Ads by Google Ads by Google

Onosa’i I Mea Tiga

Vaega: 75

 

Na muta mai la tatou tala, ina ua ola Loleta, o lea la ua sagai ane nei le fa’atosaga le lo’omatua o Lonisi e toe teuteu mea uma. Fai mai, o le taimi na fusi mau ai e Lilo si ona tina le lo’omatua o Malia, ae o latou fa’alogoina loa le tagi mai o le pepe mai totonu o le pupuni.

 

Ua le iloa e Mose, Malia, Lefefe, Lilo ma lona tuafafine o Filipina, po’o ai le leo o le a fa’alogo i ai, ona e sau le leo o le pepe, ae o lo’o tagi aue, aue, mai ai ma Loleta. Ua saofa’i ifo nei i lalo Lilo i talane o lona tina ma ona loimata ua le utufia. Ua na o le tilotilo ane nei i ai o lona tama le toeaina o Mose. Ua le iloa e le lo’omatua po’o le a le mea ua tupu, ua le mafai ona fai ane se tala a lana tama o Lilo.

 

Na tu a’e nei i luga le teine o Filipina ma savali ane i le mea o lo’o saofafa’i mai ai lona tina ma lona tuagane. Na a’apa atu nei Filipina ma fusi mai si ona tuagane i lea taimi, “Lilo, ‘aua e te popole i se mea, ua uma ona ou iloa mea uma, ae e tatau ona e fa’ailoa loa i le taimi lenei, i o tatou matua, ona uma ai lava lea o mea uma, ‘aua e te toe fa’atali mo se isi taimi, o le taimi lenei ua talafeagai tonu lava ma le matupu o lo’o e popole ai ma e tiga ai.”

 

Ua geno ane i ai lona tuagane, ae fa’alogo atu loa ua sau le leo o Luisa lea o lo’o i totonu o le pupuni, “O le teine, o le teine, oka ta’i lapo’a, o le teine.” Ua tilotilo ane nei Mose i a Malia, ae ua fa’ataupupula ane i ai le lo’omatua. E le i umi, ae savali mai loa i fafo Lonisi ma afisi mai le pepe, e moni lava, o le teine. Na muamua lava tu’u e Lonisi i a Lilo le pepe, fai mai, ua atili ai ona maligi ifo loimata o le tama i lea taimi. Ua tu’u ane nei e Lilo i lona tina, fai mai le tala, ua fusi mai nei e le lo’omatua le pepe i ona fatafata ma tilotilo ifo i ai. Ua pei o foliga o lana tama teine o Filipina i le taimi na fanau ai. Ua toe alu le lo’omatua o Lonisi i totonu o le pupuni, ae fa’alogo mai o alu atu le fa’amalo a Mose ma Lefefe ina ua ma’ea le galuega fita na feagai ai ma Lonisi.

 

Fai mai, e mao le tilotilo ane o le lo’omatua o Lonisi ia Lefefe, ae fetaui ma le fa’a’ivi ane i ai o le mata o le toeaina. Ua savali fa’atopetope nei Lonisi i totonu o le pupuni ma ‘ata, “Leaga lava le toeaina e amio valea tele, po’o a nei mata e fa’aivi mai ia te a’u, e le o a’u o se tama’i teineititi, e lota nofoaga e, o le a ta’e.”

 

Ua ‘ata’ata Lonisi ma tapena loa isi mea e tatau ona fai mo Loleta. Fai mai, e tapena lava e Lonisi ma Luisa moega, ae ua matua’i moe gapepe Loleta i lea taimi. Ua maua le malologa, aua ua toetiti iva itula o fa’atiga le fafine. Ua uma lea, ona savavali ane loa lea o Lonisi ma Luisa i fafo, ae ua tu’u Loleta e fai sana malologa.

 

O le taimi atoa na fai ai togafitiga mo Loleta, o le taimi lea, ua gaioi Vesi i le faiga o le mea’ai, sa fai ona o le manatu o le tamaloa, e fai ai se meatausami a Loleta ae maise fo’i o le toeaina ma le lo’omatua, ae o lea fo’i ua malotia lo latou aiga i lea afiafi.

 

Ua saofafa’i ifo nei i lalo Luisa ma Lonisi. Fai mai, e pei e fofo’e ‘ese atu se avega mai ia Lonisi i lea taimi, aua sa lagona le popole o lona loto, pe o le a tua ma ni a lana galuega mo Loleta, a’o lea ua i’u i le manuia mea uma, fa’afetai ai i le Atua.

 

E le gata i le popole o le lo’omatua o Lonisi, ina ne I tupu se fa’alavelave i a Loleta, ae ua fa’apena fo’i manatu ma mafaufauga o le toeaina o Mose. O le tulaga na o’o i a Mose, ona e le o iloa e matua o Loleta, o lea ua fanau ma ua ola. O le isi lea itu na popole i ai le toeaina, ina ne i tupu se fa’alavelave ia Loleta, ona fa’apea lea o ona matua, pe o le a le mea na le ta’uina atu ai i a la’ua.

 

Fai mai, ua avane nei e Lonisi le pepe ma fa’ataoto i le va o Malia ma Lilo, na fa’apea le tala a le lo’omatua o Malia, “O le igoa o si a’u tama, o Mataniufeagaimaleata, e le toe i ai lava se isi igoa ou te mana’o i ai, e tasi lava le igoa o si a’u tama, o Mataniufeagaimaleata.”

 

E faia pea...