Onosa’i I Mea Tiga

Vaega: 74

 

Alo mai o le a fa’auau le tatou tala. Na muta mai la tatou tala, ina ua fa’atiga nei le to’alua o Lilo, le tama’ita’i o Loleta. O lea fo’i ua taunu’u ane le ta’avale a Lefefe ma Lilo, lea na alu Lefefe e a’ami mai. Fai mai, e le i tele se talanoaga a Lefefe ma Lilo, i le taimi na sau ai le la ta’avale, pau le mea na fa’ailoa e Lefefe ia Lilo, ua tiga le manava o lona to’alua, pau lea, a’o se isi tala, e le o iloa e Lefefe le mea atoa o lo’o tupu i lea aso.

 

Ina ua tu le ta’avale i luma o le fale, na savali ane loa Lilo ma tilotilo solo i totonu o lo latou fale, na iloa atu ai e Lilo le pupuni ma ia mautinoa ai loa, o lo’o i ai i totonu Loleta. Fai mai, e fa’alogo atu Lilo, o fa’ataitaio mai lona to’alua, ua lagona le alofa o le tama i lea taimi, aua ua fa’alogo mai nei i le tagi aue, a Loleta.

 

Na fa’ate’ia le lo’omatua o Lonisi, ina ua susu’e atu le pupuni ma ulufale atu loa Lilo. “Lilo, afio maia, i lou nofoaga lea, sau se i e va’ai po’o le a le mea ua umi ai ona fa’atali Loleta, se i e afio mai.” Ua saofa’i ifo nei i lalo Lilo, ua a’apa atu nei ma u’u mai le lima o lona to’alua. Ua lagona le alofa ina ua va’ai atu i meamasei o mea ua tupu mai. “Leta, o a mai oe, o le a le mea ua e tigaina ai fa’apena, e i ai se mea o tupu, ua uma ona ou fa’amagalo ia te oe, o la’u avega mamafa le na sa amo, ae ua ou fa’amagalo ia toe oe.”

 

Fai mai, e le i uma atu tala a Lilo, ae toe fa’ataitaio Loleta, “Lilo, alofa mai ia te a’u, ia e alofa ma fa’amagalo mai a’u Lilo o a lava mea leaga uma sa e amoina, ia e alofa fa’amagalo mai a’u, ua ou lagona lava ua ou tigaina, alofa mai Lilo, ua ou le lava, ua umi ona ou fa’atiga.”

 

Fai mai le tala, na tu a’e i luga le lo’omatua o Malia ma tau u’u lona ie ua pau ifo i lalo. Ua tilotilo ane nei i a Lefefe i lea taimi, ua toe tilotilo atu i a Mose, ae ua na o le punou ifo o le toeaina ma ona loimata ua le utufia.

 

“Mose, o le a le mea lea ua ou fa’alogo atu i ai, o le a le mea lea e tupu, oi ta fe fe, o le a le mea lea e tupu, oi le Ali’i e, alofa mai.” Na savali atu nei i ai lana tama teine o Filipina ma fusi mai lona tina, “Mama, ‘aua e te popole tatou tapua’i i le ma’i o si fafine, aua e te fa’apena.”

 

Ua toe nofo ifo i lalo le lo’omatua, a’o le taimi lea, o lo’o i ai pea Lonisi ma Luisa i totonu o le pupuni lea o lo’o fa’ataitaio ai nei Loleta. Fai mai, ua pei o timuga e maligi mai e lagi loimata o le tuafafine o Lilo i lea taimi, le teine o Luisa. Ua o’o fo’i i le lo’omatua o Lonisi, ua tau le iloa e Lonisi le isi itu, ua maligi ifo ona loimata ma tilotilo ane i a Loleta.

 

E fa’ataitaio lava Loleta, ma tau nofo a’e i luga, e mana’o ia fusi atu Lilo, a’o le tama i lea taimi, ua le mafai ona taofiofi ona loimata. Na i’u lava ina fao ifo le tama ma fusi atu si ona to’alua i lea taimi. E moni lava, o a lava faigata ma tiga e o’o mai, ae a o tatou va’ai atu i tiga ua o’o i se tasi e pele ia i tatou, e le mafai ona tatou ‘alo ai, o le tulaga tonu lea ua o’o ia Lilomaiava i lea taimi.

 

O a lava tiga ma mafatiaga na tauave i masina e fia o lona olaga, sa le i toe manatu i ai le tama, ua va’ai tino ona mata i le tigaina ua o’o i ai si ona to’alua. Fai mai le tala, o le taimi lava na fusi ai e Lilo lona to’alua, o le taimi lea na va’aia ai e le fa’atosaga le liua o tiga o Loleta i lea taimi.

 

Na fa’apea ane le lo’omatua o Lonisi, “Lilo, ua lava, tu’umuli ‘ese, o lea ua mapu Loleta.” O le taimi lea, ua va’ai atu Lonisi ua aliali mai le ulu o le pepe, ma ua lagona ai lona alofa ma lona loto fa’afetai ua ma’ea lana galuega i lea taimi. Na tula’i ‘ese loa Lilo ma savali mai loa ua fusi atu lona tina. Ua iloa le misitelio lilo sa tauave e Lilo mo aso e tele, o lea ua aliali mai nei, e moni ai le upu, o a lava mea tatou te taumafai e natia, e faia e le Atua auala e fa’ailoa ai.

 

E faia pea...

Comment Here