lava, ma ua alu to’atasi lana malaga, ua leai se isi e fai atu i ai a ta tala.”

 

Fai mai, ua uma ona apoapoa’i Lilo, Luisa ma Vesi ia Filipina, ia taumafai e tu’u ‘ese si o latou tama, e moni lava e le toe va’aia lona tino, ae o lo’o tumau pea ona uiga i o latou loto, ae mo le fa’amalosi au mo si o latou tina, ia onosa’i ma tatali tiga uma ua o’o mai. O le mea lea ua taumafai ai lava le teine ina ia fa’atoatoa lona mafaufau.

 

Ae fai mai, o le ofisa o lo’o faigaluega ai Filipina, ua iloa uma e tagata, aua e alu alu ava, te’i ua fiu e su’e, ae o atu o nofo mai i lalo o le la’au o lo’o i tua o le falefaigaluega ma tagi ai. E tasi lava le mate a le aufaigaluega, ai fo’i ua mafaufau le teine i si ona tama.

 

O taimi uma e o’o ane ai Filipina ma lana uo i le fale, o se mea fiafia lea i le lo’omatua, aua po’o le a lava le fai mai e le lava le simili a le lo’omatua, a fuli Malia e fai taga i ona lima ma ona mata, ua na o le ‘ata o le Palagi i le lo’omatua. Ua fai lava la ma o’o ane le Palagi i le fale, ona ua iloa nei e Filipina, o se tulaga lea e fa’afiafia ai si ona tina.

 

Ua latalata le aso o le fa’aipoipoga, fai mai, o se tulaga na lagona ai le fiafia, ma ua suia fo’i le fa’anoanoa i le fiafia. Ua tapena mea uma, ae sa finau lava le lo’omatua i le aiga o Mose, e tatau lava ona i ai sina fa’aSamoa, ina ia iloa ai fo’i e le ali’i Palagi tu ma agaifanua a si o tatou atunu’u. Ua fai le mea na loto i ai Malia, ma o lea ua alo loa le aiga, o Mose fa’apea ma le aiga o Malia mo le tapenaina o le fa’aipoipoga a Filipina.

 

E faia pea...

Comment Here