Ads by Google Ads by Google

Onosa’i I Mea Tiga

Vaega: 80

 

O le vi’iga ma le fa’afetai tatou te fa’afo’i atu pea i le Atua, ona o Lona alofa ma Lona agalelei mo i tatou i aso uma o lo tatou ola.Alo maia e faaauau le tatou tala.

 

Ua fa’asolo pea aso o le olaga, fai mai, ua fa’asolosolo ina matua le teine o Mataniu, ma o se va’aiga fa’afiafia loto i a Lilo ma Loleta le va’ai atu i le tuputupua’e o si a la tama, o se teine e usita’i ma fa’alogo ia i la’ua. Ua toe manuia Loleta, ma ua fanau mai o se tama teine fo’i, ua fa’aigoa fo’i e le lo’omatua o Malia ia Ataataotaulelei. O se igoa ua leva ona mafaufau i ai le lo’omatua, fai mai e le sao se igoa a le aiga o Loleta i le va lea.

 

Fai mai le tala, o le aso na fanau ai Loleta i lana tama teine lea, o le aso fo’i lea na maliu ai le toeaina o Mose. O lea la ua fa’aigoa nei e Malia i le igoa o le tina o Mose o Ataata, a’o lona fa’aumiina o Ataataotaulelei. O se aso na va’aia ai le loimata maligi i totonu o le aiga o Malia ma si ana fanau. E le gata i lea, ae fa’apea fo’i le nu’u ma le Ekalesia, fa’apea ma le aiga o Mose.

 

Fai mai le tala, e moni lava e i ai uiga o le toeaina e mana’o ia fai lava le mea o lo’o loto i ai, ae sa i ai suiga lelei i lona soifuaga. O mea uma a le nu’u, e tautala lava Mose, ona o le suafa matai o lona aiga na pale ai mo tausaga e tele. Ua maliu Mose, ae ua fa’asolosolo matua le soifuaga o le lo’omatua o Malia, ae fai mai, e le mafai ona galo i le lo’omatua le toeaina, i le la mafutaga.

 

O le tausaga fo’i lea, na ta’uta’u ai le fa’aipoipoga a Filipina, ae fai mai le tala, ai ina ua mautinoa e le toeaina o Mose, o le a fai le to’alua o si ona afafine, ua malie fo’i i ai lona loto, ae o le lo’omatua o Malia, fai mai ua mimita le lo’omatua, ina ua o’o ane Filipina ma le ali’i Papalagi o le a la fa’aipoipo.

 

Fai mai le tala, ina ua o’o ane le ali’i palagi i le aiga o Filipina, e ofo le Palagi i faiga a le lo’omatua o Malia, e mana’o lava le lo’omatua e nofo ane le tama i ona talane. Ae na o le ‘ata o le toeaina o Mose ma tilotilo ane i lona afafine. Ua osofia le fiafia o lona loto, ina ua ia mautinoa, ua maua se to’alua lelei mo Filipina, ae paga lea, ua le taulau lona fa’amoemoe, ina ua fa’amuta e le Atua ana galuega, ae e le i va’ai i le aso fiafia o si ona afafine.

 

Fai mai, o le mea lea na tagi lotulotu ai Filipina, ona sa i ai lava lona fa’amoemoe, o le a aulia e si ona tama lona aso fiafia, peita’i, ua le taulau. Fai mai, na lagona ma iloa uma e tagata le tagi lotulotu a le tama’ita’i i le aso na lagomau ai si ona tama. Tiga lava ona aunagi ane i ai lona uso o Luisa, ae ua le mafai e le teine ona taofiofi ona fa’alogona.

 

E moni lava le upu, o o tatou manatu, e le o le finagalo lea o le Atua, i si o tatou ola vaivai. O a fo’i mea tatou te fuafuaina, ia o tatou fesili muamua i le Atua, ma o tatou fa’atauanau i Lana tausiga alofa, e taunu’u ai i le manuia a tatou fuafuaga uma.

 

Ua toe’esea se tasi, ae ua ola mai le tasi, e pei ona i ai le isi afafine o Lilo, lea ua fa’aigoa ia Ataataotaulelei. Fai mai, ua le mafai e Lilo ma Luisa ona taofiofi le teine o Filipina ina ua tu’u ifo le pusa o si ona tama i lona nofoaga tumau.

 

Sa avea lea ma fa’avaivai loto i lona tina o Malia, peita’i, ua uma ona tu’u atu le fa’amafanafanaga a le Au Faigaluega Paia a le Atua i le lo’omatua, o lea ua loto tele ai Malia. Ae fa’alogo mai le lo’omatua i le tagi aue, ue a lana tama o Filipina, ua avea lea ma fa’avaivai loto ia te ia, ae sa lalago pea ona fa’alogona i lona manatu, o le i’uga lava lea o i tatou uma, ae ia o tatou tapenapena ma tatou talitonu i le Atua, o ia o lo’o i ai le ola.

 

E faia pea...