Vaega: 76

“Le Ali’i e, ua alafa’i mai i le manuia si o matou atunu’u i lenei aso, ona o Lau tausiga alofa mo i matou. O lea matou te sunu’i ai lapalapa o malo ma ma fa’afo’i atu le vi’iga ma le fa’ane’etaga i Lau Afio, aua o Oe lava o lo matou Atua, matou te ifo ma fa’amanu atu i lou suafa i aso o totoe o lo matou ola. ia e fa’atasi mai ma i matou,  i lenei aso ia sao ma uli a matou fuafuaga uma i Lo’u alofa tunoa, a’o le vi’iga, o le fa’afetai ma le fa’amanu matou te fa’afo’i atu i La’u Afio e fa’avavau, fa’avavau, Amene.”

Na muta mai la tatou tala, ina ua ola nei ma ua tu’u ‘ese’ese Loleta ma lana tama teine i le alofa o le Atua. O lea lava o lo’o saofafa’i ai matua o Lilo, o ona tuafafine, o le toeaina o Lefefe fa’apea ma le lo’omatua o Lonisi, o ia lea ua avea ma fa’atosaga.

Fai mai le tala,  ina ua va’ai le lo’omatua o Malia i le pepe fou, ua pei e fofo’e ‘ese atu tiga ma mafatiaga na i a te ia. Ae manatua fo’i, e le o mautinoa e le lo’omatua pe o le a le uiga tonu o le tagi a Loleta, lea na aue, aue mai ai i totonu, o le pupuni. Ua tau oso ai masalosaloga o le lo’omatu, ma e le i fa’ailoaina e Lilo i ona matua le mea moni o lo’o tupu, o lea la e pogisa ai lava le lo’omatua.

O lea ua fai e le lo’omatua le igoa o le pepe teine, ua fa’aigoa nei ia Mataniufeagaimaleata, fai mai, o le igoa taupou lea o le lo’omatua a’o talavou i totonu o lona nuu ma lona aiga na ola ma soifua mai ai. O lea la ua fai lava le pule a le lo’omatua, ua fa’aigoa ai nei ia Mataniufeagaimaleata. A’o lona fa’apu’upu’uina o Mataniu.

Ua tilotilo ifo nei le lo’omatua i le pepe ua ia si’iina, fai mai, o a lava mafatiaga ma tiga na o’o ia Lilo i aso uma o le mafutaga, a’o feagai ai ma lona to’alua o Loleta, e pei e fofo’e ‘ese ia tiga. Ua lagona lona loto fiafia, ina ua va’ai atu i se pepe ua sili ona lalelei. O le igoa fo’i ua fa’aigoa ai e lona tina, ua malie fo’i i ai Lilo, ae i ona lava mafaufauga e sau se taimi, ona talatalanoa lea i ona matua e tusa ai ma le mataupu e pei ona avea nei ma ao pouliuli i lona loto ma lona mafaufau.

Ua logo nei e Mose ma Malia ia matua o Loleta, le toeaina o Falaniko ma le lo’omatua o Susitina. Fai mai, ua tagi fa’ataitaio le lo’omatua o Susitina, e tele lava le mataupu o lo’o nofo ma le lo’omatua, ona e le o iloa fo’i e le toeaina o Falaniko le mea lea e tupu.

Ua uma le fa’aipoipoga, o lea ua ola Loleta, ae o lo’o i ai lava le mea o lo’o mafatia ai le loto o le lo’omatua, ona o tulaga e pei ona i ai nei. Fai mai, ina ua logo matua o Loleta, fai mai na tagi le lo’omatua o Susitina, ma fa’apea ane i a Lefefe, e manan’o ia fai se alalafaga mo Loleta ma lana tama. Ua fa’apea lava ona fai, ua feiloa’i fiafia ai nei aiga ga lua.

Sa galue malosi fo’i tuagane o Loleta i le fa’atinoina o mea uma, ma sa faia lea fa’atasiga i le aiga o Falaniko ma Susitina. Fai mai, na finau malosi fo’i le lo’omatua o Malia, ia auai le latou Fa’afeagaiga ma lona Faletua i le alalafaga lea. O le mea ua o’o i ai, ua o’o atu le Fa’afeagaiga a Malia ma Mose, ma ua i ai fo’i ma le Faifeau a Falaniko ma Susitina.

Ua fai uma e le Faifeau a Susitina ma Falaniko mea uma, ae ua na o le fa’amaepaepa o le Faifeau a Malia ma Mose. Fa’apea ane loa le faifeau a Mose ma Malia, “Ua e faia uma mea ali’i, ae le tu’u mai se mea se i o’u faia, ae na tali atu i ai le Faifeau a Susitina ma Falaniko, “Va’ai, o la’u mamoe.” Ae na tali ane i ai le isi Faifeau, “Ioe, e moni o lau mamoe, ae ana leai la’u mamoe, e le ma’i lau mamoe.”

E faia pea...