Onosa’i I Mea Tiga

Vaega: 71

 

Alo maia o le toe fa’aauau atu la tatou tala mo lenei aso. Na muta mai la tatou tala, ina tau iloa lava e tuafafine o Lilo le misitelio lilo lea o lo’o tupu nei, peita’i, ua na o ni masalosaloga ae leai se mea e fa’amautu ai o la manatu. Ae manatua fo’i, o Luisa ua fai lona to’alua, ua i ai fo’i si a la fanau, o lea la e iloa lelei lava e Luisa tulaga fa’apea.

 

Fai mai le tala, o lea lava e i ai le manatu o le lo’omatua o Malia, ua muamua ta le ‘aufai a Lilo, ae mulimuli fa’anoi, o le ala fo’i lea sa ia tauamfai ai lava ina ia fai loa le fa’aipoipoga ae e le i aliali le to a Loleta. O a fo’i nisi tulaga na taumafai i ai le aiga o Loleta e fai, tasi lava le tala a le lo’omatua o Malia, “Afai o mea na tou te manana’o i ai, o e fai, ae o la’u tama e le toe i ai lava nisi mea, ia o a mea tou te toe manana’o e fai, o lea ua fula le manava o Loleta, o le a la nisi mea e toe fai, ia malolo ane i le vaiaisa a le fa’ili a le Polynesian Beat, pau lea, e loka faku e, pei a malepe.”

 

Ua fa’apea lava ona fai, ae e le i iloa e le lo’omatua le mea moni ua tupu, o lea lava e alu pogisa lava Malia ma Mose i le mea lea e tupu. Pau le mana’oga o le lo’omatua o Malia, ia fai loa le fa’aipoipoga e pei ona mana’o i ai le tina o Loleta, ona o lea ua ia mautinoa, ua ma’itaga Loleta i a Lilo. Fai mai, na tagi ane le tina o Loleta, e toso le veli o lana tama, tasi le tala a le lo’omatua o Malia, e leai ni veli e faia, ia o a veli, ua puta le me’i, soia ia le faia o mea e vaivai ai mafaufau o le tagata, tu’u la’ia veli, o le aua oso le ke’I, tu i le me’i.

 

Toe tagi ane fo’i matua o Loleta, e manana’o e fa’atele le ‘aiga a Loleta ma Lilo, tasi le tala a le lo’omatua o Malia, e leai se ‘aiga e faia, na o le fa’apaia lava i le Malumalu o le Atua, liliu ane teu le Aufaigaluega Paia a le Atua, o ai lava tagata o le a auai, o latou lava na, e le toe i ai lava nisi mea e toe faia, uma lava pisupo.

 

Fai mai, a fai fai tala a le lo’omatua liliu ane i a Lefefe lea na o latou o e fai le tala ma matua o Loleta, “Fefe, e a e sa’o lau teine.” Ua na o le punou o Lefefe i lea taimi ma ‘ata, ae ua alu fa’asolo atoa faiga a le lo’omatua o Malia, “E a, e i ai se isi mea o oulua manatu i ai, aua o lea na o ma o mai ma le tonu, o a fo’i nisi tonu ma nisi fuafuaga, e sili pe a fa’ata’atia ‘ese, ua leai se aoga o na fuafuaga uma, ae e sili pe a fai le tonu lea, e fa’amama avega fo’i ia tatou uma.”

 

Fai mai le tala, e le i fa’atafa le alu a le lo’omatua o Malia, ua le sao ai la faiga fitagata a le lo’omatua o Susitina, o a fo’i mea o lo’o tapena e lona aiga, o lea ua mautu le tala o mea e ao ona fai. Ae o lo’o taumia ai ma le misitelio lilo a le lo’omatua, ua leva ona ia iloa le ma’i o lana tama, ae ua natia lava, e le i alia’e.

 

O le ala fo’i lea, o le a lava le tonu e fai atu e le tina o Lilo, ua alu ai lava ma le lo’omatua. Fai mai, ua na o le fa’ataupupula a’e nei o le toeaina o Falaniko i lona to’alua, ae ua le va’ai ane i ai le lo’omatua, pau le tali a le lo’omatua, “ia ua lelei fo’i le na, e sa’o fo’i, e fa’amama avega ia tatou uma.”

 

Ua na o le nofo o le toeaina o Falaniko ma lulu lona ulu, ae ua tali ane i ai le matai o lona aiga, o Avemaoe, “O le tonu lava ua outou malilie fa’atasi i ai o le tonu lava lea e fai, e le aoga fo’i ona tatou sasalu, ae o lea ua i ai le mea ua tupu ia Loleta, ae fai ia le tonu le na.”

 

Na uma ai loa ma le tonu o le fa’aipoipoga a Lilo ma Loleta, ma na fai lava le tonu a le lo’omatua o Malia, ae manatua o lea e fa’atali atu si toeaina o Mose mo se tala, a’o lea ua tatope e le lo’omatua o Malia le tonu o mea uma. Pau le tala a le lo’omatua na fai i si toeaina, “Mose ma le ‘ato ofe, ia malie oe, o le tonu lava ua ou faia, o le tonu uma lava lea a ta’ua, aua ua leva ona avea ta’ua ma tino e tasi, ia e tasi fo’i le ta tonu e fai.” Ua ‘ata Mose ma tilotio ane i si ona to’alua e tau oso ai lona toto maualuga ma lona ma’i suka, i aso uma o lona olaga.

 

E faia pea…

Comment Here