Vaega: 78

“Le Atua e, e fa’amaualalo lava o matou loto i ou luma i lenei aso, matou te fa’afo’i atu ai le vi’iga ma le fa’ane’etaga i Lau Afio. Fa’afetai tele i Lou alofa ma Lou agalelei i a i matou i aso uma o lo matou ola. O a fo’i ni aso o totoe, ia e alofa fesoasoani mai mo i matou, o a fo’i mafatiaga ma faigata o lo’o feagai ma i matou, matou te tua atu lava i La’u Afio i mea uma, ae o le vi’iga ma le fa’afetai, matou te fa’afo’i atu i Lau Afio e fa’avavau, fa’avavau lava, Amene.”

Ua fa’asolo pea aso o le soifuaga, o le mataupu fo’i e pei ona taumafai le tama o Lilo ina ia fa’ailoa i ona matua, ua ma’ea ona o latou soalaupule ai. Sa i ai le manatu o le tama, o le a tutupu mai ai nisi faigata ma nisi puapuaga i totonu o lo latou aiga, ae maise fo’i o matua o Loleta. Peita’i, ua suiga malie mea uma, ona o le auai o le Atua i fuafuaga ma fa’amoemoega a le tagata soifua.

Fai mai, o le tala a le lo’omatua o Malia, fa’apea fo’i le toeaina o Mose, ua le toe ta’u’esea lava Mataniu, o le la tama, po’o ai lava e fai ane i lea tulaga, e le toe suia ai o la mafaufau, o le afafine lava o Lilo, e le toe ta’u’esea pe fa’asinoesea fo’i Mataniu i totonu o lo latou aiga. Ua fa’apea lava ona fai, ma leai se isi o le nu’u o iloaina, e o’o fo’i i le toeina o Lefefe, e le i gagana Lefefe i se mea e tasi, ona o lona alofa ia Lilomaiava.

Fai mai, ua amata lava ona lelei mea uma, o le faletele na nonofo ai Malia ma Mose, ua suia nei i se falepalagi matagofie, ae fai mai, e le ave’esea ai le mana’o o le lo’omatua, ia fai pea se faletalimalo mo le aiga. O nei fuafuaga uma, na galulue malosi ai Lilo ma lona tuafafine o Filipina.

Ua le toe i ai se tulaga e fa’apea ua tau fa’asoa, e leai, ua lelei mea uma, ona o le galulue fa’atasi o Lilo ma lona tuafafine o Filipina fa’apea ma Loleta. E i ai lava tama e mana’o ai Loleta e alu e fai i ona matua mo se fesoasoani, peita’i, e le taliaina e Lilo lea manatu, o lona lava loto tele, ia tagi ifo lava i o la lima e fa’atino ai fuafuaga lelei mo si o latou aiga.

Fai mai, ua si’itia le tulaga o Filipina i lana galuega, o se tama’ita’i e lalelei i le va’ai, o lea la ua mautu nei Lilo, ae ua agai ane le popolega o Malia ma Mose ia Filipina. Ua iloa fo’i e le lo’omatua o Malia ma le toeaina o Mose, ua tu lelei fo’i Luisa ma Vesi, ona o fua o fa’a’ele’eleaga o lo’o tua i ai Vesi ma Luisa e tausi ai si a la fanau, ae maise fo’i o le fesoasoani malosi ane a le tama’ita’i o Filipina.

Na i ai le aso na tau futi ai fo’i e le lo’omatua o Malia le ulu o si teine o Filipina, “Filipina, alu e fai sou to’alua, ua ma le iloa po’o le a le mea ua e fa’apena ai, na o lou alu e te faigaluega e sau, e alu e sau, ae ma te le o va’ai atu lava i se tama’i tulisi o mulimuli mai i ou tua, o le a le mea ua tupu ia te oe.?”

Fai mai, e le tautala le teine ae na o le ‘ata ma tilotilo ane i si ona tina e pele i lona loto, “Malia, e i ai lava le taimi e te va’ai atu ai o taumulimuli mai le turisi ia te a’u, ona e le toe pisa fo’i lea.” Fai mai, e fai ane lava tala ia a le teine, ae ua na o le ‘ata o si ona tama o Mose ma punou.

Ae na toe tali ane i ai lona tina, “Filipina, se i va’ai lelei, pe le o se turisi na amo popo le na turisi o le a e aumaia i lo tatou aiga, va’ai lelei sou to’alua e alofa fa’amaoni ia te oe, pau lava lea Filipina o le mea ou te mana’o i ai, pe mativa, pe ivi le mata, pe pi’o le vae, ou te le popole i ai, ae afai o se tagata e alofa fa’amaoni ia te oe, ou te taliaina.”

Na tilotilo ane nei Filipina i si ona tama, ae na iloa ane e le teine le ‘ata o lona tama ma punou. Na lulu ane nei le ulu o le teine i lona tina, ae ua fa’apea ona mafaufauga, “Mama, ua lata mai lava le taimi e te va’ai ai i la’u turisi, ‘aua e te popole i se mea e tasi pe lua.”

E faia pea...