Ads by Google Ads by Google

Onosa’i I Mea Tiga

Vaega: 8

 

Fa’atalofa atu i lou alafa’i mai i le manuia i lenei aso fou, o se aso e fa’aopoopo i  lou soifua fa’apea ma si o’u nei ola vaivai. E ao ai ona o tatou fa’apea ifo, “Le Ali’i Iesu Keriso, o lou alofa i o matou tagata, na e talia ai tiga ma mafatiaga uma, ia e alofa ma fesoasoani mai ia i matou, a’o fa’aauau pea la matou savaliga i lenei lalolagi o faigata ma puapuaga, ia e foa’i mai le onosa’i ma le fa’apalepale i o matou loto, a’o le vi’iga e fa’afo’i atu i a te Oe le Ali’i e, Amene.”

 

Na muta mai la tatou tala ina ua fa’ate’ia le Fa’afeagaiga ma le lo’omatua o Malia, ina ua fa’apea ane le tala a le toeaina o Mose, “Vesi, a tu’umuli le Fa’afeagaiga, ona e nofo mai lea e i ai le mea ou te fia talanoa ai i a te oe.” Ua ma’ea le taumafataga ma ua fa’amavae loa le Fa’afeagaiga ma ua tu’umuli ‘ese, o le tupe sa i le taga a le toeaina o Mose, o lea ua tu’u atu i le Fa’afeagaiga mo sa la taumafagata ma le Faletua.

 

Ua nofo ifo nei Vesi i lalo, ae fa’ate’ia, ina ua fa’apea ane le toeaina, “Vesi, savali mai ta o i tua, e fai ai a ta tala.” E le i uma ane tala a le toeaina o Mose ae oso a’e i luga le leo o le lo’omatua o Malia, “Ia o a fo’i na mea fa’alupelupeina fa’apena, o lea fo’i ou te fia fa’alogologo a’u i tala, se o le mea lena e oso ai le masalosalo vale o le isi tagata, pe afai o le a fai fa’apena ni tala, talanoa mai, e te lua iloa le tala a le isi lo’omatua o lo matou nu’u i Savai’i, “Gagana mai, gagana mai, ia gagana mai la’ia, atonu fo’i e avatu ai sa’u fesoasoani i si a oulua mataupu.”

 

“Malia, va’ai oe, o le mea le na e tupu ai le faitatala o le fafine, o le fia fa’alogologo fua i tala ma mea e talatalanoa ai tamaloloa, se tu’u ia lalo o le isu, o mea na e tutupu ai fa’alavelave i totonu o aiga, o outou na tina, ona o atu ai lava lea ma fai fa’amatalaga se se ma le le sa’o, ona le manuia ia lava lea o se mea, tu’u lou isu i le mea e tatau ona tu’u i ai, ae le o le tu’u i le mea e le tatau ona tu’u ai, soia ia.”

 

Ua le toe tali le lo’omatua, ae ua ‘ata ane i a Vesi, ua le iloa pe ua ma pe ua a, “Ia ua lelei ali’i faitatala, ae a ou iloa o o’u tala na o le a oulua o e fai, ia e te lua va’ava’ai i ai ma Vesi.” Ua ‘ata Vesi ma tilotilo ane i le lo’omatua ma lulu lona ulu. Fai mai le tomumu le leoa a Vesi, “Ua ta le iloa po’o le lelei, po’o le leaga.” Ua alu nei le solo a Mose ma Vesi e agai atu i tua i le toga fa’i, ua tau sau le afu malulu o si tama o Vesi, ona ua fa’ate’ia o ia i le tala a le toeaina. Ua le mautonu fo’i lona mafaufau, pe o le a le mea ua fia talanoa ai le toeaina i a te ia.

 

Ua toe manatua vave e Vesi, le tulaga e fa’apea, o le tama o lona to’alua, ona ua fa’atamafai e Mose ma Malia ia Luisa o lona uiga, ua le toe ta’u ‘esea Luisa, o le la tama ulumatua. Ua tau mafanafana le loto o Vesi i lea taimi ma ua fa’aauau pea le la savaliga ma le toeaina o Mose e aga’i atu i tua i le togafa’i. Ua nofo ifo i lalo le toeaina, ma fa’apea ane ia Vesi, “Vesi, sa’ofa’i ifo i’ina, ona amata ai lea o le ta talanoaga, ona e i ai lava le mea ou te fia malamalama ai.”

 

Ua saofa’i ifo nei i lalo Vesi ma tafitafi solo laula’au o lo’o tutu i talane o le fa’i lea o le a fa’alagolago i ai. Na fa’apea mafaufauga o Vesi, pei lava e sili ona fai sa’u tala i le toeaina, se i tau au mai i fafo  le mea lea  fia talanoa mai ai i a te a’u, aua ua sau fo’i le fefe ma le popole o le loto latou.

 

“Tama, o le a le ma o lo’o e fia saunoa ai, o a’u o lou atali’i, e le o a’u o se tagata ese, ae afai lava sa i ai se tautua ua le ‘au’au ma ua fa’aletonu mo oulua, ia malie lou finagalo Mose, ona ua pau o se mea ua ou mafaia aua oulua ma si o tatou aiga.”

 

Na fa’ate’ia Vesi ina ua fa’apea ane le toeaina o Mose, “Vesi, o lau tautua i totonu o le aiga lenei, e leai se mea e tasi e ga se, e leai se mea lava e tasi e fa’aletonu,  ua malie atoatoa o ma loto ma le lo’omatua i lau tautua Vesi, fa’afetai tele i te oe si o’u atali’i.”

 

Fai mai, e pei ua va’ai Vesi i le Agelu a le Ali’i i lea taimi, o lona afu malulu na i ai, ua matua’i mafanafana lava i lea taimi. O lona pala’ai sa i ai, ua le toe pala’ai, ua matua’i toa le loto o Vesi, ma ua fafa le isi fa’afetai i luga o le isi fa’afetai.

 

E faia pea….